Morgunblaðið - 25.10.2001, Síða 10

FRÉTTIR
10 FIMMTUDAGUR 25. OKTÓBER 2001 MORGUNBLAÐIÐ
FLUTNINGUR Byggðastofnunar
frá Reykjavík til Sauðárkróks hefur
reynst farsællega, að sögn Theó-
dórs Bjarnasonar, forstjóra
Byggðastofnunar, en nú eru liðnir
tæpir 5 mánuðir frá því að starf-
semin var öll flutt norður. Theódór
segir ákvörðun um flutning stofn-
unarinnar hafa verið hárrétta og
tekist hafi vonum framar að ráða
vel menntað og hæft starfsfólk að
stofnuninni.
„Þetta hefur að sjálfsögðu verið
krefjandi en ákaflega spennandi
verkefni, að mínu mati. En þetta
hefur gengið farsællega, þ.e.a.s. að
fá stofnunina til að starfa aftur með
eðlilegum hætti eftir flutningana,“
segir Theódór.
Þá segir hann mannaráðningar
hafa gengið einstaklega vel og
stofnunin sé næstum fullmönnuð á
ný, eftir að stór hluti starfsmanna
lét af störfum þegar stofnunin var
flutt til Sauðárkróks 1. júní sl. Í
dag starfa um 20 manns hjá
Byggðastofnun og segir Theódór að
bæta þurfi þremur til fjórum starfs-
mönnum við til þess að stofnunin
verði fullmönnuð.
„Ég er einstaklega ánægður með
þessar ráðningar. Það sem er
ánægjulegt er að okkur hefur tekist
að ráða vel menntað og áhugasamt
fólk sem skilar sér langt framar öll-
um vonum,“ segir Theódór.
Byggðastofnun hefur þó ekki slit-
ið öll tengsl við höfuðborgina, enda
segir Theódór óhjákvæmilegt að
starfsfólk stofnunarinnar geti sinnt
nauðsynlegum erindum í Reykja-
vík.
„Það eru margir sem eiga erindi
við Byggðastofnun. Það er óraun-
hæft að ætla að hægt sé að slíta öll
tengsl við höfuðstöðvar stjórnsýsl-
unnar og að einangra stofnunina.
Ákveðin samskipti við stofnanir og
hagsmunaðila eru nauðsynleg og
verða ekki leyst í gegnum fjar-
skipti. Þess vegna var einhugur um
þá ákvörðun að hafa aðstöðu í
Reykjavík til að sinna þeim verk-
efnum sem ekki verða leyst í gegn-
um nýjustu fjarskiptatækni.“
Theódór segir af gefnu tilefni að
um sé að ræða tvö lítil herbergi hjá
Lánasýslu ríkisins við Hverfisgötu
6 og er annað herbergið í tíma-
bundinni leigu fyrir einn af lög-
fræðingum stofnunarinnar sem læt-
ur af störfum við lok viðamikils
verkefnis sem hann þarf að ljúka.
Hitt herbergið notar forstjóri,
stjórnarformaður og annað starfs-
fólk eftir þörfum í tengslum við
verkefni sem þarf að leysa í
Reykjavík. Þá gerði stofnunin sam-
komulag við Lánasýsluna um afnot
af fundarsal þegar halda þarf fjöl-
mennari fundi.
Mikil samstaða og
áhugi meðal starfsfólks
Að sögn Theódórs þarf hann að
sinna erindum í Reykjavík að með-
altali einu sinni í viku og því sé
óumflýjanlegt að hafa þar eitthvað
afdrep en því sé haldið í algjöru
lágmarki. Hann segir starfsmenn
stofnunarinnar reyna í lengstu lög
að nýta sér nýjustu tölvutækni í
samskiptum, en hins vegar sé oft
nauðsynlegt að hitta fólk augliti til
auglitis.
