Morgunblaðið - 07.09.2003, Blaðsíða 14

14 B SUNNUDAGUR 7. SEPTEMBER 2003 MORGUNBLAÐIÐ
ferðalög
Með hverjum fórstu í frí?
„Eiginkonunni, Margréti Pálsdóttur, og börnunum okkar Páli
og Söru Margréti.
Við flugum til New York og þaðan til Las Vegas. Þar fengum
við okkur bílaleigubíl og ókum eftir tveggja daga dvöl áleiðis
til San Francisco. Eftir vikudvöl þar flugum
við heim í gegnum Minneapolis.“
Hvernig var Las Vegas?
„Strax og við lentum á flugvellinum í Las
Vegas var ljóst hvert við vorum komin því
eitt það fyrsta sem mætti okkur á vell-
inum þegar komið var úr vélinni voru
skrautlegir spilakassar. Las Vegas er í
raun furðulegur staður í miðri eyðimörk,
tilbúin veröld með blikkandi neonljósum
og ævintýralegum húsum sem eru máluð
í ýmsum litum. Spilakassar og spilavíti eru
nánast við hvert fótmál, íburðarmiklir
skemmtistaðir þar sem boðið er upp á skrautlegar sýningar á
hverju kvöldi og það er allt stórt í sniðum í Las Vegas. Það er
búið að reisa hótelbyggingar við Las Vegas Boulevard sem
eru nákvæmar eftirlíkingar af frægum mannvirkjum, Eiffel-
turninn í París blasir til dæmis við gestum, pýramídi frá
Egyptalandi, þekkt stórhýsi frá New York og svo mætti áfram
telja. Þetta eru yfirleitt risastór hótel sem hafa sitt þema eins
og Ítalíu, New York eða Gulleyjuna. Við höfðum pantað okkur
á Netinu gistingu á Luxor-hótelinu sem var með egypskt
þema. Luxor-hótelið getur tekið á móti nokkur þúsund gest-
um. Frá Las Vegas er hægt að gera sér ferð til að skoða Mik-
lagljúfur og Hoover-stífluna, sem við og gerðum, og það er
óhætt að segja að stíflan er óhemjustórt mannvirki.“
Var gaman að aka leiðina frá Las Vegas til San Francisco?
„Við ókum í gegnum Mojave-eyðimörkina yfir í San Joaquin-
dalinn og síðan upp með ströndinni með það í huga að enda í
San Francisco að nokkrum dögum liðnum. Eyðimörkin var
vissulega eyðileg en þó leyndust stöku spilavíti við veginn.
Við rákum síðan upp stór augu þegar við ókum fram á hundr-
uð flugvéla sem geymdar eru á flugvelli í eyðimörkinni. Vél-
arnar skemmast ekki þótt þær standi úti undir beru lofti því
staðurinn er svo hátt yfir sjávarmáli og loftslag hagstætt.
Ekki langt frá er Andrews-flugstöðin. Þarna eru gerð flugpróf
á stórum herþotum og þotum til farþegaflugs.
Fyrsti áfangastaður okkar var Kingsburg, sem er skammt frá
Fresno, þar sem Sunmaid-rúsínur eru framleiddar. Við höfum
um árabil átt viðskipti við fyrirtækið og fórum að skoða fram-
leiðsluferlið en Sunmaid er stærsta rúsínufyrirtæki í heimi.“
Á leiðinni frá Fresno og upp til San Francisco skoðuðu þau
Monterey-skagann, en hann er rómaður fyrir stórfenglega
náttúru, og óku eftir frægri leið sem kallast „17 mílna ökuleið-
in“. Í miðbæ Monterey, þar sem þau gistu, er sögusvið Æg-
isgötu eða Cannery Row eftir John Steinbeck. „Ægisgata er
vinsæll ferðamannastaður í miðbæ Monterey þar sem eru
verslanir, veitingahús, sjávardýrasafn og margt fleira sem
laðar að ferðamenn. Í Salinas er einmitt safn tileinkað John
Steinbeck og einnig er fæðingarstaður hans opinn almenn-
ingi. Á þessum slóðum bjó John Steinbeck þegar hann samdi
mörg sín þekktustu verk eins og Ægisgötu, Mýs og menn og
