Kirkjuritið - 01.04.1955, Qupperneq 15

HUGMYNDIN UM GUÐSRÍKIÐ
157
um himins ásamt tíu þúsundum engla brást. Þar með var ekki
unnt að eigna honum neinn guðlegan óskeikulleika. Mikið af
erfðaguðfræðinni hlaut því að hrynja. Rétt á litið var tilraun
nýguðfræðinnar til að hreinsa Jesú af heimsslitaræðunum og
telja þær til safnaðarguðfræði og seinni tíma innskota, við-
leitni til að varðveita trúna á guðdómlegan óskeikulleik hans
í trúarefnum, þrátt fyrir breytta heimsskoðun. Þetta var þá
jafnframt ástæðan til þess, að furðu hljótt hefir alla tíð verið
um guðfræði Schweitzers, þó að enginn hafi getað neitað lær-
dómi hans, óvenjulegum vitsmunum og fágætum mannkostum.
En þegar efalaust er um að ræða einhvern merkilegasta
mann, sem nú er uppi í allri kristninni, mann, sem gæddur
er óvenjulegri sannleiksást og andlegu hugrekki, og flestum
framar hefir gerzt lærisveinn Krists í fórnfúsu og óeigin-
gjörnu starfi og lagt hefir á sig ofurmannlegt erfiði til þeirra
hluta, þá ætti að vera ástæða til að gefa því sérstakan gaum,
sem hann hefir til málanna að leggja í guðfræði. Hvergi væri
framar leiðsögu að vænta en frá slíkum mönnum. En hið vana-
bundna íhaldseðli trúarbragðanna er venjulega seint í svifum.
Samtíminn sér venjulega ekki svo mikið sem í hælana á sín-
um vitrustu mönnum, hvað þá að þeir öðlist nokkra viður-
kenningu, fyrr en þeir eru fyrir löngu horfnir af sviðinu.
Þeim, sem löngun hefðu til að kynna sér nánar skoðanir
þessa mikla guðfræðings, vildi eg benda á einkar glöggt og
handhægt rit um guðfræði hans, sem saman er tekið af E. N.
Mozley og heitir: The Theology of Albert Schweitzer for Christ-
ian Enquirers (Adam and Charles Black, 4, 5 & 6 Soho Square,
London W.I. 1950 — 8s6d).* Er hér auk inngangs um að ræða
mjög skipulegan og greinargóðan útdrátt úr ritum Schweitzers,
er guðfræði varða. En það, sem gefur þessari bók þó mest
gildi, er ritgerð eftir A. S. sjálfan, sem rituð er sem eins konar
* Bezta ævisagan, sem rituð hefir verið um A. S. er: Albert
Scliweitzer. The Man and His Mind. By George Seaver. Adam and
Charles Black, London 1948. Einnig má benda á stutta ævisögu eftir
uákominn vin hans, sem út kom í sumar: Albert Schweitzer. An
Introduction. By Jacques Feschotte. London, Adam and Charles Black,
1954. Eru í kverinu tvær áður óprentaðar ritgerðir eftir Schweitzer,
°S heitir önnur Bernskuminningar frá Colmar, en hin fjallar um
siðfræði í hugsun mannsandans.