Borgfirðingabók - 01.12.2008, Blaðsíða 166

166 Borgfirðingabók 2008
Framtíðarvegurinn
Frá Félagi aldraðra í Borgarfjarðardölum
Í dymbilvikunni 2007 fengum við í Félagi aldraðra í Borgarfjarðar-
dölum ungt fólk til liðs við okkur. Á skírdag fluttu systkinin Bjarni
og Kristín María, sem ættuð eru frá Hóli og Fljótstungu í Hvítársíðu,
okkur frumsamin ljóð og smásögur. Snorri á Fossum söng við
undirleik Steinunnar Árnadóttur. Föstudaginn langa var ömmu, afa og
barnadagur. Þá spiluðu fyrir okkur á píanó þau Sólrún í Stóra-Ási og
Heimir frá Dýrastöðum. Ásta og Unnur á Fróðastöðum léku á fiðlur
og Þorgerður á Sámsstöðum söng. Stundum er sagt að gamalt fólk og
ungt eigi ekki samleið. Það var endanlega hrakið þennan dag.
Þorsteinn Pétursson var afinn og fór vel með það hlutverk, en á
engan tel ég hallað þó ég segi að Herdís okkar frá Þverfelli hafi farið
á kostum í hlutverki ömmunnar. Ekki var frítt við að tár hafi sést trilla
niður kinnar, svo var hlegið þegar hún las og staðfærði Hans klaufa.
Á laugardeginum komu svo félagar úr Borgarnesi í heimsókn og
öttu kappi við okkar lið um fróðleik bundinn Borgarfjarðarhéraði, en
keppninni stjórnaði Hjörtur Þórarinsson.
Alla þessa daga var sýning á handavinnu félagsmanna. líka voru
sýndir gamlir munir sem félagar eiga í fórum sínum. Rúmt hundrað
manna keypti af okkur kaffi og vöfflur svo við getum verið ánægð
með fjölda gesta. Dagar þessir voru afar ánægjulegir, ekki hvað síst
fyrir þátttöku ungmennanna, og trúum við því að við getum tekið
undir með Þorsteini Erlingssyni og sagt: Ef æskan vill rétta þér
örvandi hönd/ þá ertu á framtíðarvegi.
RAGNHEiðUR ÁSMUNDSDóTTiR