Víkurfréttir - 19.12.2013, Qupperneq 30

fimmtudagurinn 19. desember 2013 • VÍKURFRÉTTIR30
Opinn fyrir því að starfa áfram
„Ef meirihlutinn sem tók við aftur í fyrra hefði viljað skipta
um bæjarstóra þá hefðu þeir bara gert það. Þá hefði ekkert
verið við því að segja. Sem betur fer höfum við náð mjög
góðu samstarfi og óskað var eftir því að ég starfaði áfram.
Og það var alveg sjálfsagt af minni hálfu.“ segir Magnús.
Samningurinn sem hann skrifaði undir í byrjun gildir út
kjörtímabilið sem endar í maí. „Ég er alveg opinn fyrir því að
vera áfram en það er aldrei hægt að segja neitt um slíkt fyrir-
fram. Ég er bara jákvæður fyrir því ef til þess kemur,“ segir
hann. Garður sé gott bæjarfélag og ágætt að starfa þar og eiga
samstarf við íbúana. Hann hefur ekki orðið var við að sterkar
fjölskyldur eða ættarveldi ráði mikið í stjórnmálum í Garði,
a.m.k. ekkert umfram það sem gerist í öðrum sveitarfélögum
á landinu. Það sé ekkert í tengslum við slíkt sem trufli hann
í starfi.
Ýmislegt líkt með Garði og Ólafsvík
Hann segir að það sem einkenni Garðinn sé rólegt samfélag
og umhverfið mjög fallegt. Garðskaginn sé einstakt land-
svæði og á björtum degi sé flott útsýni út á Snæfellsjökul sem
hann, sem Ólafsvíkingur, kunni mjög vel að meta. „Það er
margt líkt með Garðinum og Ólafsvík. Garður er í grunn-
inn sjávarútvegsbær þó að engin höfn sé hér núna. Einnig er
hugarfar íbúanna svipað og ýmislegt í menningunni,“ segir
Magnús. Hann var sveitarstjóri í Grundarfirði frá 1990 - 1995
og var svo kosinn á Alþingi 1995. Þar var hann meira og
minna til ársins 2009. Einnig var hann framkvæmdastjóri
Heilbrigðisstofnunarinnar á Selfossi í tvö ár og hefur því víða
komið við.
Ekki skemmtileg reynsla að missa starfið
„Í þessum bransa veit maður aldrei hversu lengi maður
staldrar við. Þetta umhverfi er nú þannig að starf bæjarstjóra
er mjög ótryggt. Það hefur sannað sig og sýnt í mörgum
sveitarfélögum í gegnum tíðina. Svo er þetta í raun tíma-
bundið til fjögurra ára hverju sinni og svo er maður í lausu
lofti fram að kosningum,“ segir Magnús en bætir við að hann
sé orðinn ansi vanur slíku umhverfi. „Ég missti starf mitt
sem þingmaður í miðjum alþingiskosningum. Það var ekki
skemmtileg reynsla en svona er þetta bara. Maður verður
bara að tækla það, standa sig vel og reyna að leggja sig fram
svo að það hjálpi manni í framhaldinu.“
Meira „fútt“ í því að vera bæjarstjóri en þingmaður
Magnús segir bæjarpólitíkina vera meira lifandi en þing-
störfin því þar gerist hlutirnir. „Þegar maður er bæjarstjóri,
sérstaklega í sveitarfélagi eins og hér, þá eru nánast öll mál á
borðinu hjá manni. Á þingi er umhverfið öðruvísi, meiri um-
ræður og minna sem kemur til framkvæmda. Reyndar gerði
ég töluvert af því sem ráðherra. Það er meira „fútt“ í því að
koma málum til framkvæmda en að ræða þau.“
Bjóst við erfiðu samstarfi vegna átakamála
Magnús segir ýmislegt hafa gengið á í bæjarfélagsmálum og
skólamálum í Garði áður en hann kom og hann hélt að sam-
starfið yrði erfitt en raunin hafi orðið önnur. „Fólk tók bara
saman höndum með að koma málum í lag. Lagði til hliðar
allar væringar sem voru til staðar. Það hefur gengið mjög vel.“
Hann bætir við að lykillinn að góðu samstarfi sé mannlegi
þátturinn. Að fólk tali saman og virði skoðanir hvers annars
og beri virðingu fyrir hvert öðru. „Í svona sveitarfélagi eru
ekki mörg stór mál svona átakamál á milli meirihluta og
minnihluta. Að mestu leyti eru þetta samstæðir hlutir sem
hægt er að komast að sameiginlegri niðurstöðu um og hafa
hagsmuni bæjarins í fyrirrúmi. Það er mín reynsla,“ segir
Magnús.
