Morgunblaðið - 16.03.2020, Síða 11

AÐ GEFNU TILEFNI:
Eins og heimsbyggðin öll
stendur íslensk þjóð um þessar mundir frammi fyrir óvæntum aðstæðum og
umtalsverðum breytingum í daglegu lífi sínu. Sumt er þó ólíklegt að fari úr skorðum.
Eitt af því er framboð á mjólk og öllum helstu mjólkurvörum.
Íslenskur mjólkuriðnaður
hefur alla tíð sett hreinlæti og framleiðsluöryggi í öndvegi allrar starfsemi sinnar. Þau
leiðarljós fá enn frekara vægi á tímum sem þessum.
Um 550 kúabændur
um land allt sinna frumframleiðslu mjólkur og reka afurðastöðvar sínar með þremur
grunnstoðum; á Akureyri, Sauðárkróki og Selfossi auk minni stöðva í Búðardal og á
Egilsstöðum. Allir verkferlar hafa verið lagaðir að nýjum aðstæðum til þess að lágmarka
hættu á að starfsfólk forfallist. Þrátt fyrir mikla sérhæfingu afurðastöðvanna er einnig
tryggt að þær geti hlaupið í skarðið hver fyrir aðra ef á þarf að halda.
Hættan á mjólkurvöruskorti
er þess vegna í lágmarki. Í góðu samstarfi við matvöruverslun í landinu munum við hér
eftir sem hingað til leggja grunn að hnökralausu framboði á ferskum mjólkurvörum,
ostum og öðrum helstu framleiðsluvörum okkar. Um leið leggjum við okkar lóð á
vogarskálar fæðuöryggis á Íslandi og tökum undir með stjórnvöldum og forsvarsmönnum
verslunarinnar um að ástæðulaust sé að breyta innkaupavenjum af ótta við vöruskort.
Íslensk mjólk
býr við mikið og dýrmætt
framleiðsluöryggi