Bjarmi - 01.04.1996, Blaðsíða 17
FRÆÐSLA
föt, þau föt sem Jesús Kristur gefur okkur og heilagur andi
lætur sjást í lífi okkar. Við erum að tala um réttlætisskrúða
Krists. Og hann á að sjást. Hann er ekki gabb og blekking
eins og nýju fötin keisarans. Föt sem ekki sjást koma að
litlu gagni. Trú sem setur ekkert mark á líf okkar er býsna
haldlítil. Hún er þá orðin eins og nýju fötin keisarans. Við
stöndum þá á nærbrókinni einni saman andlega talað.
Páll postuli lýsir því í Kólossubréfinu hvernig nýju fötin
lita út. Hann lýsir hinum nýja manni sem mótast eftir
þeirri æðstu fyrirmynd sem til er. Hann á að mótast eftir
Kristi. „íklæðist því eins og Guðs útvaldir, heilagir og
elskaðir, hjartans meðaumkun, góðvild, auðmýkt,
hógværð og langlyndi. Umberið hver annan og fyrirgefið
hver öðrum, ef einhver hefur sök á hendur öðrum. Eins
og Drottinn hefur fyrirgefið yður, svo skuluð þér og gjöra“
(3:12-13). Þetta er það sem á að einkenna okkur sem
kristið fólk. Þetta er það sem heilagur andi vill koma til
leiðar í lífi okkar. Þetta er sá ávöxtur andans sem á að
spretta fram hjá okkur og Páll talar um í Galatabréfinu
(5:22).
Hér skiptir máli fyrir okkur að skilja hvert samhengið
er. Við erum ekki sjálf eða í eigin krafti að kalla þetta fram
í lífi okkar. Umskiptin eru raunveruleiki í lífi okkar fyrir
trú á Jesú Krist. Guð vill að afleiðingar þess sjáist í lífi
okkar. Það er heilagur andi hans sem vinnur verkið. Þess
vegna þarf hann að fá að komast betur að í lífi okkar til að
svo geti orðið. Þess vegna þarf orð hans og andi að fá að
móta okkur. Hér er verið að tala um eftirfylgdina við Jesú
Krist, það að feta í hans fótspor, gera allt eins og hann eigi
í hlut en ekki menn (Kól. 4:23). Páll segir: „Hvað sem þér
gjörið í orði eða verki, gjörið það allt í nafni Drotins Jesú
og þakkið Guði föður fyrir hann“ (Kól. 3:17). Og minna
má á orð Jesú: „Sannlega segi ég yður, það allt sem þér
gjörðuð einum minna minnstu bræðra, það hafið þér gjört
mér“ (Mt. 25:40).
Hvernig?
Hvernig getur þetta gerst í lífi okkar? Hvernig getur trúin
sett mark sitt á það? Hvernig fær heilagur andi unnið sitt
verk í okkur? Hvernig getur orð Guðs mótað okkur? Það
gerist aðeins í nánu samfélagi við Drottin okkar og
frelsara, Jesú Krist. Nálægðin við hann skiptir öllu máli.
Ég veit ekki hvort við tökum eftir því, en staðreyndin er
sú að við mótumst af þeim sem við umgöngumst. Ef við
viljum í rauninni líkjast Jesú Kristi þurfum við að umgang-
ast hann mikið, dvelja í nálægð hans, svo að kærleikur
hans móti allt líf okkar.
Páll postuli endar einmitt umfjöllun sína um fataskiptin
í Kólossubréfínu á því að tala um yfirhöfnina, kápuna eða
frakkann, sem á að hylja allt annað og það er kærleikur-
inn: „íklæðist yfir allt þetta elskunni, sem er band algjör-
leikans11 (3:14). Kærleikurinn er það band sem bindur
okkur við frelsarann og hvert við annað. „Eins og ég hef
elskað yður skuluð þér einnig elska hver annan,“ sagði
Jesús Qóh. 13:34). Og þá erum við ekki að tala um
einhverja rómantíska tilfinningu sem við köllum ást
heldur fórnandi og skilyrðislausan kærleika Jesú Krists
Trú sem setur ekkert mark d líf okkar er
býsna haldlítil. Hún er jw orðin eins og nýju
fötin kei sarans.
sem lagði sjálfan sig í sölurnar fyrir okkur. Sá kærleikur á
að einkenna okkur sem viljum fylgja honum. Það gerist
þegar við lifum með Jesú, í nánu samfélagi við hann, og
leyfum honum að móta okkur.
Niðurlag
Fataskiptin eru raunveruleiki. Ef við eigum trú á Jesú
Krist og erum skírð til nafns hans hafa umskiptin átt sér
stað. Hinn gamli maður sem þjónaði syndinni er dáinn.
Hinn nýi maður er uppvakinn af Guði til að við getum
þjónað honum. Hvaða afleiðingar hefur það í lífi okkar?
Orð Guðs segir að við eigum stöðugt að afklæðast hinum
gamla manni og íklæðast hinum nýja vegna þess að við
virðumst sífellt haldin þeirri áráttu að vilja fara aftur í
gömlu fötin. Þegar Lúther útskýrir merkingu skírnarinnar
í Fræðunum minni segir hann: „Hún merkir það, að hinn
gamli Adam í oss á að drekkjast fyrir daglega iðrun og
yfirbót og deyja með öllum syndum og vondum girndum
og aftur á móti daglega fram að koma og upp aftur að risa
nýr maður, sá er lifi að eilífu í réttlæti og hreinleik fyrir
Guði“ (Kirkjan játar, bls. 272).
Guð er ríkur af fyrirgefningu. Hann hreinsar okkur af
hverri synd þegar við leitum til hans í iðrun og trú og
hann gefur okkur kraftinn til að lifa íklædd hinum nýja
manni. Leyfum því heilögum anda hans að komast að í lífi
okkar og vinna þar sitt verk.
Heimildir:
Douglas, J. D. (ed.) 1980. The New lllustrated Bible Dictionary.
Leicester.
Einar Sigurbjörnsson. 1991. Kirkjan játar. Reykjavík.
Gilbrant, Th. (red.) 1965. Illustrert Bibelleksikon. Oslo.
Lohse, E. 1971. Colossians and Philemon. Philadelphia.
Moule, C.F.D. 1968. The Epistles to the Colossians and to
Philemon. Cambridge.
Overland, P. 1973. Kolosserbrevet og brevettil Filemon. Oslo.
17