Morgunblaðið - 22.10.2021, Blaðsíða 34

34 MORGUNBLAÐIÐ FÖSTUDAGUR 22. OKTÓBER 2021 VIÐSKIPTAMOGGINN FRAMÚRSKARANDI FYRIRTÆKI
H
ulda Guðný Kjartansdóttir, fram-
kvæmdastjóri Miðbaugs ehf.,
rekstraraðila gleraugnaverslana
Optical Studio, var ung að árum
þegar faðir hennar, sjóntækjafræðingurinn
Kjartan Bragi Kristjánsson, stofnaði Gler-
augnaverslun Keflavíkur á Hafnargötunni í
bænum árið 1982. „Pabbi lærði sjóntækjafræði
hjá Herbert Pietsch, þýskum optikermeistara í
Gleraugnaversluninni Optik í Reykjavík. Hann
starfaði svo í eitt ár við fagið í Þýskalandi og
lauk seinna sjónfræðinámi (námi í sjónmæl-
ingum) frá Háskólanum í Kongsberg í Noregi,“
segir Hulda.
Fyrirtækið rekur nú fjórar verslanir en þær
eru auk verslunarinnar í Keflavík í Flugstöð
Leifs Eiríkssonar, Smáralind og á Hafnartorgi í
Reykjavík.
Spurð um nafn fyrirtækisins segir Hulda að
faðir hennar hafi keypt gleraugnaverslunina
Optical Studio af bandaríska hernum sem hafði
rekið gleraugnaverslun með því nafni á varnar-
svæðinu. Það nafn hafi í framhaldinu þótt hent-
ugt til að nota áfram, enda eigi birgjar erlendis
erfitt með að bera fram íslenskt nafn eins og
„Gleraugnaverslun Keflavíkur“ bendir Hulda á.
Skrautfjöður á Hafnartorgi
Verslunin á Hafnartorgi er skrautfjöðrin í
hatti Optical Studio að sögn Huldu. „Þar erum
við með allar flottustu vörurnar okkar. Sem
dæmi, þegar við fáum mjög glæsilega vöru í
einu eintaki komum við henni fyrir á Hafnar-
torginu.“
Hulda mælir með að fólk komi á Hafnar-
torgið ef það vill láta dekra við sig. „Starfsfólkið
þar hefur góðan tíma til að snúast í kringum
viðskiptavini. Þar er aðeins rólegra en í hinum
verslunum okkar.“
Boðið er upp á fríar sjónmælingar í öllum
verslunum og hægt er að panta á heimasíðu.
„Við leggjum upp með að bjóða jafn góða þjón-
ustu í öllum verslununum. Hjá okkur starfa ell-
efu sjóntækjafræðingar,“ segir Hulda en alls
starfa þrjátíu manns hjá félaginu.
Aðspurð hvort það hafi ekki verið áfall þegar
kórónuveirufaraldurinn brast á skömmu eftir
opnun verslunarinnar á Hafnartorgi árið 2019
játar Hulda því. „Það var samt ótrúlegt hvað
rættist úr því. Íslendingar eru spenntir fyrir
nýjungum og þegar þeir voru búnir að átta sig á
að það væri ekkert vandamál að leggja í mið-
bænum, jafnvel auðveldara en við verslunar-
miðstöðvarnar, þá var eftirleikurinn auðveldur.“
Að sögn Huldu er hægt að leggja í bílakjall-
ara undir Hafnartorginu og ganga svo nánast
beint inn í verslunina. Slíkt sé mjög þægilegt á
veturna þegar veður er slæmt.
Hlakka til að fá meira líf
„Við hlökkum til að fá meira líf á torgið og
bíðum spennt eftir fleiri ferðamönnum. Við er-
um vongóð um að flæðið niðri í bæ verði gott,
enda er mikil og spennandi uppbygging þar.“
Spurð hvað það sé helst sem ferðamennirnir
kaupi í verslunum fyrirtækisins segir Hulda að
þeir elski merkjavöru. „Þeir koma sérstaklega
til okkar að kaupa lúxusvöru frá stóru tískuhús-
unum eins og Gucci, Saint-Laurent, Cartier og
Crome Hearts. Bandaríkjamenn og Kínverjar
eru sérstaklega hrifnir af Crome Hearts, sem er
vel þekkt gæðamerki. Fólk kemur langar leiðir
til að kaupa þær vörur.“
Hulda segir aðspurð að þau hjá Optical Stud-
io leggi sig fram um að halda verði á merkjavör-
unni samkeppnishæfu við útlönd. „Verðið er
skör lægra ef eitthvað er.“
Spurð um ákvörðun hennar sjálfrar að feta í
fótspor föður síns segir Hulda að áður en hún
tók við stjórnartaumunum í fyrirtækinu hafi
hún starfað sem lögmaður. „Ég vann m.a. í hér-
aðsdómi og við lagastofnun Háskóla Íslands og
síðar meir í eigin rekstri. Árið 2017 fór ég að
hugsa um að prófa að gera eitthvað tengt við-
skiptum og rekstri. Ég hafði áður komið að
rekstri fyrirtækisins sem ráðgjafi en eitt leiddi
af öðru og ég ákvað að minnka við mig í lög-
mennskunni og auka aðkomuna að Optical
Studio. Ég er með lögmannsréttindin og tek að
mér eitt og eitt mál, en tíminn er orðinn af
skornum skammti.“
Skemmtilegra í fyrirtækjarekstrinum
Spurð hvort sé skemmtilegra, fyrirtækja-
reksturinn eða lögmennskan, segir Hulda að
fyrirtækjareksturinn hafi vinninginn. „Mér
finnst þetta ótrúlega skemmtilegt. Þó að lög-
mennskan sé fjölbreytt og skemmtileg þá er
fyrirtækjareksturinn enn fjölbreyttari. Mér
finnst líka gaman að geta unnið við tískubrans-
ann og fylgst náið með straumum og stefnum,
farið á sýningar og séð hvað er að gerast. Það er
líka gaman að sinna markaðssetningu og aug-
lýsingum fyrir verslanirnar. Þetta heillar mig
meira en lögmennskan.“
Hulda segir að lögfræðin nýtist mjög vel í
fyrirtækjarekstri svo sem við samningagerð og
ákvarðanatökur í rekstrinum.
