Réttur - 01.01.1984, Qupperneq 25

INGIBJÖRG HARALDSDÓTTIR:
Byltingin á Kúbu
tuttugu og fimm ára
í ár minnast Kúbumenn þess að aldarfjórðungur er liðinn síðan skeggjaðir
skæruliðar undir forystu Fidels Castro flæmdu úr landi hataðan harðstjóra, Ful-
gencio Batista, og hófu þá róttækustu þjóðfélagsbyltingu sem gerð hefur verið í
nokkru landi eftir seinni heimsstyrjöldina.
Tuttugu og fimm ár eru ekki langur tími í lífi þjóðar, en á Kúbu hafa þau nægt
til að gjörbreyta þjóðfélaginu og er það nú með öllu óþekkjanlegt frá því sem
áður var. Byltingin hefur fest sig í sessi, þrátt fyrir stöðugar hótanir og áreitni
nágrannans volduga í norðri, Bandaríkjanna. Efnahagsþvinganir Bandaríkja-
stjórnar, beinar hernaðarárásir og hryðjuverk CIA og hinna svonefndu „útlaga“
á Flórida hafa ekki megnað að brjóta byltinguna á bak aftur, þótt allt þetta hafi
að sjálfsögðu gert Kúbumönnum róðurinn þyngri og neytt þá til að eyða meiri
fjármunum og kröftum í varnir landsins en þeir hefðu kosið. Um árabil máttu
Kúbumenn sætta sig við nær algjöra einangrun, aðeins eitt ríki Rómönsku Am-
eríku, Mexico, þorði að hafa stjórnmálasamband við þá í trássi við fyrirskipanir
frá Washington. Nú hefur þessi einangrun verið rofin að hluta, æ fleiri ríki álf-
unnar taka upp samband og viðskipti við Kúbu, en viðskiptabann Bandaríkja-
stjórnar er enn í gildi og hótanir í garð Kúbu hafa heldur færst í aukana eftir
valdatöku Reagans.
Við erfiðar aðstæður hafa Kúbumenn byggt upp nýtt þjóðfélag sem á mörgum
sviðum stendur öllum nágrannaríkjum sínum framar. Mestar hafa framfarirnar
orðið á sviði mennta- og heilbrigðismála og er nú svo komið að leita verður til
Evrópu til að finna hliðstæðar tölur. Allur samanburður við nágrannalöndin á
þessum sviðum sýnir mikla yfirburði Kúbumanna. Nokkur dæmi ættu að nægja
þessu til staðfestingar.
25