Dagur - 16.12.1987, Side 4

4 - DAGUR - 16. desember 1987
wmm,
ÚTGEFANDI: ÚTGÁFUFÉLAG DAGS
SKRIFSTOFUR:
STRANDGATA 31, PÓSTHÓLF 58, AKUREYRI
SlMI: 24222
ÁSKRIFT KR. 560 Á MÁNUÐI
LAUSASÖLUVERÐ 55 KR.
GRUNNVERÐ DÁLKSENTIMETRA 400 KR.
RITSTJÓRAR:
ÁSKELL ÞÓRISSON (ÁBM.)
BRAGI V. BERGMANN
BLAÐAMENN:
ANDRÉS PÉTURSSON
(Reykjavík vs. 91-17450, pósthólf 5452, 105 Reykjavík),
ÁSLAUG MAGNÚSDÓTTIR, EGGERTTRYGGVASON, EGILL BRAGASON,
INGIBJÖRG MAGNÚSDÓTTIR (Húsavík vs. 41585),
JÓHANN ÓLAFUR HALLDÓRSSON, KRISTJÁN KRISTJÁNSSON (íþróttir),
PÁLL B. VALGEIRSSON (Blönduósi vs. 95-4070), STEFÁN SÆMUNDSSON,
TÓMAS LÁRUS VILBERGSSON, VILBORG GUNNARSDÓTTIR,
ÞÓRHALLUR ÁSMUNDSSON (Sauöárkróki vs. 95-5960),
AUGLÝSINGASTJÓRI: FRÍMANN FRlMANNSSON
ÚTBREIÐSLUSTJÓRI:
HAFDlS FREYJA RÖGNVALDSDÓTTIR, HEIMASlMI 25165
FRAMKVÆMDASTJÓRI: JÓHANN KARL SIGURÐSSON
PRENTUN: DAGSPRENT HF.
Húsnæðisfrumvarp
ríkisstjórnarinnar
Búast má við að „þrautagöngu" Jóhönnu Sig-
urðardóttur félagsmálaráðherra vegna hús-
næðisfrumvarpsins fari nú senn að ljúka, því
frumvarpið verður væntanlega samþykkt sem
lög frá Alþingi innan skamms. Það mun þó
taka talsverðum breytingum áður en yfir
lýkur, enda var ljóst að frumvarpið nyti ekki
meirihlutastuðnings í upphaflegri mynd.
Fá mál hafa valdið meira fjaðrafoki í ríkis-
stjórninni né orðið tilefni stóryrtari yfirlýsinga
en húsnæðisfrumvarpið. í fyrstu var á félags-
málaráðherra að skilja að ef svo mikið sem
einu ákvæði í frumvarpi hennar yrði breytt í
meðförum þingsins, væri stjórnarsamstarfið í
hættu. Yfirlýsingar eins og „alvarlegir þver-
brestir í stjómarsamstarfinu" og fleiri í þeim
dúr voru hvergi sparaðar og hlaut málið mikla
umfjöllun fjölmiðla fyrir vikið. Ákvörðun
Jóhönnu Sigurðardóttur um að hætta að sitja
ríkisstjórnarfundi til að þrýsta á framgang
frumvarpsins á þingi, vakti einnig athygli.
En nú er hismið óðum að skiljast frá kjarn-
anum. Húsnæðisfrumvarpið var afgreitt frá
neðri deild Alþingis um síðustu helgi með 25
samhljóða atkvæðum. í áliti meirihluta félags-
málanefndar neðri deildar er lagt til að það
verði samþykkt og að ekki verði gerðar
grundvallarbreytingar á því húsnæðiskerfi
sem komið var á vorið 1986. í meðförum
nefndarinnar var umdeilt ákvæði um að ríkis-
stjórninni væri heimilt að ákvarða mismun-
andi vexti innan hvers málaflokks eða að
endurgreiða vexti, fellt niður, enda talið ill-
eða óframkvæmanlegt. Þá voru heimildar-
ákvæði húsnæðisstjórnar, um að skerða eða
synja einstökum umsækjendum um lán, tals-
vert þrengd. í þeirri mynd má búast við að
frumvarpið verði samþykkt.