Aðspurður hvort það standi þá
ekki Byggðastofnun fyrir þrifum að
vera ekki í höfuðborginni, segir
Theódór það alls ekki vera svo. „Því
öll þessi samskipti er hægt að
leysa, það er engin spurning. Það
er síðan að sjálfsögðu alltaf hægt
að finna kosti og galla en mér
finnst þetta hafa farið mjög farsæl-
lega af stað og það er mikil sam-
staða og áhugi meðal starfsfólks
stofnunarinnar.“
Þá segir Theódór það ótvírætt að
fólk líti Byggðastofnun jákvæðari
augum eftir að hún var flutt út á
landsbyggðina. „Þetta er stofnun
landsbyggðarinnar og ég finn að
viðhorfið er ákaflega þægilegt. Ég
tel að það sé mjög gott að stofnunin
var flutt út á land og allt bendi til
að þetta hafi verið hárrétt ákvörð-
un,“ segir Theódór.
Forstjóri Byggðastofnunar segir góða reynslu af flutningi stofnunarinnar til Sauðárkróks
Hárrétt ákvörðun
að flytja norður
EINS OG fram kom hér í blaðinu
í gær hefur hugsanlegum kjöl-
festufjárfestum verið gefinn frest-
ur til að skila inn óbindandi verð-
tilboði í kjölfestuhluta Landssíma
Íslands hf. Áður en frestur var
gefinn var miðað við að tilboðum
yrði skilað inn síðastliðinn mánu-
dag en fresturinn gerir ráð fyrir
að tilboðum skuli skilað inn á
morgun.
„Í fréttatilkynningu sem fjöl-
miðlum var send 30. september
síðastliðinn kom fram að í fram-
haldi af því að 17 yfirlýsingar
höfðu borist um áhuga á að gerast
kjölfestufjárfestir í Landssíma Ís-
lands hf. hefst ákveðið ferli sem
lýst er í tilkynningunni. Þar segir
í öðrum tölulið að á grundvelli
skýrslu sem aðilum verður send
skili þeir inn óbindandi verðtilboði
eigi síðar en 22. október. Í til-
kynningunni er söluferlinum lýst
nánar og jafnframt tekið fram í
lokin að ekki verða veittar nánari
upplýsingar um þátttakendur eða
framgang söluferilsins fyrr en að
honum loknum,“ segir Hreinn
Loftsson, formaður einkavæðing-
arnefndar.
Áttu ekki von á neinum
tilboðum á mánudaginn
„Það sem gerðist svo á þriðju-
dag og miðvikudag í síðustu viku
er að nokkrir þeirra sem áhuga
hafa á að taka þátt höfðu samband
við einkavæðingarnefnd og Price-
waterhouseCoopers í London og
óskuðu eftir nokkurra daga fram-
lengingu frestsins. Strax frá upp-
hafi hafa menn gert sér grein fyr-
ir að það þarf að vera ákveðinn
sveigjanleiki í ferlinum og það er
ekkert úrslitaatriði hvort frestur-
inn er miðaður við 22. eða 26.
þessa mánaðar. Lokapunkturinn,
þ.e. í lok nóvember, skiptir aftur á
móti meira máli því að þá er gert
ráð fyrir að menn skili inn bind-
andi tilboðum.
Framvinda málsins var sú að á
fimmtudag í síðustu viku sendum
við öllum þátttakendunum bréf
þar sem tilkynnt var að fresturinn
yrði framlengdur frá 22. til 26. og
þar með þyrftu menn ekki að skila
inn þessum óbindandi tilboðum
fyrr en 26., þ.e. á föstudaginn. Við
áttum þess vegna ekki von á nein-
um tilboðum á mánudaginn,“ segir
Hreinn.
