Bændablaðið - 06.03.2014, Blaðsíða 40

40 Bændablaðið | Fimmtudagur 6. mars 2014
Vélabásinn
liklegur@internet.is
Hjörtur L. Jónsson
Nýr Hyundai Santa Fe:
Áreiðanlegur jepplingur með fimm ára ábyrgð
Í nokkur ár hefur Hyundai getað
státað sig af því að vera með
lægstu bilanatíðni og góða endingu
bílaframleiðanda samkvæmt
erlendum vefmiðlum. Fyrri
árgerðir hafa reynst lögreglunni á
landsbyggðinni það vel að nánast
eingöngu eru notaðir Hyundai Santa
Fe bílar hjá lögregluembættum út á
landi. Í nýjustu línunni af Santa Fe
eru þrjár tegundir, Comfort, Style
og Premium. Ég bauð konunni
og tengdaforeldrunum í bíltúr
á Hyundai Santa Fe Style um
hinn dæmigerða Þingvallahring
síðastliðin konudag, með smá
útidúrum.
Kraftmikill og hlaðin aukabúnaði
Vélin er 2,2 lítra diselvél og á að skila
197 hestöflum. Þrátt fyrir að vélin
sé svona stór og kraftmikil er hún
eyðslugrönn, en uppgefin eyðsla
er í blönduðum akstri við bestu
aðstæður 6,6 lítrar á hundraðið.
Samkvæmt aksturstölvu bílsins var
ég að eyða 7,2 á hundraðið eftir um
179 km akstur og vorum við fjögur
í bílnum, hitinn við frostmark og
meðalhraðinn 57 km á klukkustund
í bíltúr sem tók þrjá klukkutíma og
tuttugu mínútur.
Style er útbúin með GPS
staðsetningarkerfi með íslensku
vegakorti í mælaborði (persónulega
hef ég ekki sérlega mikil not fyrir
svoleiðis þar sem að ég tel mig rata
þangað sem ég þarf að fara). Fyrir
þá sem hugsanlega þyrftu á þessu
að halda þá er hægt að stimpla inn
ákvörðunarstað og á ensku leiðir
GPS tækið mann að áfangastað.
Þegar þangað er komið og maður
bakkar í stæði þá dettur vegakortið
út og á skjánum birtist útsýnið fyrir
aftan bílinn í bakkmyndavélinni,
Auk bakkmyndavélar er bíllinn
með bakkskynjara sem eru mátulega
næmir (í sumum bílum eru þessir
skynjarar það leiðinlega næmir að
með tímanum er mönnum gjarnt að
hunsa skynjarana).
Mikið pláss og gott rými
fyrir farþega
Það fyrsta sem ég tók eftir var
hversu allt rými og pláss var allt
gott þó sérstaklega fyrir fætur. Sætin
þægileg og fara afar vel með mann
í langkeyrslum. Sætishitari með
þrem mismunandi hitastillingum er
í framsætum. Farþegasætin afturí
bílnum er hægt að færa fram og aftur,
en frekar fáir jepplingar bjóða upp á
svoleiðis þægindi, en fótapláss fyrir
framan aftursætin er einstaklega gott.
Vel hljóðeynangraður undirvagn og
lítið malarvegahljóð
Af Lyngdalsheiðarveginum liggur
vegslóði að Stóra-Dímon sem
vélsleðamenn nota til að komast í
snjó ( grófur og holóttur).
Þennan slóða ók ég til að prófa
fjöðrun sem er mjög góð.Það kom
þó á óvart hversu lítið malarhljóð
var inni í bílnum þrátt fyrir að
bíllinn væri á grófum og mjúkum
vetrardekkjum sem hirtu upp grjótið
og spýttu því upp undir bílinn.
Við Stóra-Dímon var nýskafin
snjór í hjólförunum og reyndi
ég bílinn þar í brekkunni upp á
Barmahraunið. Í fyrstu tilraun
stoppaði bíllinn fljótlega, en í
næstu ferð var spólvörnin tekin af
og öllum hjólum læst. Þá fór hann
nokkru lengra, eða þar til að endarnir
á afturdempurunum voru farnir að
virka eins og bremsa í snjónum.
Einhver þægilegasti bíll
sem ég hef keyrt
Hyundai Santa Fe er útbúin eins og
margir nýjir bílar með dagljósin sem
led ljós bara í framstuðara en engin
afturljós (persónulega finnst mér
þetta flott, en ég vil líka fá afturljós).
Vissulega er þetta orkusparnaður,
en frá 1986 hefur verið ljósaskylda
í umferð hér á landi og er fólk farið
að venjast þessu að ljós séu bæði
að framan og aftan. Þessi nýji led-
ljósabúnaður er bara að framan og
því engin afturljós. Töluvert er um
að fólk sem er með þennan búnað
gleymi að kveikja ljós þegar farið er
að rökkva og er þá allveg ljóslaust
að aftan og getur verið varasamt. Að
lokinni prófun verð ég að segja það
að fáir jepplingar sem ég hef keyrt
eru jafn þægilegir til aksturs og fara
vel með mann.
Miðað við verð og þægindi og
áræðanleika mæli ég hiklaust með
Santa Fe sem er með fimm ára
ábyrgð og lægstu bilanatíðni allra
bíla.
Hyundai Santa Fe. Myndir / HLJ
Ágætur í snjó þangað til að demparaendarnir að aftan fóru að virka sem
bremsa
GPS leiðsögukerfið kemur sér
örugglega vel fyrir marga.
Þegar sett er í bakkgír, kviknar á
bakkmyndavélinni
Lengd: 4.690 mm
Hæð 1.690 mm
Breidd: 1.880 mm
Þyngd: 1.807 kg
Comfort er ódýrastur 7.450.000
Style (eins og ég prófaði) 8.150.000
Premium kostar frá 8.750.000
Hægt er að færa fram og aftur farþegasætin aftur í bílnum.
Led ljósin að framan geta logað án þess að nokkur afturljós séu á bílnum
sem er viss ókostur gagnvart umferðaröryggi.