Lögmannablaðið - 2018, Page 32

32 LÖGMANNABLAÐIÐ TBL 04/18
og fundir sveitarfélaga séu jafnvel á nokkurra mánaða
fresti. ,,Það getur orðið ansi knappt fyrir umbjóðandann,
einkum þegar um er að ræða slíka stærri aðila með mörgum
stjórnarmönnum eða fjölskipuð stjórnvöld, að þurfa að
kynna sér niðurstöður dóma, öll gögn og taka ákvörðun
um áfrýjun eða kæru á svo skömmum tíma. Svo ekki sé
talað um þá vinnu sem þá fyrst getur farið í hönd hjá
lögmönnunum,“ segir Jón og tekur í sama streng.
Lögmannafélag Reykjavíkur?
Hér áður fyrr heyrðist því fleygt að réttnefni félagsins væri
Lögmannafélag Reykjavíkur, hver er upplifun ykkar af
þjónustu félagsins og tilliti til ,,landsbyggðarlögmanna“,
gætuð þið tekið undir þetta? Jón: ,,Nei, það myndi ég nú
alls ekki segja og ber að taka það fram að öll samskipti
við starfsmenn félagsins eru og hafa verið algerlega til
fyrirmyndar“. Hilmar og Eva taka undir það og kveðjast
ennfremur öll hafa nýtt sér að sækja námskeið á vegum
félagsins í gegnum fjarfundabúnað eftir að boðið var upp
á þann kost, sem hafi verið mikil bót.
En hvað um hagsmunagæslu gagnvart félagsmönnum?
,,Fókusinn er, kannski óhjákvæmilega á starfsumhverfi
lögmanna á höfuðborgarsvæðinu“ segir Jón. Þau benda á
að lögmenn úti á landi séu ekki í framvarðasveit lögmanna­
félagsins og því kveiki menn ekki alltaf endilega á þeim
atriðum sem snúa að álitaefnum sem varða landsbyggðina
verulegu, án þess að vera bent sérstaklega á það, þar sem
lögmenn í Reykjavík upplifi þetta ekki af eigin raun. ,,Því
verður ekki neitað að við erum að upplifa skerðingu á
þjónustu, sem mætti einfaldlega leysa með skynsamlegum
hætti“. Veigamikið atriði er til að mynda fækkun reglulegra
dómþinga á landsbyggðinni, sem áður var vikið að, en á
Austurlandi hefur þingdögum verið fækkað niður í einn á
mánuði, líkt og víðar. ,,Þannig líða stundum allt að fimm
vikur á milli reglulegra dómþinga, sem getur skapað sér­
staka stöðu. Nú er frestur til að skila frávísunargreinargerð
til dæmis fjórar vikur, þá verður að halda aukaþing til að
unnt sé að leggja slíka greinargerð fram. Við sjáum ekki
alltaf vinnusparnaðinn sem í þessu á að felast.“ Einnig
nefna þau að það geti verið bagalegt að þurfa jafnvel að
bíða í fimm vikur með að þingfesta mál og eins ef fallist
er á frestbeiðni lögmanns gagnaðila þá er í reynd verið að
veita heilan mánuð í viðbótarfrest. Þau nefna að þeim sé
reyndar ekki kunnugt um hvernig málum sé háttað, hvort
dómstólasýslan eða aðrir beri slík atriði undir LMFÍ eða
óski umsagnar. Þau hafa átt frumkvæði að því að stíga
fram og koma með ábendingar um skynsamlegar lausnir.
Aðspurð verði þau að játa að lítið frumkvæði hafi komið
frá LMFÍ eða að óskað sé álits að fyrra bragði. ,,Á hinn
bóginn hefur öllum ábendingum okkar verið afar vel tekið
af lögmannafélaginu í gegnum tíðina, bæði hugmyndum
og tillögum að lausnum,“ segir Jón. Eru þau öll á sama
máli um að svo hafi verið og eru sannfærð um að samráð
og samstarf muni eingöngu koma til með að aukast í
framtíðinni. Þá eru þau bjartsýn á að helstu stofnanir og
aðilar muni í auknum mæli tileinka sér þá margvíslegu
tækni og hagnýtar lausnir sem sífellt eru í þróun og þá
sem nú þegar er fyrir hendi.
Að endingu var einboðið að spyrja Hilmar út í Áorku, en
hann var sem kunnugt er driffjöðrin og annar stofnanda
félagsins ásamt Baldri Dýrfjörð. Félagið var sett á laggirnar
síðastliðið vor og er deild innan lögfræðingafélagsins, en
hvernig kom þetta til? ,, Hugmyndin kviknaði þegar ég var
erlendis í framhaldsnámi í orkurétti. Prófessorarnir mínir
ytra voru formenn sambærilegra félaga í Danmörku annars
vegar og Hollandi hins vegar. Í náminu og í gegnum þá
kynntist ég slíkri starfsemi, en hliðstæð félög hafa verið
starfrækt á hinum Norðurlöndunum. Þeir stungu að mér
að stofna slíkt félag hér á Íslandi sem og við gerðum. Þetta
er hugsað sem vettvangur eða félag áhugafólks um orkurétt
og var stofnað á vormánuðum.“ Þess má geta að yfir 60
manns skráðu sig fljótlega í félagið og því ljóst að mikill
áhugi er meðal íslenskra lögfræðinga á málefninu, enda
nærtækt hérlendis.
Þá voru þremenningarnir æðrulaus þegar talið barst að
vandkvæðum sem skapast gætu við samgöngur vegna veður­
fars og þau beðin um hrakningasögur ,,úr sveitinni“: ,,Það
hefur oft komið fyrir að maður sitji fastur á Fjarðar heiði í
nokkra tíma í bílnum á leið til uppboðs, aðalatriðið er að
láta ekkert koma sér á óvart.“ Þá mun það ekkert einsdæmi
að skottúr í fyrirtöku til Akureyrar vindi upp á sig og endi
með tveggja daga ferðalagi og jafnvel heimflugi í gegnum
Reykjavík. ,,Okkur finnst þetta ekkert mál – við gerum
einfaldlega alltaf ráð fyrir því við brottför að veðrið geti sett
strik í reikninginn, maður bara býr sig vel og tekur alltaf
með sér tölvuna vitanlega og gögn til að nýta tímann.“