Jóhanna Sigurðardóttir félagsmálaráðherra
mun væntanlega sætta sig við frumvarpið
með þeim breytingum sem á því verða
gerðar. Þegar nýja húsnæðislánakerfið var
lögfest vorið 1986 ríkti mikil eining um það,
enda um stökkbreytingu að ræða til hins
betra frá því sem var. Það hefur aldrei verið
ástæða til að rjúfa þá einingu með yfirlýsing-
um um að nýja húsnæðiskerfið sé hrunið eða
um það bil að hrynja. Húsnæðiskerfið stendur
traustum fótum og tilgangur hins nýja frum-
varps er að koma á jafnvægi í því, svo sem
kveðið er á um í stjórnarsáttmálanum.
Rökrétt framhald er síðan að taka húsnæð-
iskerfið til gagngerrar endurskoðunar með
hliðsjón af fenginni reynslu. En það verður
ekki gert í einni svipan. BB.
viðtol dogsins
„Her eru góð skilyrði fyrir
vænlegri þróun byggðar"
- Haukur Sigurðsson sveitarstjóri á Blönduósi í viðtali dagsins
í viðtal dagsins fengum við að
þessu sinni Hauk Sigurðsson
sveitarstjóra á Blönduósi, en
því starfí hefur Haukur sinnt
sl. eitt og hálft ár. Fyrstu kynni
hans af bæjarstjórnarmálum
voru þegar hann var bæjarrit-
ari á Akranesi í þrjú ár. Eftir
dvölina á Akranesi flutti
Haukur svo norður á Akureyri
og bjó þar í ein sex ár þar til
hann tók við starfí sveitar-
stjóra hér á Blönduósi. Við
byrjum á því að spyrja hvemig
starf það sé að vera sveitar-
stjóri.
„Sveitarstjórastarfið er viða-
mikið alvörustarf og ég held að
ég fari ekki með neinar ýkjur,
þegar ég segi að svona starfi
sinna menn ekki af neinu viti
nema að leggja sig alla fram, og
vinnutíminn er lengri en það að
hægt sé að segja að þetta sé átta
tíma starf. Það má vera að ein-
hverjum finnist að maður sé með
nefið ofan í öllum sköpuðum
hlutum, en það er nú einu sinni
þannig í þessu starfi, að ef maður
ætlar sér að fylgjast með því
hvernig hlutirnir ganga fyrir sig,
þá verður maður að vita fyrir víst
hvað er að gerast hverju sinni og
það er ætlast til þess af manni.“
- Hvað gerir sveitarstjórinn í
sínum frítíma, þegar erli vinnu-
dagsins lýkur?
„Því er nú þannig farið með
mig að ég hef gaman af hinu og
þessu, en oft vill það fara á þann
veginn hjá mér að ég kýs að vera
heima í ró og næði með minni
fjölskyldu. Annars stunda ég
töluvert sund og hef gaman af að
renna fyrir silung, svona af og til.
Ég hef gaman af að syngja og er
reyndar nýbyrjaður í kirkju-
kórnum og hef mikla ánægju af.
Þá erum við með í athugun að
stofna lúðrasveit hér á staðnum,
hér eru nefnilega margir prýðis-
góðir hljóðfæraleikarar. A þess-
ari upptalningu sérðu að ég geri
eitt og annað í mínum frístund-
um.“
- Hvað með atvinnumálin hér
á Blönduósi Haukur, er næga
atvinnu að hafa?
„Hér hefur verið mjög mikil
atvinna að undanförnu og vantað
fólk býsna víða. Ástandinu verð-
ur kannski best lýst með því að
segja að okkur hafi vantað fólk
allt síðasta ár í töluverðum mæli.
