Morgunblaðið - 28.03.2017, Blaðsíða 10

10 FRÉTTIRInnlent
MORGUNBLAÐIÐ ÞRIÐJUDAGUR 28. MARS 2017
Guðni Einarsson
gudni@mbl.is
HB Grandi ætlar að hætta botnfisk-
vinnslu á Akranesi. Botnfiskvinnslan
þar verður sameinuð vinnslu félags-
ins í Reykjavík. Útlit er fyrir tap af
landvinnslu botnfisks og er fyrir-
tækið að bregðast við því. HB Grandi
hefur hafið samráð við trúnaðarmenn
stéttarfélaga starfsmanna vegna
þessara breytinga og þess sem þær
kunna að þýða fyrir starfsfólkið.
Í tilkynningu síðdegis í gær sagði
HB Grandi að á Akranesi störfuðu nú
270 manns hjá samstæðu félagsins.
Þar af vinna 93 við botnfiskvinnsluna.
Auk hennar rekur félagið skipaverk-
stæði, fiskimjölsverksmiðju, loðnu-
vinnslu og tvö dótturfyrirtæki, Norð-
anfisk og Vigni G. Jónsson, á
Akranesi. Stefnt er að frekari upp-
byggingu og eflingu þess rekstrar á
Akranesi, að sögn forsvarsmanna
HB Granda. Nú er hvorki hafn-
araðstaða né aðstaða til vinnslu alls
botnfiskafla ísfisktogara HB Granda
á Akranesi. Forsvarsmenn félagsins
og Akranesbæjar eiga í viðræðum
um mögulegar breytingar á því, að
sögn HB Granda.
Lakar horfur í botnfiskvinnslu
Fyrirtækið greindi frá því í gær-
morgun að rekstrarhorfur fyrir botn-
fiskvinnslu hefðu ekki verið lakari í
áratugi en nú. HB Grandi ætlar því
að draga verulega úr eða hætta kaup-
um á botnfiski á fiskmarkaði. Í fyrra
voru unnin 28 þúsund tonn af þorski,
ufsa og karfa í fiskvinnslum HB
Granda í Reykjavík og á Akranesi.
Þar voru fjögur þúsund tonn af ufsa
og þorski keypt af öðrum útgerðum
og á fiskmarkaði.
Vilhjálmur Vilhjálmsson, forstjóri
HB Granda, sagði í svari til Morg-
unblaðsins að ástæðan fyrir tapi á
botnfiskvinnslu væri fyrst og fremst
hátt gengi íslensku krónunnar og
kostnaðarhækkanir innanlands.
Hann sagði að afurðaverð hefði lítið
breyst undanfarin tvö ár.
Áætlað er að unnið verði úr um 24
þúsund tonnum af botnfiski í land-
vinnslu hjá HB Granda á þessu ári.
Vilhjálmur sagði að það eitt og sér að
hætta að kaupa botnfisk á markaði
mundi væntanlega ekki hafa áhrif á
starfsmannafjölda.
Hefur ekki áhrif á rekstur nýju
ískfisktogaranna
HB Grandi hefur látið smíða þrjá
nýja ísfisktogara. Þessi ákvörðun nú
mun ekki hafa áhrif á rekstur nýju
skipanna, að sögn Vilhjálms. Engey
RE fer væntanlega til veiða í lok apr-
íl, Akurey AK í ágúst og Viðey RE í
byrjun næsta árs.
HB Grandi gerir einnig út þrjá
frystitogara. Vilhjálmur sagði að
kostnaðarhækkanir í íslenskum
krónum kæmu síður við frystitog-
arana. Stærsti útgjaldaliðurinn í
rekstri þeirra væri launakostnaður
sem fylgdi gengi og fiskverði, öfugt
við t.d. launakostnað í landi.
