Árbók Landsbókasafns Íslands - Nýr flokkur - 01.01.1986, Qupperneq 54
54
ÞRJÚ BRÉF RÖGNVALDS ÁG. ÓLAFSSONAR
í öðru bréfinu, dagsettu 25. október 1900, sést, að Rögnvaldur er
þá kominn í Prestaskólann, en hyggur enn á nám í húsagerðarlist og
hefur fengið upplýsingar um slíkt nám bæði frá Guðmundi og
Þorvaldi (Thorvald) Krabbe, er lauk þetta sama ár prófi í byggingar-
verkfræði frá Danmarks Tekniske Hojskole. Þorvaldur, er var
landsverkfræðingur á íslandi 1906-1917 og síðan vita- og hafna-
málastjóri til 1937, minntist Rögnvalds í 1. hefti 2. árgangs Tímarits
Verkfræðingafélags íslands 1917, en Rögnvaldur lézt 14. febrúar það
ár.
Ég birti hér kafla úr grein Þorvalds:
„Fyrstu kynni mín af Rögnvaldi voru um aldamótin. Hann var þá
prestaskólanemandi. Við skrifuðumst á nokkrum sinnum, og bréfin
hans, skrifuð með þessari föstu, reglubundnu rithönd, bera skýran
vott um þá samvizkusemi og þá hreinu lund, sem voru einkenni hans.
Frá æsku var hann hneigður fyrir byggingafræði, en kringumstæður
hans voru erfiðar; hann þóttist ekki fær um að ganga þá braut, sem
ætíð hafði staðið fyrir honum eins og ljómandi draumsýn, sem hann
ekki gat fengið uppfyllta, eins og hann komst að orði í fyrsta bréfinu.
Þess vegna hafði hann kosið hið næstbezta, sem var guðfræðin. En
með styrk úr landssjóði og láni úr Landsbankanum steig hann þó
sporið og sigldi haustið 1901 til þess að byrja námið í byggingafræði í
Kaupmannahöfn. Langt auðnaðist honum reyndar ekki að komast á
skólunum þar; hann var snemma heilsulítill og gat því ekki lesið af
eins miklu kappi og hann vildi; þar að auki varð hann að vinna
nokkuð meðfram náminu, hann teiknaði um tíma hjá hinum fræga
byggingameistara prófessor Fenger í Kaupmannahöfn, en veturinn
1903—1904 varð hann að gefast upp og fara á heilsuhæli á Boserup.
Um vorið 1904 kom hann hingað heim og hætti skólanámi úr því.
Og hér heima lá nóg verkefni fyrir hann; hann hefur síðan starfað
sem húsameistari og stöðugt afiað sér dýpri og víðsýnni þekkingar
bæði með lestri og reynslu. Fastan starfa fékk hann hjá stjórninni sem
ráðunautur við byggingu kirkna og skólahúsa, og á því svæði hefur
hann unnið mikið og þarft verk. Hann hefur gert uppdrátt að mörgum
þessháttar byggingum, og ég efast ekki um, að flestir muni vera
sammála um, að þær kirkjur, sem hann byggði, sérstaklega á seinni
árum, hafi heppnazt honum mæta vel, ekki sízt þjóðkirkjan í
Hafnarfirði og Keflavíkurkirkjan.“
I bréfinu 25. október 1900 þakkar Rögnvaldur Guðmundi „kærlega
fyrir allar upplýsingarnar og þinn hlýja hug, því að slíkt er fremur