Skólavarðan - 01.05.2008, Blaðsíða 3
3
FORMANNSPISTILL
Formaður og varaformaður KÍ og formenn aðildarfélaga KÍ skiptast á um að skrifa
formannspistla í Skólavörðuna. Félögin á bak við formannspistlana eru: Félag
framhaldsskólakennara (FF), Félag grunnskólakennara (FG), Félag leikskólakennara
(FL), Félag stjórnenda í framhaldsskólum (FS), Félag tónlistarskólakennara (FT),
Skólastjórafélag Íslands (SÍ).
SKÓLAVARÐAN 2.TBL. 8. ÁRG. 2008
Mánudaginn 29. apríl 2008 var skrifað undir nýjan kjarasamning
milli Félags grunnskólakennara og Launanefndar sveitarfélaga.
Samið var til eins árs og nema launaleiðréttingar allt að 23%. Þær
koma allar fram á fyrstu sjö mánuðum samningsins. Meðalgrunnlaun
grunnskólakennara verða á þessum sjö mánuðum komin upp fyrir
meðalgrunnlaun leikskólakennara og til jafns við meðalgrunnlaun
framhaldsskólakennara. Þegar skoðuð eru dæmi þá fara dæmigerð
byrjunarlaun kennara sem er yngri en 30 ára úr 210.844 kr. í
265.240 kr. Meðalgrunnlaun (vegið meðaltal) umsjónarkennara 2
fara úr 261.040 kr. í 315.890 kr.
Í samningsmarkmiðum FG var lögð áhersla á stuttan kjara-
samning, að leiðrétta laun til jafns við helstu viðmiðunarstéttir og
án þess að þurfa að gefa neitt eða selja af áunnum réttindum okkar.
Einnig settum við okkur það markmið að reyna af öllum mætti að
semja áður en gildandi kjarasamningur rynni út og án átaka. Öllum
þessum markmiðum náðum við.
En er þetta nóg? Það er öllum ljóst að gera þarf enn betur. Við
lítum svo á að þetta sé fyrsta skrefið í þá átt að gera kennarastarfið
samkeppnishæft á vinnumarkaði. Til þess að svo megi verða þarf
auðvitað að leiðrétta kjör okkar enn frekar. Ég tel þetta vissulega
jákvæðan áfanga og mér er til efs að á seinni árum hafi náðst önnur
eins leiðrétting á jafn stuttum tíma og nú. Staðan var vissulega
slæm og nauðsynlegt að laga hana verulega.
Jákvæðni, uppbygging og fagleg vinnubrögð ríkjandi
Undirbúningur þessa kjarasamnings hefur staðið í eitt og hálft ár.
Núverandi formenn samninganefnda FG og LN ákváðu á sínum
tíma að taka upp ný og breytt vinnubrögð sem áttu að vera til þess
fallin að auka skilning milli aðila, byggja upp traust og auðvelda
kjaraviðræður. Í aðdraganda viðræðna var lögð mikil áhersla á sam-
eiginlegan undirbúning sem meðal annars fólst í sameiginlegri
athugun aðila á launalegri stöðu grunnskólakennara gagnvart
öðrum stéttum. Einnig fór fram mikil gagnkvæm vinna hjá aðilum
um skólamálin.
Þegar formlegar kjaraviðræður hófust lágu þessar sameigin-
legu niðurstöður fyrir og um þær ríkti sátt, enda unnar af báðum
aðilum. Þeir byrjuðu á því að setja sér sameiginleg markmið og
hófust svo handa við að finna sameiginlega leið að þeim. Þetta tókst
mjög vel og lauk, eins og áður hefur komið fram, í lok apríl. Það er
skemmst frá því að segja að það kom mörgum gleðilega á óvart að
samningar skyldu takast eftir heldur stormasöm samskipti við LN á
undanförnum árum.
Ég bind miklar vonir við þessi nýju vinnubrögð. Með þeim hefur
skapast traust milli aðila sem er afar mikilvægt. Í samskiptum okkar
við LN síðastliðna mánuði kveður við nýjan og betri tón sem gefur
okkur von um að ætla að sveitarfélögum sé full alvara í því að gera
grunnskólann að eftirsóttum og samkeppnishæfum vinnustað.
Ólafur Loftsson
Hálfnað er verk þá hafið er
Ólafur Loftsson
Formaður FG