Sjómannablaðið Víkingur - 01.02.2007, Page 42
Hilmar Snorrason skipstjóri
Utan úr
heimi
Danir í átak
í nýlegri skýrslu dönsku Siglingamálastofnunarinnar um slys
á sjó kemur í ljós að flest slysa á kaupskipum verða vegna land-
festa. Á tímabilinu 1997 til 2005 urðu 80 slys á farþegaskipum
og 197 á (lutningaskipum undir dönskum fána. Hefur danska
sjóslysarannsóknarnefndin tekið saman sérstaklega upplýsingar
um 17 þessara atvika sem þeir hyggjast fara með á alþjóðavett-
vang til að freista þess að kom á alþjóðlegu samstarfi um að
bæta öryggi við þessa hættulegu aðgerð sem alltaf þarf að fram-
kvæma við upphaf og endi hverrar sjóferðar.
Reykingabann
Breska samgönguráðuneytið hefur hugleitt að setja algjört
reykingabann á öll flutninga og fiskiskip sem sigla um breska
landhelgi og á strandleiðum. Ef af verður mun bann þetta
einnig ná til allra íslenskra fiskiskipa og kaupskipa í íslenskum
rekstri sem sigla um breska landhelgi.
Tilurð þess að þessi könnun var sett í gang eru lög sem eru
að ganga í gildi í Bretlandi næstkomandi júlí þar sem bann er
lagt við notkun tóbaks á lokuðum vinnustöðum, almannafæri
og í bifreiðum. Aðeins einka skemmtibátar og skip sem ekki
flytja greiðandi farþega yrðu undanþegin þessu banni svo og
skipverjar þeirra. Það eru þó ekki allir ánægðir með þessa hug-
myndir Breta því mörg flaggríki hafa risið upp á afturlappirnar
og mótmælt þessum áformum og halda því fram að slíkt bann
verði ekki sett á nema með gagnvirkum samningum milli landa.
Hafa nokkur fánaríkjanna óskað eftir að málið verði tekið upp
hjá alþjóðasiglingamálastofnuninni IMO.
Nú er því eins gott fyrir okkar íslensku sjómenn sem sigla
um breska landhelgi að fara að hugsa alvarlega um að hætta að
reykja.
Mona Lisa verður brátt að háskólaskipi þar sem 600 nemendur geta stund-
að nám á háskólastigi. Myndin er tekin aj skipinu í Sundahöjn siðastliðið
sumar.
Háskólaskip
Nú er að opnast alveg nýr möguleiki í háskólanámi.
Skemmtiferðaskipið Mona Lisa, sem er í eigu Royal Caribbean
Cruises, mun fá nýtt verkefni á næstunni en verið er að breyta
skipinu í fljótandi háskóla. Það eru nokkrir háskólar sem
standa að þessu verkefni ásamt útgerðinni en verkefnið hefur
fengið heitið „Fræðaskipið“.
Hugmyndin er að skipið verði á siglingu um allan heim í
menntaferð og er búist við að 600 nemendur geti verið við nám
i skólanum samtímis. Mona Lisa er eitt þeirra skemmtiferða-
skipa sem hafa haft fasta viðkomu á íslandi á síðari árum og
eflaust er mörgum í minni skorsteinsmerki skipsins sem hefur
að geyma Monu Lísu. Skipið var smíðað árið 1966 fyrir sænsku
útgerðina Swedish America Line og bar þá nafnið Kungsholm.
Laus úr fangelsi
í síðasta blaði var sagt frá skipstjóranum Wolfgang Schröder
sem var ákærður í Alabama fyrir að hafa siglt skipi sínu á
bryggjukrana með þeim afleiðingum að 46 ára rafvirki sem var
að vinna við hann lést er kraninn féll saman. Schröder fékk
11 mánaða dóm fyrir að vera valdur að dauða rafvirkjans en
strax eftir atvikið var Schröder fangelsaður. Nú þegar dóm-
urinn hefur verið kveðinn upp var skipstjórinn búinn að vera
þann tíma í fangelsi þannig að hann hefur fengið frelsi sitt á ný.
Schröder sem er 59 ára gamall hafði áður lýst sig ábyrgan fyrir
ákeyrsluna á kranann og útgerð skipsins hafði lýst yfir fjárhags-
legri ábyrgð á málinu.
Yfirhlaðnir hafnsögumenn
Mikill skortur er orðin á hafnsögumönnum á Indlandi og
er ástandið orðið mjög alvarlegt í ríkishöfnum landsins. Þessi
skortur varð meðal annars til þess að hafnaryfirvöld í höfninni í
Jawaharlal Nehru, sem um 60% af gámaflutninguin landsins fer
um, ákváðu að stöðva nætursiglingar um höfnina. Notendur
hafnarinnar urðu að vonum óánægðir með ástandið og hafa
hótað að snúa skipum sínum til annarra hafna verði ekki ráðin
bót á ástandinu. Bent hefur verið á að eina leiðin til að kom-
ast út úr þessum vanda sé að einkavæða ríkishafnirnar. Þá hafa
útgerðir einnig hugleitt að koma sjálfar með sína eigin hafn-
sögumenn en þurfa til þess leyfi siglingayfirvalda.
Minnka ferðina
Skip sem sigla um Gíbraltarsund hafa verið beðin að
draga úr ferðinni í þeirn tilgangi að hlífa hvölum sem eru á
þessu svæði. í tilkynningu til sjófarenda mæltist spænska
Siglingamálastofnunin til þess að hámarkshraði skipa yrði ekki
meiri en 13 hnútar meðan siglt væri í gegnum sundið. Talið er
að á síðustu mánuðum hafi ekki færri en sex forustuhvalir verið
drepnir af völdum skipa. Er það von þarlendra yfirvalda að
með því að setja hraðatakmörk megi koma í veg fyrir að fleiri
hvalir verði skipum að bráð.
Skelfilegar niðurstöður
Nýleg könnun sem gerð var á Filippseyjum um dánartíðni fil-
ippínskra sjómanna leiddi í ljós skelfilegar niðurstöður. Meira
en 200 þarlendir sjómenn látast árlega á öilum heimsflotanum
samkvæmt upplýsingum kaþólsku kirkjunnar í Manilla. Ljóst
er að verulegt átak þarf til að fækka þessum dauðsföllum sem
eru af völdum slysa.
Stormar í Evrópu
Það er ekki alltaf auðvelt að liggja með stór skip í höfn og
það varð skipstjóri þýska gámaskipsins CMA CGM Claudel
heldur betur var við í síðasta mánuði. Þeir stormar sem hafa
herjað á Evrópu hafa verið skipum erfiðir og siglingum til tafa.
42 - Sjómannablaðið Víkingur