Morgunblaðið - 22.10.2021, Blaðsíða 76

H
já Leifi Hallgrímssyni er vinnudag-
urinn meira spennandi en gengur
og gerist. Leifur er atvinnu-
flugmaður og framkvæmdastjóri
Mýflugs, og samhliða því að halda utan um
reksturinn sest hann reglulega í flugstjóra-
sætið hvort heldur til að koma sjúklingum
hratt og örugglega á milli staða eða sýna
ferðamönnum náttúrufegurð Norðurlands úr
lofti.
„Þetta er það skemmtilegasta sem ég hef
gert,“ segir hann. „Er það ekki síst að þakka
þessum frábæru Beechcraft Super King Air-
flugvélum sem við notum. Það er samdóma álit
allra sem hafa fengið að fljúga flugvélum af
þessari gerð að þær bera af, eru bæði hrað-
fleygar og geta flogið hátt, en eru umfram allt
traustar og áreiðanlegar.“
Miklar breytingar urðu
með sjúkrafluginu
Mýflug á sér langa sögu og segir Leifur að
reksturinn hafi ekki alltaf verið dans á rósum.
„Við hófum starfsemi árið 1995 og meira eða
minna allt fram til ársins 2010 var fyrirtækið
rekið á núllinu eða þar um kring og lítil eigna-
myndun sem átti sér stað. En það urðu um-
skipti árið 2006 þegar við gerðum fyrst samn-
ing við ríkið um að sinna sjúkraflugi og með
því að við gátum stækkað reksturinn og styrkt
undirstöðurnar.“
Sjúkraflug myndar í dag bróðurpartinn af
tekjum Mýflugs og að jafnaði tólf til þrettán
fastráðnir starfsmenn sem sinna þeim hluta
rekstrarins. Með fjölgun ferðamanna hefur
orðið vöxtur í útsýnisflugi á norðausturhorn-
inu en Leifur segir þann hluta starfseminnar
hafa mun minna vægi.
Miðstöð Mýflugs er á Akureyrarflugvelli og
auk tveggja Beechcraft-véla sem eru sér-
útbúnar fyrir sjúkraflug á flugfélagið tvær
minni Cessna-flugvélar sem nýttar eru fyrir
útsýnisflugið. Tekist hefur að halda yfirbygg-
ingu í lágmarki og vinnur einn starfsmaður á
skrifstofu en yfir sumartímann bætast þrír til
fjórir starfsmenn við teymið.
Læknar og víkingasveitarmenn
Sjúkrafluginu er sinnt árið um kring og
starfsfólk Mýflugs alltaf tilbúið að stökkva til
þegar þjónustunnar er þörf. Sjúkrahúsið á
Akureyri skaffar lækna en slökkviliðið á Akur-
eyri sjúkraflutningamenn og kemur jafnvel
fyrir að meðlimir víkingasveitar lögreglunnar
á Akureyri sláist með í för líkt og um daginn
þegar byssumaður olli usla á Egilsstöðum. „Í
því tilviki var óskað eftir þjónustu Mýflugs og
ferjuðum við sérsveitarmenn til Egilsstaða.
Um leið þurfti flugvélin að vera til taks ef slys
yrðu á fólki en eins og landsmenn muna var
byssumaðurinn skotinn og þurfti að komast
hratt undir læknishendur.“
Sýndi atvikið á Egilsstöðum hve miklu máli
sjúkraflug skiptir fyrir viðbragðstíma og segir
Leifur að þótt sjúkraþyrlur hafi ýmsa kosti þá
komist flugvélar hraðar á milli staða: „Sást það
vel að þegar flugvél okkar var á leið til Reykja-
víkur með byssumanninn slasaðan um borð þá
mætti hún yfir Langjökli þyrlu sem hafði verið
send frá Reykjavík.“
Stórt gat á Suðurlandinu
Starf sjúkraflugmannsins er mjög krefjandi
og þurfa flugmenn Mýflugs að þekkja alla flug-
velli landsins inn og út og geta undirbúið flug
með miklum hraði út frá nýjustu upplýsingum
um veðurfar og ástand flugbrauta. Flugvél-
arnar geta ekki lent hvar sem er og verða flug-
vellirnir sem Mýflug notar m.a. að hafa flug-
braut með bundnu slitlagi og ljósum. Leifur
segir lítið um gloppótt svæði þar sem langt er í
næstu hentugu flugbraut en þó sé þörf á að
leggja bundið slitlag á flugvöllunum á Fagur-
hólsmýri eða Skaftafelli. „Frá Bakka til Hafn-
ar í Hornafirði er um 350 km langur spotti þar
sem sjúkraflugvél getur ekki lent með góðu
móti og á sama tíma eru þar mjög margir á
ferðinni og hætta á umferðarslysum auk þess
sem fólkið sem býr á þessu svæði getur þurft
að komast með hraði undir læknishendur. Hef-
ur stjórnvöldum verið bent á þessa stöðu og
vonandi að bráðum komist hreyfing á málið.“
ai@mbl.is
Var ekki alltaf dans á rósum
Leifur með syni sínum Hallgrími á leið til Íslands í fyrra með nýja sjúkraflugvél.
816. sæti
MÝFLUG
Meðalstórt 387. sæti
Leifur Hallgrímsson
76 MORGUNBLAÐIÐ FÖSTUDAGUR 22. OKTÓBER 2021 VIÐSKIPTAMOGGINN FRAMÚRSKARANDI FYRIRTÆKI