Þrúgur reiðinnar.
Við stoppuðum einnig í Carmel, sem er fallegur bær þar sem
Clint Eastwood var bæjarstjóri á sínum tíma og á þar nú veit-
ingahús. Veitingahúsið var því miður lokað þegar okkur bar
að garði. Í nágrenni við Carmel er hinn frægi Pebble Beach-
golfvöllur.“
Átti San Francisco vel við ykkur?
„Borgin er mjög skemmtileg og vel þess virði að heimsækja.
Hún er öðruvísi en hefðbundnar bandarískar borgir, þetta er
gönguborg ef svo má að orði komast og alls ekki nauðsynlegt
að vera á bíl eins og víðast hvar í stórborgum Bandaríkjanna.
Við notuðum okkur það óspart og gengum okkur upp að
hnjám alla daga.
Frá aðaltorginu í borginni, Union Square, liggja leiðir í allar
áttir og á torginu er mannlífið mjög skemmtilegt og fjölskrúð-
ugt. Þarna er leikhúslíf blómlegt og mikið
framboð af menningarlegum viðburðum.
Það er dálítil rússíbanastemmning í San
Francisco, brekkurnar eru brattari en ég
hafði ímyndað mér og ekki að undra að
margur svæsinn eltingaleikur í kvikmyndum
hefur verið festur þar á filmu. Þar sem þær
eru brattastar leggja menn bílunum þvers-
um í stæði.
Borgin er vingjarnleg og fólkið elskulegt.
Við skoðuðum auðvitað þekktustu kenni-
leiti borgarinnar, Golden Gate-brúna og
höfnina þar sem Fisherman’s Wharf er, en
þar eru ótal sjávarréttastaðir. Þá verður að
minnast á Alcatraz-fangaeyjuna. Til að
komast þangað þarf allt að viku fyrirvara.“
Eitt af einkennum borgarinnar eru spor-
vagnarnir eða „Cable cars“ sem ganga upp
og niður nokkrar af brekkunum og þau
prófuðu að ferðast með þeim auk þess sem
þau fóru í hefðbundna skoðunarferð.
„Kínahverfið var einnig gaman að skoða en
þangað fórum við og fengum okkur Dim Sum.“
Sverrir segist hafa gaman af því að fara á „Diners“, sem eru
gamaldags bandarískir veitingastaðir þar sem ýmist er setið
við eldhúsið eða í básum og pantaður matur eins og pönnu-
kökur og eggjabrauð.
Þau gengu fram á nokkra slíka staði í borginni og segja að
gjarnan megi benda á Pinecrest og Café Mason, sem báðir
eru við Masonstræti.
„Þetta var vissulega fjölskylduferð, við fórum í skemmtigarð-
inn Great America í Santa Clara þar sem farið var í alls kyns
rússíbana, Margrét fór með Páli á Metallica-tónleika og einnig
lá leiðin í kvikmyndahús. Þegar fjölskyldan er á ferðalagi er
farið á fjölbreytta veitingastaði en við gátum öll sameinast í
hrifningu okkar á pítsustaðnum California Pizza Kitchen, en
þar eru pítsurnar mjög frumlegar og til dæmis hægt að fá sér
pítsu með Pekingönd eða beikoni, salati og tómötum. Þessi
keðja er í mörgum ríkjum Bandaríkjanna og er óvenjuleg og
skemmtileg.“
Er þetta ferð sem þið væruð til í að fara aftur?
„Alveg tvímælalaust en líklega myndum við næst gera okkur
ferð norður fyrir San Francisco því þar er líka mjög margt að
skoða.“
Við förum yfirleitt í frí með skömmum fyrirvara segir Sverrir Egill Bergmann sem er nýkominn heim úr ferð með fjölskyldunni
til San Francisco og Las Vegas. Í ferðinni var m.a. farið á Metallica-tónleika og á heimaslóðir rithöfundarins Johns Steinbecks.
Ljósmyndir/Páll Bergmann
Torgið Union Square í San Fransisco.
Rússíbanastemmning í San Francisco