Hættir botnfiskvinnslu á Akranesi
 HB Grandi segir útlit fyrir tap af landvinnslu botnfisks  Hátt gengi krónu og innlendar kostn-
aðarhækkanir ástæðan  93 vinna við botnfiskvinnsluna á Akranesi  Samráð við trúnaðarmenn
Morgunblaðið/Ómar
Akranes Nú vinna 93 við botnfiskvinnslu HB Granda í bænum. Hún verður
sameinuð vinnslunni í Reykjavík. Stefnt er að eflingu dótturfyrirtækja.
Uppnám varð í skákheiminum í gær
þegar frétt birtist á vef Alþjóðaskák-
sambandsins, FIDE, um að Kirsan
Iljúmsjínov hefði sagt af sér embætti
forseta sambandsins.
Nigel Freeman, framkvæmda-
stjóri FIDE, staðfesti þetta við vef-
inn Chess.com en Berik Balgabajev,
aðstoðarmaður Iljúmsjínovs, sagði
hins vegar að þetta væru falskar
fréttir. Og rússneska fréttastofan
TASS hafði eftir Iljúmsjínov að
stjórn FIDE hefði viljað bola honum
út en það hefði ekki tekist. „Ég hef
ekki skrifað undir neitt og ég ætla
ekki að segja af mér. Ég held að
Bandaríkjamenn séu með puttana í
þessu, ætli það megi ekki kalla þetta
fyrirsát.“ Þegar Balgabajev var
spurður hvers vegna umrædd til-
kynning hefði birst á vef FIDE svar-
aði hann: „FIDE er stór samtök.“
Gunnar Björnsson, forseti Skák-
sambands Íslands, hafði í gær ekki
fengið nánari upplýsingar um hvað
væri að gerast innan stjórn FIDE.
Umdeildur
Iljúmsjínov var fyrst kjörinn for-
seti FIDE árið 1995, en hann var þá
forseti rússneska lýðveldisins
Kalmykíu. Hann hefur verið um-
deildur í embætti, m.a. vegna yfirlýs-
ingar árið 1997 um að hann hefði átt
fund með geimverum. Ekki bætti úr
skák þegar bandaríska fjármála-
ráðuneytið setti hann á lista yfir þá
sem beita ætti efnahagslegum refsi-
aðgerðum fyrir að aðstoða ríkis-
stjórn Sýrlands við að kaupa olíu af
hryðjuverkasamtökunum Íslamska
ríkinu. Í kjölfarið vék Iljúmsjínov
tímabundið úr embætti forseta
FIDE en staða hans hefur verið
óljós síðan og hann hefur komið fram
sem forseti FIDE við opinber tæki-
færi þótt hann taki ekki með beinum
hætti þátt í rekstri samtakanna.
Iljúmsjínov kom til Íslands árið
2015 og var viðstaddur setningu
Reykjavíkurskákmótsins. Hann
tefldi einnig eina hraðskák við Frið-
rik Ólafsson, fyrrverandi forseta
FIDE.
FIDE tilkynnti
afsögn Kirsans
 Forsetinn segist
ekki hafa sagt af sér
Morgunblaðið/Árni Sæberg
Hraðskák Friðrik Ólafsson og
Iljúmsjínov tefldu hraðskák.
Hamraborg 10, Kópavogi – Sími: 554 3200
Opið: Virka daga 9.30-18 Laugardaga 11–14
GOTT ÚRVAL
AF UMGJÖRÐUM
Verið velkomin til
okkar í sjónmælingu
Jón Birgir Eiríksson
jbe@mbl.is
„Fólk er slegið yfir þessu. Við lent-
um í svipuðum uppsögnum árið
2008, en þá voru starfandi hér hátt í
hundrað manns. Þá var öllum sagt
upp nema um 25 starfsmönnum,“
segir Jóhann Þór Sigurðsson, trún-
aðarmaður starfsfólks HB Granda
á Akranesi, um að botnfiskvinnslu á
Akranesi verði hætt. Að hans sögn
voru flestir þöglir á starfsmanna-
fundi fyrirtækisins í gær.
