Skessuhorn - 15.04.2015, Blaðsíða 22

22 MIÐVIKUDAGUR 15. APRÍL 2015
Þriðja sería af sjónvarpsþáttaröð-
inni Hið blómlega bú hefur göngu
sína á Stöð 2 sunnudagskvöldið 19.
apríl næstkomandi. Í þáttaröðinni
fer kokkurinn Árni Ólafur Jóns-
son úr stórborginni New York og
sest að í Árdal í Borgarfirði. Í fyrstu
þáttarröðinni hefur Árni kokkur
búskap og kynnist ræktunarleiðum
og helstu störfum bænda. Í annarri
seríu sem gerist yfir vetrartímann
upplifir áhorfandinn jólastemningu
í Borgarfirði, vetrarlífið og hátíð-
armat. „Nú er þriðja þáttarröðin
á lokametrum framleiðslu og sem
fyrr leitar Árni á náðir heimamanna
og kannar matarkistu Vesturlands.
Í þetta sinn fer hann vítt og breytt
um Vesturlandið,“ útskýrir Bryndís
Geirsdóttir framleiðandi þáttanna í
samtali við Skessuhorn.
„Við erum fáliðuð og tökum okk-
ur góðan tíma í vinnsluna, þetta er
hvorki hraðsoðið né niðursoðið og
það er forsenda þess að þáttarfram-
leiðslan gengur upp. Við erum að
klára klippingu og upptökur á tón-
list fyrir átta þátta seríu sem verð-
ur frumsýnd 19. apríl. Það er mikið
lagt upp úr tónlistinni sem er nær
öll samin, útsett og tekin upp í stof-
unni í Árdal. KK hefur séð um tón-
listina fyrir þættina frá upphafi. Það
hefur verið ofsalega gaman að vinna
með honum, hann er svo lunk-
inn lagasmiður. Stundum vörpum
við einhverri stemningu eða gef-
um mynd af framvindu og hann
býr til tónmál úr því. Það er eins
og hann grípi orðin sem við setj-
um fram í rýmið og svari með tón-
list. Það er alveg merkilegt að fylgj-
ast með hvernig einmitt réttu tón-
arnir verða til. Kristján er einhvern
veginn ólgandi brunnur stemning-
ar og stílbrigða. Ég vona að það
slæðist eitt lag eða tvö lög með úr
þessu samstarfi á nýju plötuna hans.
Það væri nú eitthvað alveg magn-
að,“ segir Bryndís. Hún segir einn-
ig að það sé sérstakt að tónlist leiki
svo stórt hlutverk í matreiðsluþætti
og KK ljái þáttunum einkennandi
blæ.
Ekki hafa allir
mjólkað kýr
Þriðja þáttaröðin gerist um sumar-
tímann og í henni fær áhorfandinn
að fylgjast með Árna kokki kynnast
nýjum stöðum á Vesturlandi. Hann
fer meðal annars í Dalina og á Snæ-
fellsnes, tekur þátt í Rabarbarahát-
íð í Reykholti og í Hvanneyrarhá-
tíðinni þar sem 125 ára afmæli
skólahalds á Hvanneyri var fagn-
að síðasta sumar. „Þegar að elda-
mennskunni kemur skoðum við
alltaf grunnframleiðsluaðferðir á
hráefninu og sækjum aðföng í nátt-
úrulegt umhverfi. Það hefur verið
sérlega gefandi að rækta matjurta-
garð og ala búfénað í Árdal. Einn-
ig hefur verið ótrúlega skemmtilegt
að heimsækja fólk á Vesturlandi og
kynnast verkefnum þess. Í þriðju
seríunni hittum við fyrir bænd-
ur og sjómenn sem fyrr, en einn-
ig eldsmið, steinhleðslumeistara og
keramiklistafólk og sjáum hvernig
störf þeirra tengjast eldamennsku,“
segir Bryndís glaðlega. „Brennandi
áhugi Árna á góðum mat leiðir hann
áfram í leitinni að úrvals hráefni og
spennandi úrvinnslu. Það eru alls
ekki allir sem eiga kost á að upplifa
það að fara út á sjó eða mjólka kýr
og sumir hafa ekki einu sinni sett
niður kartöflur. Kannski má þakka
hluta af vinsældum Hins blómlega
bús hjá svo breiðum hópi, því að
fólk getur svo auðveldlega sett sig
í spor Árna, sem oftar en ekki er að
gera hlutina í fyrsta skipti sjálfur.
