Gerðir kirkjuþings - 01.01.2016, Blaðsíða 15

15
1. mál kirkjuþings 2016
Flutt af kirkjuráði
Skýrsla kirkjuráðs
Inngangur
Biskup Íslands, Agnes M. Sigurðardóttir, er forseti kirkjuráðs lögum samkvæmt. Auk
biskups sitja í ráðinu fjórir fulltrúar kjörnir af kirkjuþingi til fjögurra ára, tveir leikmenn
og tveir guðfræðingar. Hinir kjörnu kirkjuráðsmenn og varamenn þeirra sitja allir
á kirkjuþingi en kirkjuráð var kosið á síðasta kirkjuþingi til fjögurra ára. Þeir eru sr.
Elínborg Gísladóttir, sóknarprestur í Grindavíkur-prestakalli, Kjalarnesprófastsdæmi,
sr. Gísli Gunnarsson, sóknarprestur í Glaumbæjarprestakalli, Húnavatns- og Skaga-
fjarðar prófastsdæmi, Stefán Magnússon, bóndi í Fagraskógi og Svana Helen
Björnsdóttir, rafmagnsverkfræðingur og framkvæmdastjóri. Varamenn í kirkjuráði eru
Drífa Hjartardóttir bóndi, Einar Karl Haraldsson framkvæmdastjóri, sr. Geir Waage
sóknarprestur í Reykholtsprestakalli, Vesturlandsprófastsdæmi og sr. Gísli Jónasson
prófastur og sóknarprestur Breiðholtsprestakalli, Reykjavíkurprófastsdæmi eystra.
Starfsemi kirkjuráðs
Almennt
Um störf kirkjuráðs fer eftir lögum um stöðu, stjórn og starfshætti þjóðkirkjunnar nr.
78/1997 svo og starfsreglum um kirkjuráð nr. 817/2000. Þar er kveðið á um verkefni
kirkjuráðs sem fer með framkvæmd þeirra sameiginlegu verkefna þjóðkirkjunnar sem
lög og stjórnvaldsreglur ætla því og erinda sem vísað er til þess, m.a. af hálfu kirkjuþings,
prestastefnu, samtaka leikmanna, ráðherra og Alþingis. Kirkjuráð undirbýr kirkjuþing í
samráði við forseta þingsins og forsætisnefnd. Þá undirbýr ráðið þingmál sín og veitir
kirkjuþingsfulltrúum sem þess óska aðstoð við framsetningu þingmála. Kirkjuráð
annast almennt framkvæmd ákvarðana þingsins ef annað er ekki ákveðið af kirkjuþingi.
Kirkjuráð hefur yfirumsjón með fjármálum og fasteignamálum þjóðkirkjunnar og fer með
stjórn Jöfnunarsjóðs sókna, kirkjumálasjóðs og kristnisjóðs. Ráðið úthlutar úr sjóðunum
á grundvelli umsókna og fjárhagsáætlana stofnana. Í fjármálaumsýslunni felst m.a. að gera
fjárhagsáætlanir og fjárlagatillögur og árita ársreikninga þeirra sjóða sem ráðið stýrir og
leggur fram á kirkjuþingi.
Kirkjuráðsfundir
Kirkjuráð heldur fund að jafnaði einu sinni í mánuði á biskupsstofu og á þessu starfsári
(kirkjuþingsárinu) hefur ráðið haldið fimmtán reglulega fundi á starfsárinu auk tveggja
aukafunda. Forseti kirkjuþings situr fundi kirkjuráðs þegar málefni kirkjuþings eru til
umfjöllunar. Vígslubiskupar sitja fundi ráðsins þegar málefni biskupsstólanna eru til
umfjöllunar.