Ægir - 2019, Page 18

18
Uppsetning vinnslubúnaðar á milliþil-
fari togarans Bergeyjar VE 144, sem
er í eigu Bergs-Hugins hf. í Vest-
mannaeyjum, er langt komin hjá
Slippstöðinni Akureyri. Bergey VE er
einn af sjö togurum sem smíðaðir
voru fyrir íslenskar útgerðir hjá
skipasmíðastöðinni Vard í Noregi en
nú eru fimm þeirra komnir til lands-
ins. Fyrst í röðinni var Vestmannaey
VE sem hóf veiðar fyrr í haust eftir að
búnaður á millidekki og í lest hafði
verið settur upp.
Mikil tilhlökkun
Bergey VE kemur í stað samnefnds eldra
skips hjá útgerðinni og verður Jón Val-
geirsson skipstjóri en hann sótti gömlu
Bergey VE einnig nýja á sínum tíma. Jón
segir mikla tilhlökkun að taka nýja skip-
ið í notkun.
„Það er alltaf mikill áfangi að fá nýtt skip
í hendur. Við getum sagt að nýja Bergey
sé númerinu stærri en sú gamla, bæði
hærri og breiðari. Þar af leiðandi dálítið
meira skip en samt mjög lipurt með öllum
þeim stjórnbúnaði sem er í því. Mesta
stækkunin frá gamla skipinu er á milli-
dekkinu þar sem er hægt að koma fyrir
meiru af vinnslulínum og sem henta
okkar veiðiformi. En þessi aukna breidd
kemur líka fram í vinnusvæðinu á efra
dekki, borðsal og íbúðum. Það er allt
stærra,“ segir Jón en skip Bergs-Hugins
koma til með að verða í svipuðu úthaldi
og þau gömlu og sækja í blandaðar fisk-
tegundir.
Vinnslubúnaður frá Slippnum
Akureyri
Slippurinn Akureyri smíðaði og setti upp
vinnslubúnað á þilfar Bergeyjar VE og í
lest er svokallað snúningsband frá Vél-
smiðjunni Þór í Eyjum. Slíkur búnaður
var einnig í gömlu Bergey. Aflinn í nýja
skipinu verður krapakældur en kælibún-
aðurinn kemur frá Kapp. Í lest komast
244 ker af stærðinni 460 l. Lestin kemur
því til með að rúma um 80 tonn.
Bergey er 29 metrar á lengd og 12
metra breið. Í skipinu eru tvær aðalvélar
frá Yanmar og tvær skrúfur frá Finnoy
en með því segir Jón að eigi að fást jafn-
ara og betra átak í togi. Togspilin um
borð eru frá Seaonics í Noregi og eru
rafmagnsknúin. Aflanemakerfi er frá
Marport en SeaQ, sem er dótturfyrirtæki
Vard, hannaði brúarkerfið. Flest tækin í
brúnni eru af gerðinni Furuno. Skipin
eru máluð með International málningar-
kerfi frá Sérefni.
Markmiðið er betra hráefni
„Hugsunin með þessum nýju skipum er
númer eitt, tvö og þrjú að auka gæði
hráefnisins. Þess utan fáum við auðvitað
líka góða vinnuaðstöðu og íbúðir fyrir
áhöfnina en til dæmis fann ég verulegan
mun á hljóðbærni í nýja skipinu miðað
við það gamla. Sóknin verður síðan með
sama hætti og áður, við erum innan
þriggja mílna og erum mikið á vertíðinni
í kringum Eyjar en förum síðan lengra
austur á haustin,“ segir Jón en vinnuað-
staða hans í brúnni verður með öllu því
besta sem gerist í fiskiskipum í dag. „Það
verður nóg að læra á en þó þetta virki
flókið í byrjun þá lærist fljótt að nota
búnaðinn.“
Ný Bergey VE að
verða tilbúin á veiðar
■ Slippurinn Akureyri hefur síðustu vikur unnið að því að setja upp búnað á
vinnsluþilfarinu í Bergey VE 144. Skipið mun fara í fyrstu veiðiferðir nú í
desember.
Ný fiskiskip