Bændablaðið - 07.07.2016, Blaðsíða 25

25Bændablaðið | Fimmtudagur 7. júlí 2016
Ungir og gamlir Hvanneyringar koma saman:
Hvanneyrarhátíðin
haldin um næstu helgi
Hvanneyrarhátíðin 2016 fer fram
þann 9. júlí nk. frá kl. 13.30 til
17.00. Þennan dag taka heima-
menn vel á móti gestum og gang-
andi með fjölbreyttri dagskrá fyrir
alla fjölskylduna.
Upphaf hátíðarinnar má rekja til
Safnadagsins sem Landbúnaðarsafn
Íslands tók þátt í, og bauð þá
velunnurum sem og gömlum
nemendum að koma á Hvanneyri og
kíkja á safnið sér að kostnaðarlausu
og hitta gamla félaga og vini. Nú
hefur Safnadagurinn verði færður
fram í maí og Hvanneyrarhátíðin
stendur nú sem sér viðburður
sem hefur vaxið fiskur um hrygg
undanfarin ár og fjöldi gesta
margfaldast á milli ára.
„Hátíðin fer fram að mestu leyti
á gömlu bæjartorfunni svokölluðu
sem var friðlýst í fyrra við hátíðlega
athöfn. Þetta er í þriðja sinn sem
hátíðin er haldin með þessum
hætti og er að öllu leyti skipulögð
og framkvæmd af heimamönnum
sem vilja bjóða gestum að njóta
skemmtilegrar dagskrár í fallegu
umhverfi á Hvanneyri,“ segir
Bára Sif Sigurjónsdóttir, ein af
skipuleggjendum hátíðarinnar í ár.
130 ára saga skólasamfélagsins
á Hvanneyri
Saga íslensks landbúnaðar,
bændaskólans og Hvanneyrar
er samtvinnuð og mikilvæg í
búnaðarsögu landsins og er henni
gerð góð skil í Landbúnaðarsafninu
á Hvanneyri. Tenging fyrrverandi
nemenda Bændaskólans við
Hvanneyri er sterk og hjá mörgum
er það orðinn fastur liður að sækja
Hvanneyrarhátíðina heim þar sem
gamlir og góðir tímar eru rifjaðir
upp.
„Í ár verður rykið dustað af gömlu
skólaspjöldum Bændaskólans á
Hvanneyri og verða þau til sýnis
í skólastofum Gamla skóla ásamt
myndum frá skólastarfinu og ýmsu
fleiru. Það er ótrúlega margt fólk
sem hefur einhverja tengingu við
Hvanneyri; fyrrverandi nemendur
eða ættingjar þeirra og vinir. Með
sýningunni getum við vonandi
veitt innsýn í skólasamfélagið á
Hvanneyri sem á sér nærri 130 ára
sögu,“ segir Bára.
Geitalatté í kaffihúsinu
Meðal dagskrárliða eru heyvagna-
akstur, opið fjós, pönnuköku-
baksturskeppni, leiðsögn verður um
Yndisgarða á Hvanneyri, markaður,
danshópurinn Sporið tekur sporið,
húsdýr með ungviði, andlitsmálun og
leikir, og margt fleira. Erfðalindasetur
Íslands verður með upplýsingar um
íslensku húsdýrin og leggur til geita-
mjólk frá Háafelli sem notuð verður í
sérlagað geitalatté sem verður til sölu
í kaffihúsinu Skemmunni. Þá mun
Bjarni Guðmundsson, forstöðumað-
ur Landbúnaðarsafnsins, lesa upp
úr nýrri bók sinni, Konur breyttu
búháttum – saga Mjólkurskólans
á Hvanneyri og á Hvítárvöllum.
Rjómabúið á Erpsstöðum ætlar að
taka þátt í hátíðinni í ár með kynn-
ingu og sölu á vörum sínum.
Enginn aðgangseyrir
Frír aðgangur verður að Land-
búnaðarsafni Íslands og ætla konurn-
ar sem standa að Ullarselinu að sýna
listir sínar á tröppum safnsins. Einn
að vinsælustu viðburðunum er inn-
koma Fornbílafjelags Borgarfjarðar
sem stillir bifreiðum sínum upp,
ungum sem öldnum til gamans. Þá
verður gamli Andakílsskóli opinn
svo fólk geti kynnt sér starfsemina
sem þar fer fram. Við grunnskólann
verður einnig úrval skemmtilegra
leikja og þrauta, t.d. leitin að nál í
heystakki, sem var mjög vinsæl í
fyrra.
Formleg dagskrá hefst kl 13.30
og lýkur henni kl. 17.00. Allar nánari
upplýsingar um hátíðina og dagskrá
má finna á Facebook-síðunni www.
facebook.com/hvanneyrarhatid.
Bára Sif Sigurjónsdóttir. Mynd / Ólöf Ósk Guðmundsdóttir
Myndir / Valdimar Gestsson
Landgræðsla ríkisins
Héraðsfulltrúi
Landgræðsla ríkisins er þekkingar- og þjónustustofnun. Markmið hennar eru verndun gróð-
urs og jarðvegs og bætt landgæði. Stofnunin starfar samkvæmt lögum um landgræðslu nr.
17/1965 og lögum um varnir gegn landbroti nr. 91/2002.
Landgræðsla ríkisins óskar eftir að ráða héraðsfulltrúa með aðalstarfssvæði í Eyjafjarðar- og
Þingeyjarsýslum með aðsetur á Húsavík. Hann þarf að hafa sveigjanleika og vera tilbúinn til að
taka þátt í þróun starfsins og breytingum sem kunna að verða á starfinu og vinnustaðnum.
Starfs- og ábyrgðarsvið
• Öflun upplýsinga, ráðgjöf og eftirlit með verkefnum í Bændur græða landið, Landbótasjóði
og öðrum landgræðsluverkefnum.
• Áætlanagerð og umsjón landgræðsluverkefna á starfssvæðinu.
• Vöktun á ástandi gróðurs og jarðvegs og fylgjast með að lögum um landgræðslu sé fram-
fylgt.
• Aðstoð við gerð beitar- og uppgræðsluáætlana fyrir einstakar bújarðir og stærri svæði.
• Skráning landgræðsluaðgerða og eftirlit með árangri þeirra.
• Fræðsla og ráðgjöf til sveitarstjórna, landnotenda, skóla og almennings.
• Önnur verkefni
Menntun og hæfni
• Krafist er BSc-prófs í náttúruvísindum, t.d. landnýtingu, beitarfræðum eða umhverfisfræðum
• Almenn þekking eða reynsla af landbúnaði
• Skipulagshæfni, sveigjanleiki og góð samstarfshæfni
• Góð kunnátta í notkun tölvu og upplýsingatækni og góð íslenskukunnátta, skilyrði.
• Þekking og reynsla af landgræðslustarfi, kostur
• Þekking og reynsla af notkun landupplýsingakerfa, kostur
Um er að ræða 100% stöðu, starfinu geta fylgt talsverð ferðalög, megin starfssvæðið er Norður-
land. Stafið hentar bæði konum og körlum.
Laun er skv. kjarasamningi ríkisins og FÍN félags náttúrufræðina. Nánari upplýsingar um starfið
veitir Guðmundur Stefánsson sviðsstjóri (gudmundurst@land.is) í síma 899 3096. Umsóknir
ásamt ferilskrá og afriti af prófskírteini skal senda til Landgræðslu ríkisins, Gunnarsholti, 850
Hella eða á netfangið sigurbjorg@land.is.
Umsóknarfrestur er til og með 15. júlí 2016.