Bændablaðið - 14.08.2014, Blaðsíða 10

10 Bændablaðið | Fimmtudagur 14. ágúst 2014
Radisson Blu hótelunum á Íslandi,
Hótel Sögu og 1919, hlotnuðust
þrenn verðlaun á World Travel
Awards sem haldið var í Aþenu,
í Grikklandi þann 2. ágúst
síðastliðinn.
Ingibjörg Ólafsdóttir, hótelstýra
á Hótel Sögu, segir að verðlaunin
staðfesti gæði Yes I Can –
þjónustunnar sem hótelin leggi sinn
metnað í að veita gestum.
„World Travel Awards hafa
verið veitt árlega frá árinu 1993 en
tilgangur þeirra er að viðurkenna
og verðlauna framúrskarandi gæði
á öllum sviðum ferðaþjónustunnar
og WTA er í dag heimsþekkt
merki hótela, flugvalla og annarra
fyrirtækja í greininni.
Radisson Blu 1919 er að vinna
„Iceland´s Leading Hotel“ í sjötta
sinn en Radisson Blu Hótel Saga fékk
verðlaun sem „Iceland´s Leading
Business Hotel“ og „Iceland´s
Leading Resort“. Hótelin sem voru
tilnefnd til verðlaunanna í ár eru öll
mjög glæsileg og viðkenningin því
kærkomin og sigurinn sætur,“ segir
Ingibjörg. /VH
Fréttir
Radisson Blu á Íslandi hlýtur þrenn
World Travel Awards-verðlaun
Radisson Blu Hotel Saga.
Kokkalandslið Íslands hefur borið hróður íslenskrar matargerðar og
matvæla víða um lönd. Formlegur samstarfssamningur við Íslandsstofu
er nú í höfn. Mynd / Rafn Rafnsson
Kokkalandsliðið kynnir
íslenskan mat og matargerð
Íslandsstofa og kokkalandsliðið
hafa tekið höndum saman
og gert með sér samning um
að efla kynningu á Íslandi
sem áfangastað og íslenskum
matvælum á erlendum
mörkuðum. Samstarfið mun
tengjast markaðsverkefninu
„Ísland – allt árið“ og almennri
markaðsvinnu fyrir íslenska
ferðaþjónustu, segir á vef
Íslandsstofu.
Samkvæmt samningnum
mun kokklandsliðið taka þátt í
verkefnum tengdum komu erlendra
blaðamanna til Íslands sem og
einstökum verkefnum Íslandsstofu
á erlendum mörkuðum, líkt
og vöru- og sölusýningum.
Þá munu matreiðslumeistarar
kokkalandsliðsins veita aðgang
að uppskriftum til notkunar
í þematengdum verkefnum
tengdum Íslandi, til dæmis á
samfélagsmiðlum. Samkvæmt
samningi verður merki Inspired by
Iceland á öllu kynningarefni og á
fatnaði kokkalandsliðsins.
Ferðaþjónusta bænda:
80 til 90% nýting yfir háannatímann
Nýting á gistirýmum hjá Ferða-
þjónustu bænda hefur verið
mjög góð það sem af er árinu
enda hefur metfjöldi ferðamanna
heimsótt landið. Pöntunum á
gistinóttum beint til bænda
hefur fjölgað talsvert auk
þess sem einstaklingar bóka í
auknum mæli sjálfir í gegnum
ferðaþjónustuna.
„Bókanir hafa verið mjög góðar
í sumar og nýtingin milli 80 og 90%
yfir háannatímann,“ segir Sævar
Skaptason, framkvæmdastjóri
Ferðaþjónustu bænda. „Í dag
bjóðum við upp á 5.000 uppbúin
rúm hjá 185 aðilum um allt land
auk margs konar möguleika á
afþreyingu.“
Norðurljósin trekkja
„Nýtingin hefur verið mest frá
seinni hluta júní og út ágúst en
undanfarið höfum við orðið vör
við talsverða aukningu á haustin
og tímabilið er því að lengjast.
