Skessuhorn - 12.04.2022, Qupperneq 18
18 ÞRIÐJUDAGUR 12. APRÍL 2022
Pennagrein Pennagrein
Pennagrein
Vinstri græn í Borgarbyggð
leggja áherslu á sterkari byggð
í öllu sveitarfélaginu. Samhliða
uppbyggingu í dreifbýlinu er
lykilatriði að styrkja höfuðstaðinn
okkar, Borgarnes. Borgarnes er nú
þegar miðstöð þjónustu og verslun-
ar fyrir stór svæði á Vesturlandi og
víðar, en framundan eru stór verk-
efni sem miða að því að gera bæinn
að aðlaðandi búsetukosti.
Blómleg byggð
handan Borgarvogs
Nú þegar eru uppi áform um
stóra íbúabyggð handan Borgar-
vogs. Vinstri græn telja þann kost
skynsamlegan til uppbyggingar þó
mikilvægt sé að hún fari fram í sátt
við umhverfið og að haldið verði í
náttúrulegt landslag eftir fremsta
megni. Mikilvægt er að vanda til
verka við skipulagningu svæðis-
ins, ljúka verkinu í áföngum og
sjá til þess að innviðir verði reistir
meðfram byggingu íbúðarhúsnæð-
is. Innan byggðarinnar verði einnig
atvinnu- og þjónustusvæði til að
stuðla að vistvænni ferðamáta í anda
hugmyndarinnar um 15 mínútna
hverfið. Að því sögðu verður þetta
nýja hverfi í fallegu umhverfi,
umlukið náttúru með óteljandi
útivistarmöguleika. Byggðin verður
því að taka mið af því að henta bæði
fjölskyldufólki og einstaklingum
með húsnæði á viðráðanlegu verði.
Þá viljum við að áfram verði haldið
með uppbyggingu göngu- og hjóla-
stíga víðsvegar um sveitarfélagið,
og því er mikilvægt að gert verði
ráð fyrir þeim samgöngukosti við
hönnun hins nýja hverfis handan
Borgarvogs.
Nýtum tækifærin
í Brákarey
Við viljum nýta tækifærin í Brákar-
ey, enda er þar um að ræða mikla
náttúruperlu og uppbygging þar
gæti átt þátt í því að gera gamla
bæinn mun skemmtilegri og að
hentugri stað fyrir ferðaþjónustu.
Nú þegar hefur verið ákveðið að
efna til hugmyndasamkeppni um
hvernig best sé að nýta svæðið en
í umræðunni hefur verið tíðrætt að
þar geti verið blönduð byggð með
léttum iðnaði, verslunum og ferða-
þjónustu. Hvernig útfærslan verð-
ur nákvæmlega, hvort íbúabyggð
komi til greina eða hvort farið verði
í annars konar uppbyggingu veltur
á hugmyndasamkeppninni og
samráði við íbúa, en í öllu falli er um
að ræða gríðarlega spennandi tæki-
færi til uppbyggingar í Borgarnesi.
Mikilvægt er að íbúar hafi aðkomu
að ákvörðun um framtíð svæðisins
og auk þess verður að nýta þekk-
ingu heimamanna á eyjunni. Ef
rétt er staðið að málum getur eyjan
orðið eitt helsta aðdráttarafl Borg-
arbyggðar.
Aukum umferðaröryggi
og búum til alvöru
miðbæ
Miðað við alla þessa uppbyggingu
sem er í kortunum teljum við í
Vinstri grænum mikilvægt að þjóð-
vegurinn verði færður á fyllingu
út fyrir Borgarnes, en þó með
aðrein sem mun tryggja að ferða-
langar sem eiga leið hjá geti með
auðveldum hætti stoppað og sótt
þjónustu og verslun. Verði búið svo
um hnútana að aðgengi af þjóð-
veginum inn í bæinn sé greitt ætti
breytingin ekki að hafa áhrif á þann
fjölda sem stoppar og birgir sig upp
til ferðalaga í verslunum í bænum.
Með færslu þjóðvegarins gefst
einnig tækifæri til uppbyggingar
miðbæjar í Borgarnesi sem bæði
eykur lífsgæði heimamanna og er
aðdráttarafl fyrir ferðafólk. Fari
þjóðvegurinn út fyrir bæinn gefst
einnig tækifæri á aukinni þéttingu
byggðar innan Borgarness. Þá mun
umferðaröryggi aukast innanbæjar,
sem er lykilatriði í því að byggja
betra og mannvænna samfélag.
Eflum Borgarbyggð
á alla kanta
Til þess að búa til öflugri Borgar-
byggð þarf öflugra Borgarnes, sem
getur betur þjónað dreifbýlinu og
staðið undir nafni sem þjónustu-
miðstöð Borgarbyggðar og Vest-
urlands alls. Samhliða þessu vilj-
um við styrkja dreifbýlið í kringum
Borgarnes með því að efla innviði,
fjölga tækifærum og byggja upp.
Við bjóðum upp á skýra sýn fyrir
Borgarbyggð alla, fólkið, náttúruna
og samfélagið.
