Ljóðormur - 01.12.1990, Side 39

Jón frá Pálmholti 37
Jón frá Pálmholti
Viðtal
„Ég hugsa og þessvegna er ég til“
Dcscartes
Á ferð minni um hringveg fljótsins
reyni ég að fanga hugsanir mínar
á öruggum stað í tryggu skjóli
svo þær fljúgi ekki burt
útá víðáttur gleymskunnar.
Þér sem inni bíður í þögn
vil ég bjóða út til mín
að hlusta með mér á söng daganna.
Leggir þú eyra við erindi þeirra
geturðu kannski brotist út
úr einangrun vanans og tekið undir
söng okkar hinna meðan ferðin heldur áfram.
En sumt verður aldrei sagt
og oít komum við að lokuðum dyrum.
Hversu undarlegt sem það er
kjósa margir að þegja.
Ef þú aðeins vissir
hve söngur tímans er lifandi
kæmirðu strax í dag
að dansa við undirleik öldunnar
sem vaggar móðurskipinu í takt
við lifandi söng okkar mannanna
sem enn vitum fátt hver um annan.
Ég er til og þessvegna hugsa ég.
Þessvegna hugsa ég og syng
og reyni að finna þinn hug í mér
og reyni að skynja minn hug í þér
meðan við siglum niður fljótið.
Söngurinn er ævinlega gamall
en ævinlega nýr þegar við hlustum.