Litli Bergþór - 01.12.2016, Page 3

Litli-Bergþór 3
Formannspistill
Þá er veturinn genginn í garð og líður senn að jólum.
Verandi búsettur í öðru landi, fær maður smám saman nýja sýn á lífið
í kring um sig. Maður fær að kynnast nýjum siðum, reynir að temja
sér suma, en aðra lætur maður alveg eiga sig. Maður er líka sífellt að bera allt saman við Ísland og
Íslendinga og spá í hvað við myndum gera öðruvísi heima. Oftast er maður í þeirri trú að allt sé best
sem kemur frá Íslandi, hvort sem það er nú rétt eða ekki. En allavega held ég að allir hafi gott af því
að víkka sjóndeildarhringinn og kynnast öðrum þjóðum og siðum.
Eitt er þó það, sem er allsstaðar til í jafn miklum mæli. Sama hvar maður kemur þá finnur maður fyrir
því. Það er stressið. Allir að flýta sér og keppast við að gera sem mest á sem stystum tíma. Og að
sjálfsögðu spilar maður með og hrærist í þessum stressaða heimi.
Það er því mikilvægt að að ná sér niður á jörðina inn á milli til að fara hreinlega ekki yfirum og jólin
eru fyrir flesta góður tími til að leyfa sér að slaka á. Taka sér frí frá daglega stressinu. Eða það ætla
ég að minnsta kosti að gera...
Lesendum og félagsmönnum öllum óska ég gleðilegra jóla og farsældar á nýju ári með þökk fyrir árið
sem er að líða.
Smári Þorsteinsson formaður Umf. Bisk.