Morgunblaðið - 29.09.2007, Blaðsíða 4

4 LAUGARDAGUR 29. SEPTEMBER 2007 MORGUNBLAÐIÐ
FRÉTTIR
UMHVERFISRÁÐHERRA kynnti í
gær niðurstöður fyrstu úthlutunar
losunarheimilda vegna gróðurhúsa-
lofttegunda. Fimm iðnfyrirtæki var
úthlutað losunarheimildum, en alls
sóttu níu fyrirtæki um losunarheim-
ildir. Alls var sótt um losun fyrir 14,1
milljón tonna, en úthlutað var 8,6
milljónum tonna.
Þórunn Sveinbjarnardóttir um-
hverfisráðherra fór á blaðamanna-
fundi yfir niðurstöður nefndarinnar.
Hún ákvað að úthluta 666.875 losun-
arheimildum til Sementsverksmiðj-
unnar á Akranesi, 1.957.895 til Ís-
lenska járnblendifélagsins, 1.382.335
til Alcan í Straumsvík, 2.106.000 til
Norðuráls á Grundartanga og
2.520.000 losunarheimildum til Alcoa
á Reyðarfirði.
Lögð var fram fimm ára úthlutun-
aráætlun fyrir þessi fyrirtæki.
Þau fyrirtæki sem sóttu um losun-
arheimildir en fengu ekki eru Alcoa
Bakka, Norðurál Helguvík, Alcan
Þorlákshöfn og Tomahawk Develop-
ment. „Í þessari niðurstöðu felst að
það er úthlutað til starfandi atvinnu-
reksturs og miðað við umfang starf-
semi þessara fyrirtækja eins og það
er álitið verða á næsta ári,“ sagði Þór-
unn.
Óvissa varðandi orkuöflun
Það væri mat nefndarinnar og sitt
að nú væru ekki forsendur til þess að
úthluta til þeirra umsækjenda sem
hefðu ekki hafið störf. Rökin fyrir
þessu væru að nokkur óvissa væri um
stöðu þeirra verkefna, til dæmis varð-
andi orkuöflun, niðurstöðu mats á
umhverfisáhrifum, útgáfu starfsleyfis
og skipulagsforsendur.
„Þessi fyrirtæki sem sóttu um en
hafa ekki hafið störf fá því ekki út-
hlutað að þessu sinni og rétt er að
taka fram að starfandi atvinnurekst-
ur fær ekki heldur úthlutun vegna
fyrirhugaðra stækkana á tímabilinu.
Úthlutun til þessara fyrirtækja hefði
verið sett í biðstöðu, auk stækkunará-
forma starfandi fyrirtækja, en engu
hafnað.
Eðlilegt væri að framtíðaráform
þessara aðila fengju að skýrast betur
áður en mál þeirra yrðu afgreidd af
úthlutunarnefndinni. Henni bæri að
endurskoða áætlun sína á hverju ári
meðan á skuldbindingatímabilinu
stæði.
Spurð hvers vegna ekki hefði verið
úthlutað öllum losunarheimildunum
benti Þórunn á að losunarheimildir
væru eign ríkisins og verðmæti í
sjálfu sér. Það hefði verið metið svo að
þær upplýsingar sem fyrir lægju
gæfu ekki forsendur til þess að velja á
milli nýrra verkefna núna. „Hins veg-
ar er þetta fimm ára tímabil og menn
geta skilað inn nýjum umsóknum og
ítarlegri upplýsingum að sjálfsögðu.
Svo skulum við ekki útiloka það að
það geti fleiri umsækjendur sent inn
umsóknir á komandi árum.“
Þórunn sagði að fyrirtækin þyrftu
ekki að bera annan kostnað af losun-
arheimildum en umsýslugjald. Að-
spurð hvort úthlutunin kynni að vera
áfall fyrir fyrirtæki sem hyggja á
starfsemi hér en fengu ekki úthlutað
sagðist Þórunn gera ráð fyrir að þeir
sem væru í þeirri starfsemi sem
krefðist losunar gróðurhúsaloftteg-
unda hefðu kynnt sér löggjöfina og
væri fullkunnugt um hve stór pott-
urinn væri. Viðkomandi aðilar myndu
þurfa að taka það með í reikninginn
hvernig afla ætti losunarheimilda.
Fimm fyrirtæki fengu út-
hlutað losunarheimildum
Í HNOTSKURN
»Úthlutunin fór fram í sam-ræmi við lög frá því fyrr á
árinu um losun gróðurhúsa-
lofttegunda.
