Lögmannablaðið - 01.12.2006, Blaðsíða 20

20 < LÖGMANNABLAÐIÐ – 4 / 2006
Opin fjölmiðlaumræða um ýmis þjóðfélagsmál er
almennt af hinu góða, þ.e.a.s. ef hún fer fram af
yfirvegun og þekkingu á viðkomandi málefni. Þá er
hún líkleg til að vera uppbyggjandi og skila okkur
með jákvæðum hætti fram á veg. Ýmis lögfræðileg
málefni hafa verið mjög mikið til umræðu í fjöl-
miðlum á síðustu misserum. Það eru einkum rann-
sóknir meintra brota og opinberar saksóknir gegn
áberandi fólki í viðskiptalífinu sem fangað hafa
athygli fjölmiðlanna, eins og t.d samkeppnismál
olíufélaganna, Baugsmál og fleira. Grunaðir, rann-
sakendur og ákæruvald keppast við að tjá sig um
málefnin í blöðum og ljósvakamiðlum með mis-
jafnlega vel ígrunduðum hætti svo mögum þykir
nóg um enda öruggt að lang flestir landsmenn eru
gersamlega búnir að týna þræðinum í þessu öllu
saman. Eftir stendur í augum þeirra sem standa
utan innsta hrings, eða hafa ekki góða þekkingu
á „kerfinu“, að þetta sé allt eitt stórt rugl með
ekkert upphaf og engan endi. Sé þetta rétt álykt-
un er stórkostleg hætta á að tiltrú almennings á
lögreglu, ákæruvaldi, dómstólum og lögmönnum,
þ.e. réttarkerfinu í heild sinni, minnki verulega ef
umræðan er látin takmarkast við drullukökukast
þeirra sem eru svo tengdir viðkomandi málum að
þeir geta engan veginn nálgast þau af hlutlægni og
yfirvegun.
Þarna er einmitt komið að hlutverki okkar lög-
manna. Það er ekki einungis réttur okkar heldur
beinlínis skylda að taka þátt í umræðunni. Ekki
til að blanda okkur efnislega í einstök mál, eða
ásakanir manna sem tengjast þeim, heldur til að
sigta úr umræðunni ágreiningsatriðin sem varða
réttarkerfið sjálft, skilvirkni þess og trúverðugleik
og benda á það sem vel er gert eða betur mætti
fara. Sem sagt, leggja orð í belg með efnislega upp-
byggilegum hætti. Réttarkerfið er ekki einungis
partur af því sem við höfum sérstaklega menntað
okkur í, heldur erum við lögmenn beinlínis hluti
af þessu kerfi og berum því enn ríkari skyldur af
þeim sökum. Vel ígrunduð og upplýst umræða
um þessi mál er eins og áður segir líkleg til að skila
okkur fram á veg. Veg til enn betra og skilvirkara
réttarkerfis.
Formannspist­ill
Helgi Jóhannesson hrl.