40% hjá Granda í yfir 25 ár
Hann segir starfsfólkið sem um
ræðir vera á öllum aldri, en fátt af
því komist brátt á eftirlaunaaldur.
Um 40% þess hafa starfað í fyrir-
tækinu í yfir 25 ár og flestir eru
starfsmennirnir Íslendingar. Einn-
ig starfar í vinnslunni þónokkur
fjöldi útlendinga. Um 80% eru kon-
ur.
Hann segir að fyrir nokkrum ár-
um hafi staðið til að efla vinnsluna.
„Mér finnst sá keimur af þessu að
þetta hafi verið að byggjast upp á
einhverjum árum. Fyrir u.þ.b.
þremur árum stóð til að bærinn
færi í uppbyggingu og uppfyllingar
í höfninni. Svo hefur það dregist á
langinn. Þá voru hugmyndir um að í
framtíðinni gæti öll þeirra vinnsla
verið hér,“ segir hann og bætir við
að málið lykti þannig að það hafi
ekki komið nógu skýr svör frá bæn-
um.
Leita skýringa á uppsögnum
Vilhjálmur Birgisson, formaður
Verkalýðsfélags Akraness, segist
enga trú hafa á að samráðsferli
stéttarfélaga og atvinnurekandans
skili árangri. Frekari skýringa
verði þó krafist á uppsögnunum.
„Þetta er fyrirtæki sem hefur
verið starfrækt hér í þessu tiltekna
húsi frá árinu 1906 og hefur lifað
gegnum tvær heimsstyrjaldir. Það
er dapurlegt til þess að vita að
fyrirkomulag á stjórn fiskveiða
skuli leggja fyrirtækið að velli í
ljósi þess að það hafði burði til að
lifa af tvær styrjaldir,“ segir hann.
„Fólk er slegið yfir þessu“
 Starfsfólk Granda þögult í gær  Lítil trú á lausn vandans
Morgunblaðið/Helgi Bjarnason
Þorskur Starfsfólkið sem missir
störfin starfar við botnfiskvinnslu.
Jón Birgir Eiríksson
jbe@mbl.is
„Það er reiðarslag fyrir bæjarfélag
eins og okkar, verði af þessum
áformum,“ segir Sævar Freyr Þrá-
insson, bæjarstjóri á Akranesi, um
áform HB Granda um að hætta þar
botnfiskvinnslu.
Hann segir bæjaryfirvöld munu
gera það sem þau geti til að skapa
góða aðstöðu við höfnina, en bæj-
aryfirvöld munu funda með tals-
mönnum fyrirtækisins á næstu dög-
um um úrbætur í Akranesshöfn.
„Við erum tilbúin að sýna því
skilning að þeir vilji hafa vinnsluna á
einum stað en viljum tryggja að það
verði á Akranesi. Við erum þeirrar
skoðunar að það sé allt til alls hér á
Akranesi þegar við höfum klárað
með þeim það sem þeir þurfa til að
geta byggt þetta upp hér. Við erum
tilbúin að gera
það sem þarf til
að svo geti orðið,“
segir Sævar
Freyr.
„HB Grandi er
stórt og mik-
ilvægt fyrirtæki
fyrir bæj-
arfélagið. Á
Grandagarði, þar
sem fyrirtækið er
nú, er hægt að taka aflann beint úr
skipunum og inn í fiskvinnsluhús.
Þetta er það sem nútímafiskvinnsla
snýst um og við erum tilbúin að
tryggja að þeir hafi aðstöðu til að
gera það nákvæmlega sama á Akra-
nesi,“ segir hann.
„Í Reykjavík horfa þeir upp á
gríðarlegar þrengingar til framtíðar
sem gera þeim erfitt um vik að halda
vinnslunni uppi,“ segir Sævar Freyr.
Reiðarslag fyrir bæinn
 Fundað um úrbætur við höfnina
Sævar Freyr
Þráinsson