Hótel Luxor
3900 Las Vegas Blvd. South
Las Vegas
Sími: 00 702 262 4000
Vefslóð: www.luxor.com

The National Steinbeck Center
One Main Street, Salinas,
Sími: 00831 796-383300 Fax: 00831 796-3828
Tölvupóstfang: info@steinbeck.org
Vefslóð: www.steinbeck.org/MainFrame.html

East Kern Airport District
1434 Flightline St. Mojave,
Sími: 661 824 2433
Fax: 661 824 2914
Tölvupóstfang: : stuart@mojaveairport.com
Vefslóð: www.mojaveairport.com

California Pizza Kitchen
Veitingastaðirnir eru á nokkrum stöðum í San Francisco
og eins víða í Bandaríkjunum. Nánari upplýsingar fást á
vefslóðinni: http://www.cpk.com/
Hvaðan ertu að koma?
Sverrir Egill
Bergmann
Margrét, Páll og Sara Margrét.
Í SUMAR hefur gróska verið í stikun og merk-
ingu gönguleiða á Vestfjörðum. Strax í vor var
gert átak á sunnanverðum Vestfjörðum, á
Barðaströnd og í fyrrum Rauðasandshreppi.
Dorothee Lubecki, ferðamálafulltrúi Vest-
fjarða, segir að unnið hafi verið að merkingu
stíga og stikun í friðlandi Vatnsfjarðar í kringum
Flókalund. „Þar unnum við með landverði og
ferðaþjónustuaðilum í Flókalundi, merktum
ýmsa stíga og stikuðum og klipptum til kjarr þar
sem það var til trafala. Bæði var um að ræða
merkingu stuttra og langra gönguleiða.
Dorothee segir að þá hafi einnig verið gert
átak í að merkja í kringum Látrabjarg, nánar til-
tekið milli Sauðlauksdals, Látrabjargs og
Breiðavíkur. Þar voru sett upp skilti, bætt við
stikum og farið yfir vörður. „Nú er búið að
merkja þar gönguleiðir sem tengja Sauðlauks-
dal, Breiðuvík, Keflavík og Rauðasand saman og
því ætti að vera auðveldara að rata en áður.“
Dorothee segir að sjálfboðaliðar úr Sjálf-
boðaliðasamtökum um náttúruvernd (SJÁ) hafi
unnið með henni í sumar eins og á undanförnum
árum svo og aðrir áhugasamir. Á Barðaströnd
voru á bilinu 25–30 við sjálfboðavinnuna þegar
mest lét.
„Þá tókum við einnig að okkur aukaverkefni í
Árneshreppi á Ströndum og þar merktum við
leið sem heitir Naustvíkurskarð milli Naustavík-
ur í Reykjafirði og Trékyllisvíkur. Þetta er stutt
og skemmtileg leið sem hentar eiginlega öllum.
Við unnum einnig við Þórðarhelli í landi Litlu-
Ávíkur í Árneshreppi en þar á galdramaðurinn
Þórður Guðbrandsson að hafa falið sig þegar
hann var að reyna að komast undan brennu árið
1654.
Við hreinsuðum hellinn og bjuggum til þrep
niður í hann. Um tveggja kílómetra ganga er frá
Litlu-Ávík að hellinum. Þá merktum við einnig
Grástein sem á að hafa rekið hingað á ísöld frá
Grænlandi. Bergið er í landi Stóru-Árvíkur.
Að lokum var merkt nokkur hundruð metra
leið í Kistuvog sem er forn aftökustaður. Auk
þess var farið yfir nokkrar leiðir í nágrenni Ísa-
fjarðar og ýmis skilti voru sett upp í Dýrafirði á
svæði vestfirsku alpanna og víðar.“
Nýjar gönguleiðir stikaðar
og merktar á Vestfjörðum
Sjálfboðaliðar stikuðu gönguleiðir í sumar og settu upp skilti víða um Vestfirði.