Thelma Harðardóttir.
Höf. er oddviti Vinstri grænna í
Borgarbyggð
Landrými á Akranesi er takmörkuð
auðlind og gæta þarf margskonar
hagsmuna þegar kemur að nýtingu
þess. Skipulagsmál snúast ekki
aðeins um úthlutun lands, heldur
um uppbyggingu samfélagsins og
eru þannig gríðarlega mikilvæg.
Sú staðreynd að kjörtímabil telur
fjögur ár og margir bæjarfulltrúar
stoppa stutt við má ekki lita ákvarð-
anir sem teknar eru. Skipulagsmál
eru langhlaup, ákvörðun dagsins
í dag raungerist ekki endilega fyrr
en að kjörtímabili loknu. Ákvarð-
anir um skipulag verða að vera
hafnar yfir skammtímasjónarmið
og til þess fallnar að þjóna hags-
munum heildarinnar, enda kunna
þær að hafa áhrif næstu kynslóðir.
Skipulagsyfirvöld á hverjum tíma
geta haft mikil áhrif á samsetningu
íbúa með sínum ákvörðunum og
aðgerðum og þar með uppbyggingu
samfélagsins.
Á því kjörtímabili sem nú er
að ljúka hef ég verið formað-
ur skipulags- og umhverfisráðs en
þessi tími hefur verið mér mjög
lærdómsríkur. Mig langar hér að
fara mjög stuttlega yfir hluta af
þeim skipulagssvæðum sem unnið
hefur verið að á þessu kjörtímabili.
Síðustu ár hafa einkennst af
mikilli uppbyggingu, á kjörtímabil-
inu sem nú er að ljúka hefur verið
úthlutað lóðum undir u.þ.b. 600
íbúðir, einbýli, fjölbýli, rað- og
parhús. Fyrirséð er að á næstu
árum mun sú bæjarmynd sem
við þekkjum í dag gjörbreytast,
mörk íbúabyggðar munu færast
út og á svæðum sem áður hýstu
athafna- og iðnaðarsvæði mun
byggjast upp blómleg byggð. Nýtt
land verður tekið undir byggð líkt
og í Skógarhverfi þar sem næstu
áfangar eru nú að fara í útboðs-
og úthlutunarferli. Á sama tíma er
unnið að metnaðarfullri þéttingu
líkt og á Sements- og Dalbrautar-
reit. Sú stefna sem unnið hefur
verið eftir undanfarið birtist áfram
í nýju aðalskipulagi Akraneskaup-
staðar sem unnið er að.
Sementsreiturinn er einstakt
svæði. Þar munu á næstu árum
byggjast upp minnst 400 íbúðir
ásamt verslunar- og þjónusturými.
Framkvæmdir eru að hefjast við
fyrsta áfanga, en í mars var geng-
ið frá úthlutun lóða undir allt að
115 íbúðir og er vinna við úthlutun
á næsta áfanga þegar hafin. Það er
einstakt að bæjarfélag fái tækifæri
líkt og þetta þ.e. tæplega 8 hektara
af landi í miðjum bæ. Þetta tækifæri
er mikilvægt að nýta af skynsemi.
Fyrir nokkrum árum var farið
í miklar framkvæmdir við Akra-
torg sem að mínu mati heppnuð-
ust mjög vel. Við þurfum að halda
áfram þeirri vegferð og á sama
tíma skapa tækifæri fyrir íbúa og
atvinnurekendur svo miðbærinn
megi blóstra og eflast. Mikilvægt
er að ná tengingu á milli miðbæjar-
ins og Sementsreitsins með góðum
göngu- og hjóla leiðum. Með því
mætti skapa einstaka upplifun
fyrir íbúa og þá sem sækja Skag-
ann heim, upplifun af því að fara
á milli þessara skemmtilegu svæða
þ.e. hafnarinnar, Sementsreitsins
og miðbæjarins og sækja þar fjöl-
breytta þjónustu og njóta þess sem
umhverfið hefur uppá að bjóða.
Ekki má í þessu sambandi
gleyma Breiðinni, en nú er í gangi
hugmyndasamkeppni um fram-
tíðarskipulag svæðisins og munu
niðurstöður liggja fyrir síðar í
sumar. Markmiðið er að fanga þá
ótal möguleika sem svæðið hefur
upp á að bjóða í sátt við einstaka
náttúru. Íbúabyggð, ferðaþjón-
ustutengd starfsemi eins og hótel
og afþreying og ekki síst atvinnu-
starfsemi tengd hátækni, nýsköpun
og vísindum, möguleikarnir þar eru
miklir.