»Sérstök úthlutunarnefndlosunarheimilda fór yfir
umsóknir sem bárust.
» Nefndin hefur 10,5 millj-óna tonna losunarheim-
ildir til úthlutunar vegna tíma-
bilsins 1. janúar 2008 til 31.
desember 2012.
»Þar af eru 8 milljónirtonna sem þurfa að full-
nægja þeim skilyrðum sem
sett eru fram í ákvörðun 14/
CP.7 við Kyoto-bókunina.
Sótt var um 14,1
milljón tonna, en
úthlutað var 8,6
milljónum tonna
Morgunblaðið/RAX
Úthlutun Þórunn Sveinbjarnardóttir umhverfisráðherra sagði á fundi í gær, að við úthlutun losunarkvótanna
væri tekið mið af umfangi starfsemi stóriðjufyrirtækjanna eins og það er álitið verða á næsta ári.
SKÓGRÆKT ríkisins, Land-
græðsla ríkisins og Vatnamælingar
ríkisins munu færast frá landbún-
aðarráðuneytinu um áramótin, skv.
minnisblaði um breytingar á verka-
skiptingum ráðuneyta sem forsætis-
ráðherra kynnti á ríkisstjórnarfundi
í gær. Þetta eru ekki einu verkefnin
sem færast frá landbúnaðarráðu-
neytinu því báðir landbúnaðarhá-
skólarnir, á Hólum í Hjaltadal og á
Hvanneyri, flytjast þaðan og yfir til
menntamálaráðuneytisins. Eitt
verksvið færist til landbúnaðarráðu-
neytisins frá umhverfisráðuneytinu
en það er matvælasvið Umhverf-
isstofnunar.
Til þess að stjórnsýslulegt for-
ræði á þessum verkefnum færist
milli ráðuneyta þarf að breyta lög-
um og verður það gert með svo-
nefndu bandormsfrumvarpi sem
forsætisráðherra mun væntanlega
mæla fyrir á fyrstu dögum þingsins.
Þetta eru ekki einu verkefnin sem
verða færð á milli ráðuneyta.
Gegnir tveimur embættum
Eins og kunnugt er gegnir einn
maður nú embætti sjávarútvegsráð-
herra og landbúnaðaráðherra, Ein-
ar Kristinn Guðfinnsson. Það er þó
engin sérstök nýjung að ráðherrar
gegni embætti landbúnaðarráð-
herra ásamt öðru ráðherraembætti.
Síðast var sá háttur hafður á þegar
Guðmundur Bjarnason var land-
búnaðarráðherra og umhverfisráð-
herra á árunum 1995-1999 en þar á
undan var Halldór Blöndal sam-
gönguráðherra og landbúnaðarráð-
herra, þ.e. á árunum 1991-1995.
Fjaðrir
reyttar af
ráðuneyti
ALÞJÓÐADEILD ríkislögreglu-
stjóra fékk upplýsingar um að ís-
lenskur ríkisborgari væri í haldi
lögreglunnar á Indlandi vegna
gruns um stórfellt peningaþvætti í
Bandaríkjunum. Samkvæmt upp-
lýsingum þaðan mun deildin ekkert
aðhafast vegna málsins, það er á
milli Indlands og Bandaríkjanna.
Á indverska fréttavefnum Ex-
press India kemur fram að mað-
urinn heitir Gunnar Stefán Möller
Wathne. Það kemur heim og saman
við skráningu á vefsvæði banda-
rísku fíkniefnalögreglunnar DEA,
auk þess sem alþjóðadeild ríkislög-
reglustjóra staðfestir að Gunnar sé
eftirlýstur um allan heim af Int-
erpol. Gunnar fæddist árið 1969 í
Reykjavík.
Vaknað hafa spurningar um
hvort Gunnar, sem talinn er hafa
dvalið í Rússlandi undanfarin ár,
hafi komið hingað til lands á und-
anförnum fjórum árum en alþjóða-
deildin segist engar upplýsingar
hafa um það.
Ekkert verð-
ur aðhafst
Eftir Birnu Önnu Björnsdóttur í New York
bab@mbl.is
INGIBJÖRG Sólrún Gísladóttir, ut-
anríkisráðherra, sat í gær tvo fundi
þar sem saman komu kvenleiðtogar
sem staddir eru á ráðherrafundi Sam-
einuðu þjóðanna í New York. Annars
vegar morgunverðarfund kvenutan-
ríkisráðherra og -þjóðarleiðtoga í
boði Condoleezzu Rice, utanríkisráð-
herra Bandaríkjanna, og hinsvegar
kvöldverðarfund í boði Ritu Kieber-
Beck, utanríkisráðherra Liechten-
stein.
