Lögmannablaðið - 01.12.2006, Blaðsíða 4
4 < LÖGMANNABLAÐIÐ – 4 / 2006
Frá ritstjórn
Hrafnhildur Stefánsdóttir hrl.
Kröfur til lögmanna og starfsumhverfi eru sífellt
að breytast. Eins og fram kemur í þessu tölublaði
taka ný lög um aðgerðir gegn peningaþvætti gildi
þann 1. janúar næstkomandi og gera þau umtals-
vert meiri kröfur til lögmanna en nú er. Reglur
um málskostnað í opinberum málum og opinbera
réttaraðstoð eru í endurskoðun en fjallað er um
athugasemdir starfshóps Lögmannafélagsins um
þær tillögur sem settar hafa verið fram í blaðinu.
Grunaðir, rannsakendur og ákæruvald keppast um
að tjá sig um rannsóknir meintra brota í fjölmiðl-
um eins og fram kemur í pistli formanns. Hann
bendir réttilega á að hætt er við að umræðan skaði
tiltrú almennings á réttarkerfinu í heild sinni geti
menn ekki nálgast málin af hlutlægni og yfirveg-
un. Þar sé komið að hlutverki okkar lögmanna.
Það sé ekki einungis réttur okkar heldur skylda
að taka þátt í umræðunni og sigta út ágreinings-
atriðin sem varða réttarkerfið sjálft, skilvirkni
þess og trúverðugleika. Lögmannablaðið gegn-
ir þar hlutverki sem vettvangur virkrar umræðu
um réttarframkvæmd og dóma. Það er stefna rit-
stjórnarinnar að hvetja til slíkrar umræðu á síðum
blaðsins. Í þessu tölublaði er svo dæmi sé tekið að
finna umfjöllun um tvo nýja dóma Hæstaréttar.
Þá er hér einnig að finna ýtarlega umfjöllun um
málþing Lögmannafélagsins og Dómarafélagsins
um auðlindarétt og auðlindanýtingu. Málþingum
og fundum um lögfræðileg efni hefur fjölgað
mjög í seinni tíð en þar fer einnig fram mjög
mikilvæg umræða um lögfræðileg málefni og rétt-
arframkvæmd sem ritsjórnin telur rétt að segja frá
í blaðinu.
Ritstjórnin hefur það einnig á stefnuskrá sinni að
fjalla ítarlega um starfsumhverfi lögmanna á næsta
ári, bæði þeirra sem starfa á lögmannsstofum og
hinna sem eru hjá fyrirtækjum eða samtökum.
Undirbúningur að þeirri umfjöllun er þegar haf-
inn. Lögmenn eiga því von á spurningum um
rekstrarfyrirkomulag og fleiri atriði á næstunni.
Könnunin verður rafræn og svörin órekjanleg.
Vonast er til að að hægt verði að endurtaka könn-
unina reglulega og fylgjast þannig með þróun-
inni innan greinarinnar. Verulegar breytingar hafa
þegar orðið á starfsumhverfi lögmanna, m.a. með
samruna og stækkun lögmannsstofa og aukinni
menntun og sérhæfingu. Ætla má að sú þróun
muni halda áfram. Fjölgun lögfræðinga og aukin
breidd í námi þeirra mun væntanlega einnig
hafa áhrif. Systursamtökin á Norðurlöndum gera
reglulega slíkar kannanir og sækja þangað mik-
ilvægar upplýsingar um stöðu greinarinnar. Er
gjarnan vitnað til þeirra í umfjöllun í þarlend-
um lögmannablöðum. Umræðan verður þannig
markvissari. Þótt tilfinningin ein sé góðra gjalda
verð er betra að byggja á staðreyndum og vita
um þær hreyfingar sem eru á hverjum tíma innan
greinarinnar og hvert við stefnum.
Með ósk um gleðileg jól og gott nýtt ár.