Það eru ýmis fyrirtæki hér á
staðnum með á prjónunum mikla
aukningu á starfsemi sinni í fram-
tíðinni, þannig að ef fram fer sem
horfir í þeim efnum, þá má gera
ráð fyrir að okkur komi áfram til
með að vanta fólk til iðnaðar- og
framleiðslust arfa. “
- Ein spurning brennur á
margra vörum hér um slóðir
Haukur og það er í sambandi við
höfnina, hvernig miðar fram-
kvæmdum í þeim málum?
„Hafnarframkvæmdir hér á
Blönduósi standa þannig í dag,
að það sem um ræðir að gera, er
í fáum orðum sagt það, að
vernda þá höfn sem við höfum í
dag gegn ágangi sjávar. Það er
fyrirhugað að reisa brimgarð
220 m Iangan fyrir norðan bryggj-
una, nú og um leið og hann
er kominn, þá skapast ágætis
aðstaða fyrir smábáta í vikinu á
milli bryggjunnar og brimvarn-
argarðsins. Þetta er svona í mjög
grófum dráttum það sem í dag er
verið að tala um. Sem sagt það að
vernda það sem fyrir er, en slá
samt tvær flugur í einu höggi og
fá í leiðinni aðstöðu fyrir smá-
báta eins og ég nefndi hér áðan.
Ég legg á það mikla áherslu að ég
álít það mjög brýnt fyrir Blöndu-
ós að hafa þessa götu til sjávar
sem bryggjan er. Við vitum báðir
að fjármagnið er í sjávarútvegn-
um, í útgerð og í fiskvinnslu, þess
vegna dreg ég engan dul á það,
hversu brýnt ég álít að á Blöndu-
ósi sé þokkaleg aðstaða fyrir
skip.“
- Einu hefur maður tekið eftir
á allra síðustu árum og það er
hve bærinn virðist vera að taka
miklum stakkaskiptum hvað við-
kemur snyrtilegu umhverfi og
umhirðu almennt, er lögð mikil
áhersla á umhverfismálin?
„Þannig er að á síðustu áratug-
um hafa þéttbýlisstaðirnir á land-
inu verið í önnum við að byggja
upp sínar frumþarfir, þar á ég
t.d. við vatnsveitur, hitaveitur
þar sem þær eru og gatnakerfi
svo það helsta sé nefnt. Nú er því
þannig farið hér hjá okkur að við
erum mikið til búin með þessa
þætti. Hér er mikill áhugi fyrir
umhverfismálum og sveitar-
stjórnin hefur á undanförnum
árum lagt sig fram um að sinna
þeim þætti og ekki ástæða til ann-
ars en að ætla að svo verði áfram.
Það hefur veitt mér mikla ánægju
að t.d. í sumar þá var fólk sem
hafði komið hingað áður fyrr og
eins fólk sem hafði ekki komið
hér áður, að tala um það hve fal-
legt og snyrtilegt væri hér. Þegar
maður heyrir fólk tala svona þá
vitanlega tvíeflist maður og
gleymir amstrinu og þvarginu í
kringum þetta.“
- Að lokum Haukur ertu
bjartsýnn á framtíð og uppgang
Blönduóss?
„Jú, það er ég vegna þess að
hér eru fyrir hendi margir þeir
þættir sem talið er núna að hafi
veruleg áhrif á það hvar fólk vel-
ur búsetu og hvar það vill búa.
Hér áður var þetta hugsað þannig
að það væri gott að búa þar sem
væru mestar tekjurnar. í dag
virðast fleiri þættir ráða ferðinni í
þessum málum t.d. aðstaða til
menntunar, menningarlegt um-
hverfi, heilbrigðis- og verslun-
arþjónusta, aðstaða til útivistar
t.d. hestamennska, golf o.fl., nú
og svo samgöngurnar. Á öllum
þessum sviðum hefur Blönduós
mjög góða stöðu. Við erum rétt
við hringveginn, við erum með
vel mannaðan skóla og sjúkrahús
og öfluga verslun. Þannig að ef á
allt er litið þá eru skilyrði hér hin
bestu fyrir vænlegri þróun
byggðar," sagði Haukur Sigurðs-
son sveitarstjóri að lokum. pbv