Í faraldrinum fóru öll samskipti við birgjana
yfir á netið. „Teams-fundirnir virkuðu ótrúlega
vel en það kemur ekkert í staðinn fyrir að hitta
fólk í eigin persónu. Á dögunum fórum við í
fyrsta sinn í tvö ár á sýningu í París. Það var
gaman að hitta fólkið aftur eftir tveggja ára hlé
og máta og handleika vöruna á nýjan leik. Það
skiptir gríðarlegu máli því tískubransinn þróast
svo hratt.“
Eins og aðrar verslanir í Leifsstöð varð Opti-
cal Studio fyrir miklu raski þegar faraldurinn
stöðvaði öll ferðalög milli landa. Nú er umferð
um völlinn aftur að aukast. „Það er allt í mikilli
uppsveiflu núna. Fólk er aftur farið að ferðast
til útlanda. Það er líf og fjör að færast í húsið á
ný.“
Hagnaður jókst milli ára
Fyrirtækið var rekið með 83 milljóna króna
hagnaði á síðasta ári og jókst hagnaðurinn um
rúmar 25 milljónir frá fyrra ári. „Ég er mjög
ánægð með niðurstöðu síðasta árs. Við náðum
að halda sjó í gegnum faraldurinn. Við vorum
passasöm og héldum kostnaði í lágmarki. Við
erum stöðugt á tánum og fylgjumst vel með öll-
um tölum. Það má aldrei sofna á verðinum. Þó
að við höfum lokað í flugstöðinni þá kom á móti
að meira var að gera í hinum verslununum okk-
ar. Verslunin færðist heim þegar Íslendingar
komust ekki til útlanda og við nutum góðs af
því. Reksturinn hefur gengið framar vonum í
faraldrinum, sem var ekki fyrirséð.“
Optical Studio hefur meðal annars nýtt tím-
ann til að uppfæra heimasíðuna. Hún er nú að
sögn Huldu öflugri og flottari en áður. Þangað
inn fari allar vörur og fólk geti skoðað úrvalið og
verslað.
Þarf að hemja sig í fjölskylduboðum
Auk Huldu starfar bróðir hennar hjá félaginu
auk annarra fjölskyldumeðlima. „Bróðir minn
sér um tæknimálin. Svo hefur nýstúdentinn
dóttir mín unnið hér. Hún fór með mér á sýn-
inguna í París um daginn og aðstoðaði við inn-
kaupin. Það er gott að fá unga fólkið inn til að
aðstoða við tískuna. Þá hefur bróðursonur minn
unnið hér og móðir mín starfaði í félaginu um
árabil. Maðurinn minn, sem er lögmaður, kem-
ur líka að stjórnun félagsins og sinnir ráðgjöf.
Þetta er því sannkallað fjölskyldufyrirtæki.
Maður þarf að hemja sig í fjölskylduboðunum
að tala ekki bara um fyrirtækið, enda er það að-
aláhugamálið,“ segir Hulda að lokum og brosir.
tobj@mbl.is
Ferðamennirnir elska merkjavöru
Morgunblaðið/Kristinn Magnússon
303. sæti
OPTICAL
STUDIO
Meðalstórt 105. sæti
Hulda Guðný
Kjartansdóttir
Spurð um stefnur og strauma í gleraugna-
tískunni segir Hulda að í dag sé í tísku að
vera með keðjur í gleraugunum. „Það þykir
flott í dag. Við sjáum þetta til dæmis í gler-
augum frá Gucci. Þá hangir keðjan niður á
bringu eins og hálsmen. Svo er hægt að
taka keðjuna af ef maður vill.“
Hulda hvetur fólk til að prófa gleraugu af
mörgum stærðum og gerðum. „Fólk á ekki
að vera feimið við að vera með alls konar
gleraugu. Það fer til dæmis litlu andliti vel að
vera með stór gleraugu.“
Hún segir að fólk ætti að hafa mörg gler-
augu til skiptanna, enda er andlitið mest
áberandi partur líkamans. „Þú átt kannski
mörg skópör fyrir mismunandi tilefni en að-
eins ein gleraugu. Þú ættir að leyfa þér að
eiga til dæmis ein létt og þægileg til að nota
heima, en önnur þegar þú ert að fara út sem
eru þá í stíl við aðra skrautmuni eða fatnað.“
Keðjur þykja flottar í dag
Huldu finnst gaman að
geta unnið við tísku-
bransann og fylgst náið
með straumum og
stefnum, farið á sýningar
og séð hvað er að gerast.