Skessuhorn - 01.06.2022, Blaðsíða 14

MIÐVIKUDAGUR 1. JÚNÍ 202214
Hnoðraból, leikskólinn á Klepp-
járnsreykjum í Reykholtsdal, var
opnaður við formlega athöfn
síðast liðinn föstudag. Leikskólinn
var áður til húsa á Grímarsstöðum
en nýtt húsnæði var sambyggt fyrir
skólann við hús Grunnskóla Borg-
arfjarðar á Kleppjárnsreykjum.
Húsnæðið var tekið í notkun fyrir
einu og hálfu ári síðan eða 6. nóv-
ember 2020. Ekki hefur fyrr en nú
verið unnt að halda formlega opn-
un vegna Covid-19 faraldursins.
Vel smurt hjól
fór milli húsa
Sjöfn Guðlaug Vilhjálmsdóttir,
leikskólastýra Hnoðrabóls, seg-
ir mikinn mun að vera í nýju hús-
næði en samt ákveðin sorg að fara
úr gamla húsnæðinu á Grímsstöð-
um þó það hafi verið orðið gamalt
og of lítið. ,,Við vorum einhvern
veginn komin í svo góða rútínu og
það rúllaði allt svo vel hjá okkur
á Grímsstöðum. Einnig var velvild
bændanna á staðnum svo mikil að
það var ómetanlegt. En nú höfum
við þurft að taka þetta vel smurða
hjól og færa það í nýtt húsnæði og
það hefur gengið alveg ótrúlega
vel,“ segir Sjöfn.
Foreldrar fengu ekki að
sjá leikskólann
Sjöfn segir útkomuna með nýtt
hús glæsilega en leikskólarým-
in eru sérstaklega hönnuð í sam-
starfi við starfsfólk skólans og
sniðin þannig að þörfum þessar-
ar tilteknu starfsemi. Í leikskóla-
byggingunni má sjá sérstök rými
fyrir listasmiðju og glæsilegan
sal þar sem börnin geta klifrað
og leikið sér inni við. ,,For-
eldrar fengu ekki að koma inn í
bygginguna til að byrja með þar
sem Covid-reglurnar þá voru það
harðar, sem var náttúrulega alveg
svakalega leiðinlegt. Svo það er
dásamlegt að fá að bjóða foreldra
sérstaklega velkomna í dag,“ seg-
ir Sjöfn.
Mikil hamingja í nýju
húsnæði
Aðspurð um muninn á gömlu og
nýju byggingunni segir hún him-
inn og haf liggja þar á milli. ,,Það
er eiginlega ekki hægt að bera
þetta saman. Ræturnar voru orðn-
ar svo grónar á gamla staðnum og
það tekur alltaf tíma að byggja
upp nýtt líf í nýjum húsum, mað-
ur er svolítið á byrjunarreit þar.
Nú er maður farin að finna réttan
rhytma í starfseminni hér í nýju
umhverfi. Bara t.d. gönguferð-
irnar, við þurftum að læra inn á
leiðirnar. En það má segja að það
ríki mikil hamingja með þetta. Ég
hef alltaf sagt að samfélagið hef-
ur alltaf stutt við skólann, hann
er stofnaður af foreldrum og öll-
um hefur alltaf verið svo umhug-
að um skólann sinn og vel hugs-
að í okkar garð. Það hefur verið
svona þessi vegferð. Hún er búin
að vera rosalega góð.“
Fengu tré til
gróðursetningar
Sjöfn opnaði leikskólann form-
lega ásamt Hlöðveri Inga
Gunnarssyni, sviðsstjóra fjöl-
skyldusviðs Borgarbyggðar.
Þau klipptu á borða með aðstoð
starfsfólks og nemenda Hnoðra-
bóls. Sjöfn segir húsnæðið alveg
tilbúið en það eina sem eigi eft-
ir að klára sé að gróðursetja í
fyrir huguð beð í leikskólagarðin-
um. Helga Jensína Svavarsdótt-
ir skólastjóri Grunnskóla Borgar-
fjarðar gaf Hnoðrabóli plöntur
og Sigurbjörg Ósk Áskelsdótt-
ir frá Landlínum, sem hannaði
skólalóðina, gaf rabarbara fyrir
leikskólabörnin að gróðursetja.
sþ
Formleg opnun Hnoðrabóls á Kleppjárnsreykjum
Leikskólinn Hnoðraból.
Sjöfn leikskólastýra ávarpar börn, foreldra og gesti við formlega opnun skólans.
Hlöðver og Sjöfn klipptu á borða með aðstoð starfsfólks og nemenda.
Sjöfn með gjafir til gróðursetningar frá Grunnskóla Borgarfjarðar og Landlínum.
Gígja Snorradóttir, leikskólaleiðbeinandi, fylgdist með börnunum leika í salnum.
Veglegt kökuhlaðborð.
Glæsileg aðstaða er fyrir börn og starfsfólk.