Hann bætir við að ekki hafi ver-
ið talin ástæða til að tilkynna
Verðbréfaþingi Íslands um þessa
breytingu og um þetta hafi einka-
væðingarnefnd
og Pricewater-
houseCoopers í
London verið
sammála. „Við
sáum ekki
ástæðu til að
tilkynna þetta
til Verðbréfa-
þings því að
þessi dagsetn-
ing breytir í sjálfu sér ekki
miklu,“ segir hann. „Það er hins
vegar þegar ferlinu lýkur og menn
eru komnir með skuldbindandi til-
boð í hendur að ástæða er til að
tilkynna það inn á Verðbréfa-
þing.“
Hann segir þetta vera skilning
sem Verðbréfaþingið geti ekki
gert athugasemd við, hins vegar
hafi einhver komið upplýsingum
um frestinn á framfæri við fjöl-
miðil á mánudag og þannig hafi
þetta lekið út. „Eftir það hefur
Verðbréfaþing samband við okkur
og fór fram á að þetta yrði upp-
lýst. Við urðum við þeirri beiðni
og Landssíminn sendi fréttatil-
kynningu um þetta
inn á Verðbréfaþingið
í morgun [þ.e. mið-
vikudagsmorgun].“
Tæknilegar ástæð-
ur fyrir frestinum
Hreinn segir að
það upphlaup sem
orðið hefur í fjölmiðl-
um sé því algerlega
tilefnislaust. „Svo-
kölluð fréttaskýring
sem kom um málið í
DV í dag [þ.e. í gær]
þar sem menn eru
með fullyrðingar um
að engir erlendir að-
ilar hafi áhuga á þessu er alger-
lega úr lausu lofti gripin og styðst
ekki við okkar reynslu,“ segir
hann. „Niðurstaða okkar eftir
fundina í London í vikunni er
þvert á móti sú að sá mikli áhugi
sem fram kom í upphafi sé enn
fyrir hendi. Sá frestur sem nú var
veittur er alls ekki til marks um
áhugaleysi eins og látið hefur ver-
ið liggja að, miklu fremur hið
gagnstæða. Ef fyrirtækin hefðu
engan áhuga hefðu þau einfald-
lega látið frestinn líða án þess að
gera tilboð. Það biður enginn um
svona frest að gamni sínu. Það
sem er að gerast
er einfaldlega
fólgið í því að
eftir að fyrirtæki
hafa sent inn
svona tilboð
munu þau í kjöl-
farið fara í áreið-
anleikakönnun
(e. due diligence)
á Landssíman-
um. Í sambandi við hana munu
menn stofna til margvíslegs kostn-
aðar og kynna sér fyrirtækið til
hlítar á grundvelli sérstaks samn-
ings sem þeir gera þar að lútandi.
Þá er komin mikil alvara í málið.“
Spurður um ástæður sem vænt-
anlegir bjóðendur hafi gefið fyrir
því að óska eftir fresti segir
Hreinn að þeir hafi einfaldlega
þurft nokkra daga í viðbót til að
ganga frá tilboði. Ástæðurnar séu
tæknilegs eðlis, svo sem að bjóð-
endur þurfi að ná saman stjórn-
arfundi í fyrirtækjum sínum.
„Jafnvel þótt tilboðið sé ekki
skuldbindandi er því ætlað að vera
leiðbeinandi og þess vegna verður
að vanda vel til þess
af hálfu væntanlegra
bjóðenda. Fyrirtækin
sem hafa í hyggju að
bjóða eru verulega
öflug og sterk og þau
skjóta ekki út í loftið í
svona tilboði þótt það
sé ekki bindandi. Það
er ekki nema eitthvað
verulega athugavert
komi í ljós í áreiðan-
leikakönnun að menn
lækka tilboð sitt frá
því sem þeir hafa boð-
ið. Fyrirtækin hafa
sem kunnugt er feng-
ið nokkuð ítarlegan
upplýsingapakka og á þeim
grundvelli eiga þau að geta gert
leiðbeinandi tilboð. Eftir að leið-
beinandi tilboðin liggja fyrir eru
valdir þeir sem halda áfram og
fara í áreiðanleikakönnunina og þá
fá þeir enn fyllri upplýsingar um
einstök atriði,“ segir Hreinn.
Engar deilur og engin óvissa
„Þetta söluferli vegna kjölfestu-
fjárfestisins er ekkert sem við
höfum fundið upp eða er smíðað
sérstaklega fyrir Landssímann.
Þetta er margreynt og notað við
sölu stórra fyrirtækja um allan
heim og PricewaterhouseCoopers
hefur mikla reynslu af þessu fyr-
irkomulagi,“ segir Hreinn. Að-
spurður sagði hann að erlendu
ráðgjöfunum hjá Pricewater-
houseCoopers hefði ekki komið á
óvart að beðið hefði verið um
frest, það þætti ekki óeðlilegt.