Veðurfarið betra en hann bjóst við
Magnús hafði komið nokkrum sinnum í Garð á árum áður
og keppt við Víði í fótbolta en þekkti örfáa sem hann vissi að
byggju þar. „Svo hafði maður þá ímynd af Garðinum að hér
væri alltaf rok og leiðinlegt veður en það hefur algjörlega af-
sannast í mínum huga. Það hefur komið skemmtilega á óvart
hvað veðurfarið er gott.“ Magnús býr í Árbæjarhverfi Reykja-
víkur og ekur á milli. Hann segist gefa sér þrjú korter í það
hvora leið. Hann segist hafa tekið eftir því þegar hann keyri á
milli t.d. yfir vetrartímann að það snjóar minna í Garði en t.d.
í Reykjanesbæ. „Oft er hlýrra hér á skaganum en á leiðinni
og alls ekki meiri vindur en annars staðar sem ég hef búið.
Veðrið hefur í raun komið mér mest á óvart. Svo bara sam-
félagið. Þegar maður kemur alveg svona nýr inn í samfélag þá
veit maður ekki alltaf á hverju maður á von. En þetta hefur
virkað mjög vel á mig og fólk hefur tekið mér mjög vel,“ segir
Magnús brosandi.
Ekki nógu mikill nagli
Spurður um eiginleika sína sem endurspeglast best í því sem
hann gerir segir hann að líklega sé það að hann á auðvelt með
að starfa með öllu fólki. „Það skiptir einfaldlega mestu máli.
Ef mannlegu samskiptin ganga vel þá er svo margt annað gott
sem fylgir og gengur vel. Ég hef lært það í gegnum tíðina að
lynda vel við alla sem ég starfa með og finna lausnir, miðla
málum og framvegis. Sumir segja að ég sé alltof hógvær og
ekki nógu mikill nagli. Ég á alveg naglann til en maður beitir
honum bara þegar á þarf að halda. Ef maður ofnotar svoleiðis
lendir maður bara í einhverjum öngstrætum og það gerir öll
samskipti erfiðari,“ segir Magnús.
Ný plata í deiglunni
Tónlist er eitt af stærstu áhugamálum Magnúsar og hann
hefur stundum gripið í gítarinn þegar tilefni er til, svo sem
á þorrablóti og á Sólseturshátíðinni. Einnig spilar hann
öðru hverju með hljómsveit sinni, Upplyftingu. „Við æfum
ekki mikið, en það kemur fyrir. Höfum verið að dunda við
upptökur og draumurinn er að gefa út plötu með nýju efni.“
Laga- og textahöfundurinn Jóhann G. Jóhannsson heitinn
lét meðlimi sveitarinnar fá fjölda laga áður en hann lést. „Við
erum með slatta af óútgefnu efni eftir hann og gætum í raun
gefið út eina eða tvær plötur. Erum langt komnir með efni
á eina plötu og það yrði gaman ef hún gæti komið út á nýju
ári,“ segir Magnús að lokum.
Viðtal og mynd: Olga Björt Þórðardóttir
-viðtal
F J Ö L H Æ F U R B Æ J A R S T J Ó R I Í G A R Ð I
„Ég er stundum of hógvær“
Þegar MAGNÚS STEFÁNSSON hóf störf sem bæjarstjóri í Garði fyrir einu og hálfu ári þekkti hann ekki mikið til þar. Honum finnst þó margt
líkt með Garði og heimabæ sínum, Ólafsvík, og hann hefur aðlagast menningunni og fólkinu vel. Hann segist eiga auðvelt með að láta sér lynda við aðra en
sumir segi hann ekki nógu mikinn „nagla“. Olga Björt ræddi við Magnús um starfið, stjórnmálin og tónlistina, en hann leggur drög að nýrri hljómplötu með
Upplyftingu með óútgefnu efni eftir Jóhann G. Jóhannsson heitinn.
Kari Magnús Stefánsson bæjarstjóri í
Garði og á bakvið má sjá þær Jenný Kamillu
Harðardóttir, Karitas Söru G Haesler og
Margréti Haraldsdóttur.