Á ákveðnum svæðum eins og til
dæmis í kringum Jökulsárlón er
nýtingin einnig góð á veturna og þá
sérstaklega yfir norðurljósatímann
frá áramótum og fram í apríl.“
Aukin sala á netinu
Ferðaþjónusta bænda er
hlutafélag í eigu bænda og starfar
að markaðssetningu og sölu
á þjónustu fyrir þá. Hlutverk
ferðaskrifstofunnar er einkum að
bóka gistingu fyrir einstaklinga og
hópa ásamt heildarskipulagningu á
bílaleigupökkum. Ferðaskrifstofan
er í viðskiptum við um 150
ferðaskrifstofur og ferðaheildsala
um allan heim.
Sævar segist verða var við
aukningu á því að bændur bjóði
sjálfir gistingu á netinu og að
ferðamenn bóki hana þannig. „Netið
býður upp á óþrjótandi möguleika
og auk þess sem bændur eru sjálfir
að selja gistingu í gegnum það
hefur salan hjá okkur einnig aukist
verulega. Það er enginn bundinn
af því að selja eingöngu í gegnum
okkur og margir eru í samvinnu við
fleiri en eina ferðaþjónustu.
Kosturinn við að vera hluti af
Ferðaþjónustu bænda felst meðal
annars í því að við gerum úttekt á
þjónustunni á tveggja ára fresti og
tryggjum því ákveðin gæði. Við
ábyrgjumst einnig greiðslur á öllum
bókunum sem fara í gegnum okkur
og borgum stundum fyrir fram á
vorin fyrir gistingu á komandi
sumri ef lítið er í kassanum hjá
gistisölum eftir veturinn.“
Aukin afþreying í boði
Sævar segir Ferðaþjónustu bænda
sífellt stefna að því að bæta
þjónustuna. „Viðskiptavinir okkar
koma alls staðar að og ég verð
ekki var við að þeir komi meira frá
ákveðnum löndum en öðrum.
Undanfarið hefur til dæmis orðið
mikil aukning í sölu á afþreyingu
samhliða gistingu. Göngu-
og skoðunarferðir í nágrenni
gististaðanna eru mjög vinsælar.
Við bjóðum einnig upp á pakka með
gistingu og bílaleigubíl og vinsældir
slíkra ferða hafa aukist mikið.
Auk einstaklingsbókana erum
við með stóra hópadeild sem selur
erlendum ferðaskrifstofum ferðir og
skipuleggur skoðunarferðir og aðra
afþreyingu fyrir þær,“ segir Sævar.
/VH
Sala á afþreyingu hefur aukist samhliða gistingu. Göngu- og skoðunar-
ferðir í nágrenni gististaðanna eru mjög vinsælar.
Norðurland vestra:
Unnið að gerð Fuglastígs
Undanfarnar vikur hefur
Selasetrið á Hvammstanga leitt
verkefni um gerð fuglastígs á
Norðurlandi vestra fyrir hönd
Ferðamálasamtaka Norðurlands
vestra.
Markmið verkefnisins er að
undirbúa uppbyggingu fugla-
skoðunarstíga á Norðurlandi
vestra þar sem ferðamönnum er
auðveldað aðgengi að hinum ýmsu
fuglaskoðunarstöðum víðs vegar um
landshlutann.
Ellen Magnúsdóttir líffræðingur
var ráðin til verksins og hefur frá
því í byrjun júní skoðað vænlega
fuglaskoðunarstaði í landshlutanum
og kortlagt tegundir á hverjum stað.
Á vef Selasetursins segir að verki
hennar sé við það að ljúka og í
framhaldinu muni
verða gert kort af
stöðunum ásamt
því að sett verði
upp heimasíða fyrir
stíginn.
V e r k e f n i ð
er liður í eflingu náttúrutengdrar
ferðaþjónustu á svæðinu og er það
samstarfsverkefni Selasetursins,
Ferðamálafélags V-Hún.,
Ferðamálafélags A-Hún., Félags
ferðaþjónustunnar í Skagafirði,
Ferðamáladeildar Háskólans á
Hólum og Náttúrustofu Norðurlands
vestra. Verkefnið hófst formlega í
lok síðasta árs og verður fyrsta
áfanga lokið í lok árs.
Verkefnið hlaut styrk frá
Vaxtarsamningi Norðurlands vestra.
Landeigendur í Vogum í Mývatnssveit takmarka aðgengi að Grjótagjá:
Hætta á grjóthruni og slæm
umgengni ferðafólks
Fyrirhugað er að hefja fram-
kvæmdir til að bæta mjög aðstöðu
á svæðinu við Grjótagjá í landi
Voga í Mývatnssveit.