Dalbrautarreiturinn er eitt af
þeim svæðum sem flestir íbúar
tengja við atvinnustarfsemi. Starf-
semi ÞÞÞ sem flutti þaðan fyrir
nokkrum árum og byggði upp
myndalega starfsstöð á Smiðju-
völlum, starfsstöð OR mun víkja af
svæðinu á næstu vikum, en fyrirtæk-
ið var það fyrsta til þess að byggja
upp í flóahverfinu. N1 mun svo á
næstu tveimur árum flytja alla starf-
semi sína og byggja upp við Haust-
húsatorg. Með þessum breytingum
verður til heildstætt skipulag í takt
við það sem nú þegar hefur risið á
reitnum. Þá eru miklar breytingar
í gangi við Ægisbraut, sem færist
svo úr því að vera hreint iðnað-
arsvæði og yfir í blandaða byggð,
þ.e. íbúðabyggð sem útilokar ekki
atvinnustarfsemi og gefur tækifæri
á umbreytingu svæðisins. Í Flóa-
hverfinu mun svo á næstu árum
rísa iðnaðarhverfi. Grænt hverfi
þar sem áherslan er á sjálfbærni og
hringrásarhagkerfið. Þetta er mikil-
vægt skref enda er öflugt atvinnulíf
forsenda fjölbreyttrar íbúðabyggð-
ar og mannlífs.
Á þessari stuttu, en alls ekki
tæmandi yfirferð, er ljóst að Akra-
nes hefur alla burði til þess að vaxa
og dafna áfram á næstu árum. Að
mörgu er að huga og mikilvægt að
fá fram sjónarmið íbúa sem hafa
ólíkar þarfir og langanir. Skipulag-
ið þarf að vera með þeim hætti að
okkur líði vel í umhverfinu, þægi-
legt sé að komast á milli staða með
mismunandi ferðamáta og um leið
að við fáum að njóta ómetanlegrar
náttúru sem er hér allt í kring um
okkur.
Það er bjart framundan á Skag-
anum.
Ragnar Sæmundsson
Höf. er formaður skipulags- og
umhverfisráðs og skipar 1. sæti á
framboðslista Framsóknar og frjálsra
á Akranesi
Hvað er það sem við leitum að
þegar við veljum okkur stað til að
búa á og ala upp börnin okkar?
Fyrir rúmlega 17 árum síðan
spurðum ég og maður minn okkk-
ur að þessari sömu spurningu. Þá
áttum við heima í Reykjavík í íbúð
í Breiðholti sem hentaði okkur og
okkar fjölskyldu illa og ákveðið var
að leita að hentugra húsnæði. Við
stóðum frammi fyrir því vali að
kaupa íbúð í Reykjavík eða hugs-
anlega leita út fyrir borgarsteinana
að stærra húsnæði. Eftir nokkra
umhugsan ákváðum við að Akranes
væri bærinn sem við vildum búa
í. Hér þekktum við engan, áttum
engar rætur og höfðum sjaldan
heimsótt bæinn. Hvað var það því
sem laðaði okkur að bænum? Jú,
það var einstaklega hagstætt fast-
eignaverð sem gerði gæfumuninn.
Hér gátum við keypt okkur stórt
einbýlishús fyrir sama verð og litla
íbúð í Reykjavík.
Hér höfum við átt heima í að
verða 17 ár og hér viljum við vera
um ókomna tíð. Hér höfum við alið
upp fimm börn og tekið virkan þátt
í skóla- og frístundastarfi þeirra.
Hér höfum við átt okkur bestu
stundir en jafnframt þær verstu.
Við fjölskyldan urðum fyrir því
áfalli fyrir að verða þremur árum
síðan að dóttir okkar veiktist alvar-
lega. Það sem við tók er vart hægt
að lýsa og enginn getur skilið nema
þeir sem hafa gengið í gegnum
sambærilega reynslu. Eftir að hafa
búið hér í þá fjórtán ár, þá vissum
við að við ættum góða að í samfé-
laginu hér en það sem okkur óraði
þó ekki fyrir var hversu samfélag-
ið allt, stóð þétt við bakið á okkur.
Þegar erfiðleikar steðja að, þá
standa Skagamenn saman, í gegn-
um súrt og sætt. Við fengum að
njóta þess styrks og þess samhugar
og fyrir það erum við endalaust
þakklát.
Það sem við höfum séð eftir að
hafa gengið í gegnum þessa erfið-
leika, er hversu gott fólk býr á
Akranesi. Hér ríkir náungakærleik-
ur og samkennd með öðru fólki,
ofar öllu. Við stöndum saman og
hjálpumst að við að gera góðan bæ
enn betri.
Með þetta í huga, þá langar mig
til að hjálpa til við að gera samfé-
lag mitt enn betra og leggja mitt
lóð á vogarskálina til þess. Ég býð
fram krafta mína í komandi sveitar-
stjórnarkosningum og er tilbúin til
að leggja mig alla fram við að gera
Akranes að enn betra samfélagi til
að búa í og ég vonast eftir að fá
brautargengi til þess.
Liv Åse Skarstad
Höfundur er núverandi varabæj-
arfulltrúi Framsóknar og frjálsra og
skipar annað sæti fyrir nk. sveitar-
stjórnarkosningar.
Borgarnes
höfuðstaður Borgar
byggðar og Vesturlands
Skipulagsmál skipta máli
Hvað einkennir
gott samfélag?