Bændablaðið - 05.03.2020, Blaðsíða 7

Bændablaðið | Fimmtudagur 5. mars 2020 7
LÍF&STARF
V ið upphaf síðasta vísnaþáttar birti ég vísu sem mátti skilja sem hún væri eftir sjálfan Svein
Ásgeirsson. Líkt og fram kom, þá stýrði
Sveinn vísnaþætti í Ríkisútvarpinu sem
bar heitið „Vel mælt“. Til þáttarins fékk
Sveinn gjarnan þekkta hagyrðinga, sem
fóru með kveðskap sinn ellegar ortu á
staðnum snjallar vísur sem varðveist hafa
með þjóðinni. Einn þessara hagyrðinga
var Guðmundur Sigurðsson eða
Guðmundur frá Borgarnesi eins og
hann titlaði sig á tímabili. Næsta víst
má telja að Guðmundur frá Borgarnesi
hafi verið gestur Sveins í tilvitnuðum
vísna þætti, enda er vísan umrædda:
„Magn ast himins myrkravöld o.s.frv.“
eftir Guðmund Sigurðs son. Framan af
ævi var Guðmundur mjög róttækur í
skoðunum, en sinnaðist við sálufélaga
sína, meðal annars Rósberg og Kristján
frá Djúpalæk, vegna misskiln ings
og rangtúlkunar þeirra á einhverjum
pólitískum kveðskap hans. Guðmundi
þótti þetta miður og greri aldrei um
þau sár fullkomlega. Allan ofanskráðan
fróðleik hef ég frá syni Guðmundar,
Guðmundi B. Guðmundssyni lækni,
sem búsettur er í Reykjavík á 85.
aldursári. Fágætur að allri gerð er
Guðmundur B. Guðmundsson og afar
fróður um kveðskap föður síns sem
lést árið 1972. Þeir bræður Guðmundur
og Óttar geðlæknir rituðu m.a. í ársrit
Sögufélags Borgfirðinga grein um föður
sinn í tilefni hundruðustu ártíðar hans. Í
fágætum tölvupósti sem mér barst frá
Guðmundi B. Guðmundssyni nýverið
eru meðal annars ágætis þrjár vísur eftir
föður hans. Í stórafmæli Andrésar í
Síðumúla orti hann:
Þótt lífið bæti tug og tug
við tímann sem það gaf okkur,
hefjum glös og hugarflug
á hinum rennur af okkur.
Nokkurrar róttækni gætir í þessari vísu
Guðmundar frá Borgarnesi:
Orðsins gandur ekki snar
er að vanda staður.
Heilagur andi aldrei var
okkar bandamaður.
Guðmundur frá Borgarnesi stýrði
sjálfur vísnaþætti í útvarpinu sem hét
„Komdu nú að kveðast á“. Margir þekktir
hagyrðingar sendu þættinum vísur. Egill
Jónasson á Húsavík sendi eitt sinn vísu
sem var afar illskeytt og jaðraði við
níð um vísnaþátt Guðmundar. Svarvísa
Guðmundar var þessi:
Egils kveðja er ekki mild,
aldrei laus við kala.
En þetta er kölluð þingeysk snilld
og þýðir ekki um að tala.
Guðmundur átti einhverju sinni erfiða
sjúkrahúsvist. Undir miklum lasleika orti
hann sína eigin dánartilkynningu með
þessum snilldar hætti:
Guðmundur Sigurðsson gaf upp önd
í gærdag við iðran sanna.
Fyrir okkar eigin hönd
og annarra vandamanna.
Við næstu vísu Guðmundar er svo felldur
formáli. Eitt sinn sátu þeir Guðmundur og
Steinn Steinarr inni á Hótel Skjaldbreið
og kvað Guðmundur í gamni vísu til
framreiðslustúlkunnar. Steinn fór síðar
með vísuna fyrir Eirík Jónsson mennta-
skólakennara sem síðan fór með hana fyrir
Halldór Kiljan Laxness í Unuhúsi. Kiljan
var þá með Íslandsklukkuna í smíðum
og nýtti skáldið orðin „álfakroppurinn
mjói“ úr vísu Guðmundar í lýsingu sinni
á Snæfríði Íslandssól. Vísa Guðmundar
varð landsfræg fyrir vikið:
Margt er það sem milli ber
mikinn þótt ég rói.