Landeigendur gripu til þess ráðs
nýverið að banna böðun og loka hluta
svæðisins fyrir almennri umferð. Það
var, að sögn Jóhanns F. Kristjánssonar
formanns Landeigendafélags Voga,
gert annars vegar vegna hættu á
grjóthruni í gjánni og hins vegar var
umgengni á svæðinu mjög slæm.
Hann segir landeigendur telja sig í
fullum rétti til að takmarka aðgengi að
gjánni, en vonandi sé um tímabundna
aðgerð að ræða.
„Fólk hefur sótt í Grjótagjá í marga
áratugi og við landeigendur höfum
ekki haft neitt við það að athuga,“ segir
hann. Til aðgerða var hins vegar gripið
vegna hættu á grjóthruni og talið að
baðgestir væru í hættu af þeim sökum.
Borið hefur á því að menn hamist ofan
á gjánni og því fylgir hætta á að grjót
hrynji ofan í hana og yfir baðgesti.
Ekki hafa þó enn orðið slys á fólki af
þeim sökum.
Landeigendur hafa brugðist við
þessu ástandi með því að setja upp
skilti þar sem takmarkanir eru lagðar
á umferð um svæðið og baðferðir í
Grjótagjá. „Það hefur skilað árangri,
átroðningur hefur snarminnkað.“
Aukin umferð fylgir verri
umgengni
Getið er um Grjótagjá í landi Voga
á vefsíðum eins og Trip Advisor
og eðlilega hafa ferðalangar áhuga
á að skoða hana. Aukinni umferð
hefur fylgt slæmur umgangur og
segir Jóhann að mjög hafi borið á
bjórdósum og brotnum flöskum,
pappír sem og öðru almennu rusli.
„Það segir okkur að fólk er að fara
ofan í á kvöldin og um nætur og hefur
þá gjarnan áfengi um hönd. Það kann
ekki góðri lukku að stýra, menn þurfa
að vera allsgáðir þarna ofan í og sýna
fyllstu aðgát,“ segir hann.
Önnur náttúrugjá er einnig á
svæðinu, Vogagjá, og hefur fólk sótt
töluvert í hana. „Það hefur aldrei
staðið til að almenningur væri að baða
sig í þeirri gjá, aðgengi að henni er
stórhættulegt, snarbratt ofan í hana
og ekki á allra færi að fikra sig þar
niður. Við höfum reynt að setja þar
upp girðingar síðustu vikur en þær
eru rifnar upp jafnóðum og bannskilti
fjarlægð,“ segir Jóhann. „Við höfum
grun um hverjir hafa verið þar að verki
en getum ekki annað en vonast til að
þeir sjái að sér og virði tilraunir okkar
til að koma í veg fyrir slys.“
Framkvæmdir fyrirhugaðar í haust
Landeigendur bættu aðstöðu á svæðinu
síðasta sumar, en á komandi hausti
er ætlunin að halda framkvæmdum
áfram, svo það beri þann fjölda sem
inn á það sækir. Fyrst þarf þó að klára
og fá samþykkt deiliskipulag. Óljóst
er að sögn Jóhanns hvort sótt verður
um styrki vegna framkvæmda eða
tekin upp gjaldtaka í einhverju formi.
Raunar hugnist mönnum sú leið ekki,
en vera megi að það sé eina færa
leiðina til að standa undir aukinni
ásókn og kostnaði sem fylgir.
Ólíkir hagsmunir togast á
„Það getur farið svo að við neyðumst
til að taka upp gjaldtöku inn á
svæðið, ef við t.d. verðum að koma
upp eftirliti eða vakt,“ segir Jóhann.
Aðilar að Landeigendafélagi Voga
í Mývatnssveit eru fimm lögbýli
og einstaklingar, blandaður hópur,
bændur sem stunda búskap eða
ferðaþjónustu og eins aðilar sem
hvorki stunda búskap á jörð sinni né
ferðaþjónustu. „Þarna togast á ólíkir
hagsmunir og því eru mismunandi
sjónarmið uppi. Vandi af þessu tagi á
að mínu mati eftir að aukast á næstu
misserum og bændur, landeigendur
og sveitarfélög verða að ræða
hvernig best er að bregðast við,“
segir hann. /MÞÞ