Störf sem eru kannski hversdagsleg
á Snæfellsnesi geta þótt framandi í
Borgarfirði þótt ekki sé lengra far-
ið.“
Sala sýningarréttar
næstu skref
Árni Ólafur Jónsson, Guðni Páll
Sæmundsson auk Bryndísar eiga
framleiðslufyrirtækið Búdrýgindi
sem framleiðir þættina Hið blóm-
lega bú. „Við í Búdrýgindum erum
að fara yfir hvaða leiðir eru færar í
markaðssetningu erlendis. Núna er
reyndar ósköp mikið að gera í að
klára þriðju seríuna en þegar því
verki lýkur verður sest niður og far-
ið yfir framtíðaráformin. Við höf-
um hug á að selja sjónvarpsstöðvum
á Norðurlöndun, Englandi, Þýska-
landi, Frakklandi, Hollandi og Ít-
alíu sýningarrétt að þáttunum og
kannski seilumst við jafnvel lengra
út í heim. Vonandi geta svo sýn-
ingar á Hinu blómlega búi erlendis
orðið smáframleiðendum að gagni
sem og þeim sem vilja byggja upp
býlin sín og útveg. Við höfum haft
að leiðarljósi að fjalla aðeins um það
sem okkur finnst mjög áhugavert
og heillandi. Við höfum líka fundið
að það skilar sér til áhorfandans. Ég
tel það helstu ástæðuna fyrir því að
þátturinn hefur notið hylli að við
höfum hitt á svo frábæra aðila sem
eru að gera spennandi hluti hér á
Vesturlandi,“ segir Bryndís.
Vesturland er
Gósenland
Matreiðslu- og lífstílsþættir eins og
Hið blómlega bú eru vinsælt sjón-
varpsefni og það er þekkt að þeir
sem fjallað er um í þáttum finni
fyrir uppsveiflu og auknum áhuga
í kjölfar svo víðtækrar kynningar á
starfseminni.
„Markaðssetning á Hinu blóm-
lega búi erlendis hefur einnig mik-
ið auglýsingagildi fyrir Vesturland
og allar íslenskar afurðir. Ísland er
mjög spennandi land fyrir marga
eins og vaxandi ferðamannastraum-
ur ber glöggt vitni um. Nú er sífellt
rætt um mikla fjölgun ferðamanna á
Íslandi og oft tekið fram að nú verði
að jafna álagið og beina straumnum
á ný svæði. Þar hefur Vesturland
komið sterkt inn. Á Suðurlandi er
álagið nú orðið svo mikið víða að
menn hafa ekki undan og tekjurn-
ar skila sér ef til vill ekki nægilega
vel til byggðanna. Mér finnst skipta
mjög miklu máli að Vestlendingar
skoði vel hvernig þeir ætla að byggja
upp og standa að þessum gestakom-
um. Ég vona að okkur beri gæfa til
að nýta þessa miklu tekjumöguleika
til að styrkja innviðina, byggja upp
stoðir sem standa langt til fram-
tíðar og lúta ekki bara skammtíma
hagsmunum í „einhverskonar túr-
isma“. Við verðum að vera meðvit-
uð um að við höfum svo mikið um
það að segja hvernig staðið er að
ferðamálunum. Það verður að hlúa
að því besta og rækta það. Vestur-
land býr að magnaðri fjölbreytni í
aðföngum, bæði úr sjó og af landi.
Vesturland er Gósenland fyrir mat-
arhandverk og einnig listsköpun.
