Ljóðormur - 01.12.1990, Side 9

Sigfus Daðason
7
Og þykjast að sönnu þekkja
allra átta skil.
Hitta óvörum í tvísýnur
treysta þá ekki ratvísi sinni
tortryggja kunnuglega spegilmynd sína
og ber af leið
langt út fyrir sjálfselskumiðið.
Festa um sinn sjónir
við óvissubólstra
áræða ekki að hnýsast
um annað farsumar
né hirða framar að hlusta
eftir hreinu bergmáli.
En hljóta að leggja háa brú
milli meginlanda
handa þeim lofðungum
sem ráða stórum ráðum
og hafa einsett sér
að taka loks duglega í taumana.
* * *
En farfugla-félagslegur maður þá
athugull og ófreskur
peningaskyggn prúður
einn og margur
með ekkisinn sakleysingjasvip
og á sér ekki ills von
að hagstæðum hofferðum loknum:
hann er þegar byrjaður að telja tölur
fyrir æðri sjónum nokkuðsvo voldugs ráðherra
sem siglir óðfara undan
mikla sigling á margföldunartöflunni stóru
hróðugur alsæll og ábyrgðarfullur
á útlíðandi morgni.