Aldrei má ég unna þér
álfakroppurinn mjói.
Umsjón:
Árni Geirhjörtur Jónsson
kotabyggð1@gmail.com
245MÆLT AF
MUNNI FRAM
Dómnefndin: Guðlín Ósk Bragadóttir, Lilja Dögg Alfreðsdóttir og Gréta Björg Jakobsdóttir með verðlaunamyndirnar.
Tíu grunnskólanemar unnu til verðlauna
í árlegri teiknisamkeppni
– Metþátttaka í árlegri teiknisamkeppni 4. bekkinga í tengslum við Alþjóðlega mjólkurdaginn
Nú liggja fyrir úrslit í teiknisamkeppni
4. bekkinga en um er ræða keppni sem
haldin er í tengslum við Alþjóðlega
skólamjólkurdaginn ár hvert.
Lilja Dögg Alfreðsdóttir mennta- og menn-
ingarmálaráðherra tók þátt í valinu á verð-
launamyndunum og var einstaklega stolt af
sköpunarkrafti og hugmyndaflugi nemendanna
og sagði keppni sem þessa vera mikilvæga og
hvetjandi fyrir bæði nemendur og kennara.
Rúmlega 1.500 myndir bárust
frá 62 skólum
Metþátttaka var í keppninni þetta skólaárið en
rúmlega 1.500 myndir bárust frá 62 skólum
alls staðar að af landinu. Tíu myndir voru
valdar úr þessum mikla fjölda og hafa skóla-
stjórnendum í viðkomandi skólum verið færð
gleðitíðindin.
Peningagjöf frá Mjólkursamsölunni
Verðlaunahöfum eru veitt viðurkenningar skjöl
fyrir teikningar sínar og til viðbótar er hver
mynd verðlaunuð með 40.000 kr. peninga-
gjöf frá Mjólkursamsölunni. Verðlaunaféð
rennur óskipt í bekkjarsjóð viðkomandi og
getur bekkurinn nýtt þá upphæð í að gera sér
glaðan dag saman og efla liðsheild í samráði
við umsjónarkennara og skólastjórnendur.
„Myndefnið í keppninni er sem fyrr frjálst
en má gjarnan tengjast mjólk og íslensku
sveitinni eða hollustu og heilbrigði og er
óhætt að segja að kýr og mjólkurfernur
séu vinsælustu viðfangsefnin,“ segir Gréta
Björg Jakobsdóttir, markaðsfulltrúi MS og
einn af fulltrúum í dómnefnd keppninnar.
„Hugmyndirnar eru óþrjótandi og hæfileikarnir
með ólíkindum hjá 9 og 10 ára nemendum
sem leggja margir hverjir gríðarlegan metnað
í myndirnar sínar og eru núna að uppskera.“
Vinningshafar í teiknisamkeppninni skóla-
árið 2019–2020 eru:
Akvelina Darta Bruvere, Hrafnagilsskóla
Álfrún Lóa Jónsdóttir, Hamraskóla
Hanna Katrín Magnúsdóttir, Melaskóla
Jón Emil Christophsson, Öxarfjarðarskóla
Katrín Kristinsdóttir, Fellaskóla Reykjavík
Katrín Líf Sigurðardóttir, Setbergsskóla
Natalía Björk Kowalska, Árbæjarskóla
Steinunn Ingvadóttir, Melaskóla
Telma Lind Hákonardóttir, Holtaskóla
Ugne Skyriute, Fellaskóla Reykjavík
Dómnefndin þakkar 4. bekkingum kærlega
fyrir þátttökuna og óskar vinningshöfum og
skólunum þeirra innilega til hamingju.
Verðlaunamyndirnar tíu, en allar myndir er jafnframt að finna á vef verkefnisins skolamjolk.is.
Dómnefndarfulltrúarnir Gréta Björk Jakobsdóttir og Lilja dögg Alfreðsdóttir menntamálaráðherra
að störfum.