„Það veldur manni ákveðnum
áhyggjum,“ bætti Hreinn við, „að
það vill gerast að aðilar sem ekki
koma fram undir nafni eru titlaðir
sem sérfræðingar í erlendum
verðbréfaviðskiptum og eru heim-
ildir fjölmiðla, eins og til dæmis í
DV í dag [þ.e. í gær]. Þar skín í
gegn þekkingarleysi en ekki sér-
fræðiþekking á því sem er að ger-
ast auk þess sem þar er því til
dæmis haldið fram að hart sé deilt
en hjá okkur hafa ekki verið
nokkrar deilur. Þá er talað um að
útboðið sé í óvissu en það er engin
óvissa fyrir hendi. Það eina sem
gerðist var að komið var til móts
við væntanlega bjóðendur.“
Hreinn Loftsson, formaður framkvæmdanefndar um einkavæðingu
Fresturinn ekki til
marks um lítinn áhuga
Hreinn Loftsson
Væntanlegum kjölfestufjárfestum í
Landssíma Íslands var gefinn frestur út
þessa viku til að skila inn óbindandi verð-
tilboði. Haraldur Johannessen ræðir við
Hrein Loftsson, formann framkvæmda-
nefndar um einkavæðingu, um ástæður
frestsins og hugsanlegar afleiðingar hans.
haraldurj@mbl.is
’ …það er ekkertúrslitaatriði hvort
fresturinn er mið-
aður við 22. eða 26.
þessa mánaðar. ‘
 ÓLAFUR Guðjónsson varði dokt-
orsritgerð sína við læknadeild Há-
skólans í Uppsölum, Svíþjóð, 22. maí
síðastliðinn. Ritgerðin fjallar um
meðferðarmöguleika við góðkynja
æxlum í heilahimnum.
Góðkynja æxli í
heilahimnum get-
ur verið erfitt að
fjarlæga að fullu
með skurðaðgerð
án þess að skaða
nærliggjandi
taugavef meðal
annars heila-
taugar og æðar. Í
sumum tilvikum er því hluti af æxl-
inu skilið eftir við skurðaðgerð. Þó að
um sé að ræða æxli sem í flestum til-
vikum vaxa hægt er töluverð hætta á
að æxlin vaxi það mikið að það valdi
nýjum einkennum. Það er því þörf á
viðbótar meðferð og jafnframt að-
ferðum til að meta árangur þeirra.
Í ritgerðinni var
árangur meðferðar eftir svo kall-
aðra translabyrinthine og trans-
cochlear skurðaðgerða var borin
saman við aðrar tegundir aðgerða
sem notaðar eru til að fjarlæga æxli
sem þrýsta á heilastofninn. Æxl-
isrestar hjá sjúklingum voru geisl-
aðarog þeim fylgt eftir í 3 ár. Annar
hópur sjúklinga með æxlisrestar
fékk lyfjameðferð með Interferon
alpha og var fylgt efter í allt að 8 ár.
Árangur geisla og lyfjameðferða var
metin með 11 C L methionine PET
sem er ísótópa aðferð. Jafnframt var
nýr ísótóp 76Br BrdU reyndur.
Árangur skurðaðgerða hvað varð-
ar andlitslömun og almennan árang-
ur voru sambærileg við aðrar teg-
undir aðgerða. Geislun hafði litlar
aukaverkanir og engin æxli uxu á 3
árum. Lyfjameðferð með Interferon
alpha virðist hafa hemjandi áhrif á
vöxt sumra æxlanna. 11C L methion-
ine PET hefur hlutverki að gegna í
mati meðferðarárangurs geisla og
lyfjameðferðar. Þar á móti reyndist
76Br BrdU ekki vera nothæfur ísó-
tóp til að fylgja meðferðarárangri
þessara æxla.
Ólafur er fæddur 13. júní 1957.
Hann lauk stúdentsprófi frá nátt-
úrufræðideild Menntaskólans við
Hamrahlíð vorið 1977 og læknaprófi
frá læknadeild Háskóla Íslands 1983.
Hóf framhaldsnám við Háskóla-
sjúkrahúsið í Uppsölum 1986. Hlaut
sérfræðiviðurkenningu í heila- og
taugasjúkdómum 1990, og heila-
skurðlækningum 1996. Settur yf-
irlæknir frá 1. janúar 2000 og skip-
aður frá 1. október 2001 við
heilaskurðdeild Háskólasjúkrahúss-
ins í Uppsölum.
Ólafur er sonur Guðjóns Heidar
Jónssonar og Kristínar Ólafsdóttur,
hann á þrjú börn.
Varði dokt-
orsritgerð í
læknisfræði