Í samtali við Morgunblaðið að
morgunverðarfundinum loknum
sagði Ingibjörg Sólrún að þar hefði
verið vakin athygli á því hvað konum
hefði fjölgað í embættum utanríkis-
ráðherra.
„Og umræðuefnið var síðan fyrst
og fremst hvernig við getum beitt
okkur sem konur í þeim stöðum sem
við gegnum. Hvernig við getum verið
sýnilegri og hvernig við getum notað
áhrif okkar til að bæta stöðu kvenna,“
segir Ingibjörg Sólrún. „Eitt af meg-
inmarkmiðunum á bak við þessa
fundi er að búa til tengslanet kvenna
sem gegna þessari stöðu og þá getum
við verið í sambandi þegar eitthvað
gerist og virkjað þetta tengslanet.“
Ingibjörg Sólrún segir að aukin
samvinna meðal kvenutanríkisráð-
herra hafi komið til tals og að verið sé
að undirbúa fundi þar sem lögð verða
drög að því að auka hlut kvenna þeg-
ar kemur að því að takast á við örygg-
ismál í heiminum.
„Þau málefni sem þykir einna
brýnast að takast á við eru skipulegar
nauðganir í stríðsátökum, vændi og
mansal, og einnig staða kvenna í upp-
byggingarferlinu á svæðum þar sem
mikil átök hafa átt sér stað. Hlutur
kvenna hefur oft gleymst í uppbygg-
ingarstarfinu eftir að stríðsátökum
lýkur, en þar er nauðsynlegt að huga
að stöðu kvenna og því lykilhlutverki
sem þær gegna í samfélögum,“ segir
Ingibjörg Sólrún.
Hún segir að einnig hafi verið rætt
um smálánastarfsemi sem hafi sann-
að sig sem gríðarlega mikilvægt tæki
fyrir konur þar sem það gefur þeim
aukna möguleika á því að stjórna lífi
sínu.
Áhugaverður vettvangur
Nú voru þarna konur með mjög
ólíkan bakgrunn og stjórnmálaskoð-
anir, fannstu fyrir því að meðal ykkar
ríkti samstaða og vilji til samvinnu af
því að þið eruð konur?
„Auðvitað eru þetta konur með
ólíkan bakgrunn, ólíkar skoðanir og
frá mismunandi menningarsvæðum.
En við erum allar konur og við erum
allar, hver á sínum stað, að takast á
við allskyns fordóma og misrétti í
garð kvenna, og það er sameiginleg
reynsla okkar. Mér finnst þetta virki-
lega áhugaverður vettvangur og mjög
spennandi að konur séu að taka sig
saman þvert á trúarbrögð og þjóðir
og reyna að setja niður deilur. Því
vegna stöðu kvenna og þess hlutverks
sem þær gegna í fjölskyldum þá
leggja þær megináherslu á að ná friði
jafnvel þó það þurfi að kosta ein-
hverja eftirgjöf á einhverjum svið-
um,“ segir Ingibjörg Sólrún.
Viljum nota áhrif okkar
til að bæta stöðu kvenna
Ingibjörg Sólrún Gísladóttir á fundi kvenutanríkisráðherra í boði Condoleezzu Rice
Kvenráðherrar Ingibjörg Sólrún Gísladóttir utanríkisráðherra sat í gær fund kvenráðherra. Henni á hægri hönd
situr Condaleeza Rice utanríkisráðherra Bandaríkjanna og á vinstri hönd kvennamálaráðherra Indlands.
♦♦♦
TÖLUVERT er um innbrot í bíla við
Kringluna, Ofanleiti og nágrenni og
hafa stjórnendur Háskólans í
Reykjavík varað nemendur og
starfsfólk sérstaklega við því að
skilja verðmæti eftir í bílum sínum.
Það er gömul saga og ný að inn-
brotsþjófar láta til skarar skríða að
nóttu sem degi. Í tölvupósti sem
dreift var til nemenda HR segir frá
því að í fyrradag hafi verið brotist
inn í jeppa sem stóð fyrir utan mötu-
neyti aðalbyggingar skólans við Of-
anleiti á meðan eigandinn skrapp inn
í stundarfjórðung. Á meðan hann var
inni í húsinu var rúða í bílnum brotin
og tölvu stolið. Tveimur metrum
þaðan sem bílinn stóð voru nemend-
ur í mötuneytinu að læra.
Passið upp á
verðmætin
♦♦♦