Hinsegin dagar í Reykjavík - aug. 2016, Side 50

SAMTÖKIN '78
BJÓÐA UPP Á FRÆÐSLU, RÁÐGJÖF OG FÉLAGSLÍF.
ÞAU BERJAST FYRIR VÍÐSÝNI SAMFÉLAGSINS
OG FORDÓMALEYSI Í GARÐ HINSEGIN FÓLKS.
Trans Ísland, Intersex Ísland og Samtökin ‘78
Hagsmunaaðild Trans Íslands (2007) og Intersex Íslands
(2015) að Samtökunum ‘78 var mikilvægur hluti af því
að tryggja að Samtökin ‘78 hefðu forsendur til þess að
vera félag hinsegin fólks á Íslandi. Hinsegin samfélagið
hefur þróast mikið á undanförnum áratugum
hérlendis sem víðar og fjölbreyttir jaðarsettir hópar
taka nú höndum saman og berjast gegn óréttlæti og
jaðarsetningu. Þessir hópar tengjast á margvíslegan
hátt þrátt fyrir að vera ólíkir innbyrðis. Allir hóparnir
glíma við sterk samfélagsleg kerfi sem ganga út frá því
að eingöngu séu til tvö kyn, því sé ætíð úthlutað rétt við
fæðingu og að þessi tvö kyn laðist undantekningalaust
að hvort öðru og eignist börn og buru. Trans Ísland
og Intersex Ísland hafa því ekki einungis notið góðs af
þeirri reynslu sem Samtökin ‘78 búa yfir þegar kemur
að mannréttindamálum heldur hafa Samtökin ‘78
einnig notið góðs af fjölbreyttum sjónarmiðum og
mismunandi upplifun og hinsegin samfélagið hefur
blómstrað í öllum sínum fjölbreytileika. Á Íslandi er
hinsegin samfélagið ekki ýkja stórt og því er mikilvægt
að við tökum höndum saman og sýnum samstöðu en
töpum okkur ekki í aðgreiningu og tölum ekki hvert úr
sínu horninu. Við þurfum að tala saman og umræðan
þarf að taka mið af ólíkum sjónarhornum. Við erum
sterkari saman en sundruð og öll mannréttindabarátta
er okkur viðkomandi enda er hinsegin fólk af öllum
stærðum og gerðum.
Fyrsta gleðiganga Intersex Íslands árið 2014.
50