Golf á Íslandi - 01.10.2016, Blaðsíða 43

Valdís Þóra Jónsdóttir úr Leyni tók einnig þátt en hún komst ekki áfram eftir
að hafa leikið á 81-73-73.
Ólafía segir að aukið sjálfstraust sé lykillinn að árangrinum í Kaliforníu. „Ég
hef spilað vel undanfarið og það hefur mikið að segja fyrir sjálfstraustið. Mér
leið vel og skorið var frábært en það er mikið eftir af þessu ferli til þess að ná
alla leið,“ sagði Ólafía í samtali við mbl.is eftir úrtökumótið.
Það er gríðarlega hörð samkeppni um laus sæti á LPGA atvinnumótaröðinni
í Bandaríkjunum og nálaraugað er þröngt fyrir þá kylfinga sem vilja komast
í hóp þeirra bestu. Um 700 keppendur eru samtals í harðri samkeppni um 20
örugg sæti á LPGA mótaröðinni.
Hvernig kemst Ólafía á LPGA?
Um 350 keppendur tóku þátt á 1. stigi
úrtökumótsins og komust 90 efstu áfram á 2.
stigið. Keppt var á þremur keppnisvöllum á
1. stiginu í Kaliforníu. Á Palmer og Dinah
völlunum á Mission Hills og einnig á Gary
Player vellinum á Westin. Lokahringurinn
fór fram á Dinah vellinum. Á 1. stiginu
kepptu m.a. kylfingar sem enduðu í sætum
151 og neðar á peningalista Symetra
atvinnumótaraðarinnar á þessu ári.
2. stig úrtökumótsins fer fram 20.-23.
október á Plantation golfvallasvæðinu
í Venice í Flórída. Þar verður keppt á
Bobcat og Panther völlunum og leiknar
verða 72 holur á fjórum keppnisdögum.
Þar mæta m.a. til leiks keppendur af
Symetra-mótaröðinni sem voru í 1.-150.
sæti á stigalistanum á þessu tímabili. Um
200 kylfingar komast inn á 2. stigið og
eru ýmsar reglugerðir sem ákveða hvaða
kylfingar komast inn á 2. stigið. Af þessum
200 keppendum komast 80 efstu inn á
lokaúrtökumótið. Þar að auki fá þessir 80
keppendur betri stöðu á styrkleikalista
Symetra atvinnumótaraðarinnar og eru ofar
en þeir sem komust í gegnum niðurskurðinn
af 1. stigi úrtökumótsins.
Lokaúrtökumótið (3. stig) fer fram dagana
30. nóvember - 4. desember á Daytona
Beach í Flórída. Þar mæta um 160
keppendur til leiks og er leikið á Hills og
Jones völlum. Þar verða leiknar alls 90
holur. Þar mæta m.a. til leiks 15 efstu
af stigalista Symetra-mótaraðarinnar, 40
efstu á heimslistanum sem eru ekki með
keppnisrétt á LPGA, 80 efstu af 2. stigi
úrtökumótsins fyrir LPGA og keppendur af
LPGA-mótaröðinni sem ná ekki að tryggja
keppnisrétt sinn á mótaröð þeirra bestu á
árinu 2016. Að loknum 72 holum komast
70 efstu áfram á lokahringinn og keppa
um 45 laus sæti á LPGA. Í fyrra fengu 20
efstu að loknum 90 holum keppnisrétt í
styrkleikaflokki 12 á LPGA, sæti 21.- 45.
fengu keppnisrétt í styrkleikaflokki 17.
Þeir sem voru þar fyrir neðan fengu engan
keppnisrétt á LPGA.
Óvissa á LET
Evrópumótaröðinni
Ólafía Þórunn er með þátttökurétt á
Evrópumótaröðinni, LET, sem er sterkasta
atvinnumótaröð í Evrópu. Hún hefur
fengið mun færri tækifæri á þeirri mótaröð
en vonir stóðu til. Í byrjun september
hafði Ólafía aðeins leikið á tveimur
mótum. Fjárhagserfiðleikar styrktaraðila
mótaraðarinnar hafa sett keppnishaldið
úr skorðum og nokkur mót voru slegin af.
Ólafía gerði ráð fyrir að fá um 10 mót á LET
á þessu tímabili en það gekk ekki eftir. Hún
er örugg með tvö mót á LET í september en
framhaldið er óljóst eftir þau mót.
Ólafía fagnar hér Íslandsmeistaratitlinum ásamt móður sinni
og föður, Elísabetu M. Erlendsdóttur og Kristni J. Gíslasyni.
Mynd/seth@golf.is
Ólafía slær hér upphafshöggið á 1. teig
á lokahringnum á Íslandsmótinu á
Jaðarsvelli á Akureyri. Mynd/seth@golf.is
43GOLF.IS