Vitbrigði Vesturlands og gróskan í
kringum þau samtök eru gott dæmi
um möguleika svæðisins. Margir
sem ólust hér upp sækja í að koma
aftur heim að námi loknu og það er
mikils virði,“ segir Bryndís og bæt-
ir við: „Sömuleiðis er mikill áhugi
neytenda á hreinum og vistvænum
mat og að rekjanleiki vörunnar sé
mikilvægur. Margir neytendur eru
einnig upplýstari og fróðleiksfús-
ari, þar eru möguleikar fyrir Vest-
urland. Þesskonar markhópur er
verðmætur því hann er líklegur til
að dvelja lengi á svæðinu og njóta.
Það ætti að vera eftirsóknarvert. Að
móta stefnu og vita hvers konar líf
við viljum á Vesturlandi á að vera
stóra spurningin.“
Tilnefnd til Eddunnar
Þættirnir um hið blómlega bú hafa
hlotið mikið lof og báðar fyrri
þáttaraðir fengið tilnefningar til
Eddu verðlaunanna. Það er mikil
viðurkenning fyrir gæði efnisins að
komast í úrslit fimm bestu menn-
ingar- og lífstílsþátta á Íslandi á
Eddunni 2014 og aftur í hóp fimm
bestur lífstílsþátta Eddunnar 2015.
„Við vorum auðvitað mjög lukkuleg
að fá tilnefningu til Eddunnar. Það
eru framleiddir svo margir góðir
þættir í þessum flokki. Fyrra árið
voru 28 þættir um hituna og Hið
blómlega bú valið í fimm þátta úr-
val - og við brostum hringinn. Það
er mikilvægt fyrir okkur að finna
og fá staðfestingu á að við náum
til fólksins og að fagfólk telji þætt-
ina með þeim bestu. Stuðningur
Menningarsjóðs Vesturlands hefur
einnig verið okkur mikil virði, ekki
síst sem viðurkenning á menning-
argildi Hins blómlega bús,“ segir
Bryndís og glögglega má heyra að
verkefnið er henni hjartfólgið.
Skemmtilegasta
hark í heimi
Aðspurð út í hvernig gangi að reka
sitt eigið framleiðslufyrirtæki á Ís-
landi segir Bryndís það vera mikið
ævintýri og oft á tíðum mjög krefj-
andi. „Það hefur verið mjög krefj-
andi að leita styrkja, ekki síst því
framleiðslan sjálf er mikil vinna. Ef
okkur hefði gengið svona vel með
fyrstu þáttaröðina á stærri mark-
aði, þá hefði það auðveldað fram-
haldið til muna, fjármögnun hefði
verið léttari og það hefði létt álag-
ið á teyminu. En í svona litlu landi
verður maður alltaf að leggja sig
allan fram. Umfjöllunarefni þátt-
arins kallar á langt tökutímabil og
fjármögnunin hefur verið erfið. Við
hefðum varla staðið í þessu nema af
því við teljum það eiga erindi. Þetta
er sífellt hark, en líklegast eitthvert
skemmtilegasta hark í heimi,“ segir
hugsjónakonan Bryndís Geirsdótt-
ir að lokum.
eha
Ljósm: Guðni Páll Sæmundsson og
Bryndís Geirsdóttir.
Enn er blómlegt í Árdal og þriðja þáttaröðin fer senn í loftið
Þremenningarnir sem standa að Búdrýgindum, framleiðslufyrirtæki Guðna Páls Sæmundssonar, Bryndísar Geirsdóttur og
Árna Ólafs Jónssonar. Ljósm. gps.
KK að taka upp tónlistina fyrir þættina í stofunni í Árdal. Ljósm. gps.
Árni kynntist sjávargróðri og skelfiski hjá Símoni Sturlusyni í Stykkishólmi. Hér
skoða þeir stórþara. Ljósm. gps.
Við upptökur á þáttunum. Hér heimsækir Árni Sigríði Erlu Guðmundsdóttur
keramiklistakonu í Leir 7 í Stykkishólmi. Ljósm. bg.
Frá Hvanneyrarhátíðinni sumarið 2014 þar sem fagnað var 125 ára afmæli
skólahalds á Hvanneyri. Ljósm. gps.