Lögmannablaðið - 01.06.2008, Qupperneq 4

4 < LÖGMANNABLAÐIÐ – 4 / 2007
Í lýðræðinu er falin samkeppni milli ólíkra
sjónarmiða og hugmynda. Samkeppnin er á köflum
bæði hörð og óvægin en þó eru úrslitin aldrei
þannig að samfélagið væri betur sett ef slíkrar
samkeppni nyti ekki við.
Þátttakendur í þessari hörðu samkeppni mæta til
leiks vel vopnum búnir, enda hafa þeir flestir
mikilvæga hagsmuni að verja og sumir að eigin
dómi heilagan málstað. Hugmyndafræðileg barátta
og hagsmunagæsla eru þannig þungamiðja
samkeppninnar. Hið mikilvæga hlutverk lögmanna
í lýðræðislegu réttarríki kallar á þátttöku þeirra í
þessari samkeppni. Upphafsorð siðareglna
lögmanna um að þeim beri „að efla rétt og hrinda
órétti“ undirstrika þetta mikilvæga hlutverk
þeirra.
Áhrif lögmanna eru og eiga vera mikil þegar kemur
að mótun samfélagsins. Sjónarmið þeirra eiga að
vega þungt þegar til umfjöllunar eru mál sem varða
réttindi og skyldur manna. Lögmönnum er bæði
rétt og skylt að láta rödd sína heyrast með afgerandi
hætti í slíkri umræðu. Þeirra framlag er mikilvægt
fyrir hagsmuni heildarinnar og það er algjörlega
óásættanlegt að lögmenn láti sig þjóðmál litlu
varða.
Raddir lögmanna þurfa líka heyrast í innbyrðis
málum stéttarinnar. Fagleg og fræðileg umræða
þarf að vera lifandi innan stéttarinnar ef hún á að
áfram að gegna forystuhlutverki í samfélaginu. Þá
eru opinská skoðanaskipti um sameiginleg
hagsmuna- og réttindamál nauðsynleg til að
forvígismenn stéttarinnar standi traustum fótum í
hagsmunabaráttu sinni. Slíkur innri styrkur gefur
rödd lögmanna enn meira vægi út á við.
Lögmannablaðið er rödd lögmanna. Í fyrsta lagi á
blaðið að vera málgagn og málsvari lögmanna út á
við. Í öðru lagi þjónar blaðið þeim tilgangi að vera
vettvangur innbyrðis skoðanaskipta og fræðilegrar
umræðu. Í þriðja lagi gegnir blaðið því hlutverki að
efla samheldni og félagsanda innan stéttarinnar
með fréttum og margvíslegri umfjöllun. Það er von
undirritaðs að Lögmannablaðið sinni sem best
þessu þríþætta hlutverki sínu undir hans stjórn.
Frá ritstjórn
Borgar Þór Einarsson hdl.
Rödd lögmanna