Fréttablaðið - 19.05.2010, Síða 6

6 19. maí 2010 MIÐVIKUDAGUR
LÍFEYRISSJÓÐIR Lífeyrissjóðirnir
gegna lykilhlutverki í uppbyggingu
íslensks samfélags, sagði Stein-
grímur J. Sigfússon fjármálaráð-
herra á aðalfundi Landssamtaka líf-
eyrissjóða í gær. Ráðherra sagði að
sjóðunum bæri til þess siðferðisleg
skylda auk þess sem það væri efna-
hagslega skynsamlegt fyrir þá.
Ráðherra sagði að vel mætti end-
urskoða þá arðsemiskröfu sem gerð
væri til lífeyrissjóða. „Á samfélags-
legur ávinningur að fá meira vægi,
á að horfa meira til langtíma sjón-
armiða og heildarhagsmuna fremur
en að leggja kalt mat á arðsemi fjár-
festinga í augnablikinu, það mat er
mannanna verk,“ sagði ráðherra.
Salvör Nordal, forstöðumað-
ur Siðfræðistofnunar Háskóla
Íslands, benti á að mikilvægt væri
að hreinskiptin umræða um stefnu
lífeyrissjóða, hlutverk og starfs-
hætti færi fram, rétt eins og hvatt
væri til í umfjöllun um lífeyris-
sjóðina sem finna má í siðferðis-
hluta skýrslu rannsóknarnefndar
Alþingis. Salvör er einn höfunda
þess hluta.
Í skýrslunni hefði komið fram
að stjórnarmenn í lífeyrissjóð-
um voru beittir þrýstingi af fyrir-
tækjum, benti Salvör á, og rifjaði
upp það sem haft er eftir Gunnari
Páli Pálssyni, þáverandi formanni
VR, að Bónus-feðgar, Jón Ásgeir
Jóhannesson og Jóhannes Jónsson,
hafi beitt hann þrýstingi til að selja
hlutabréf VR í Icelandair í krafti
þess hversu margir starfsmenn
Bónuss voru í VR.
Salvör sagði í framhaldinu mjög
mikilvægt að standa vörð um sjálf-
stæði lífeyrissjóðanna. Byggja
þyrfti upp traust í samfélaginu og
lífeyrissjóðir væru í lykilstöðu til
að leiða sáttaferli í samfélaginu.
Steingrímur J. sagði í umræðum
í kjölfar erindanna að lífeyrissjóð-
ir mættu gjarnan setja sér siða-
reglur í fjárfestingum, neita til
dæmis að fjárfesta í fyrirtækjum
sem veittu háa bónusa. Hann sagði
olíusjóðinn norska góða fyrirmynd
í þeim efnum.
Salvör ræddi einnig um olíu-
sjóðinn, sem hefur þá stefnu að
fjárfesta ekki í Noregi og sagði
að ef til vill væri það stefna sem
lífeyrissjóðirnir ættu að hafa.
sigridur@frettabladid.is
Samfélagsleg ábyrgð
komi í stað arðsemi
Steingrímur J. Sigfússon fjármálaráðherra segir lífeyrissjóði eiga að sýna samfé-
lagslega ábyrgð í fjárfestingum. Salvör Nordal, forstöðumaður Siðfræðistofnun-
ar, segir hreinskipta umræðu um starfshætti og stefnu lífeyrissjóða mikilvæga.
TELJA LÍFEYRISSJÓÐI GEGNA MIKILVÆGU HLUTVERKI Salvör Nordal og Steingrímur J.
Sigfússon voru ræðumenn á aðalfundi Landssamtaka lífeyrissjóða. FRÉTTABLAÐIÐ/GVA
Rannsóknarnefnd sem skoða á fjárfestingar og starfshætti lífeyrissjóða í
aðdraganda bankahrunsins verður sett á laggirnar af stjórn Landssamtaka
lífeyrissjóða. Þetta kom fram í máli Arnars Sigurmundssonar, stjórnarfor-
manns Landssamtakanna, á aðalfundi þess í gær. Tryggja verði að vandað
verði til verka og niðurstöðurnar hafnar yfir allan vafa. Því verði nefndin
skipuð óháðum sérfræðingum og er stefnt að því að hún skili verki sínu 1.
nóvember 2010.
Í ræðu Arnars á fundinum kom fram að tortryggni hafi gætt í garð lífeyris-
sjóðanna. Skýrsla Rannsóknarnefndar Alþingis hafi verið gott innlegg inn í
umfjöllun um sjóðina en ítarlegrar rannsóknar sé þörf.
Rannsóknarnefnd um lífeyrissjóði
VIÐSKIPTI Stjórn Lífeyrissjóðs
verslunarmanna (LV) ætlar að
láta á það reyna fyrir dómstólum
hvort hægt verður að sækja
bætur til bankanna vegna taps
sjóðsins, sem stjórnarmenn
vilja rekja til blekkinga bank-
anna. Þær hafi einkum birst í
markaðsmisnotkun í hlutabréfa-
viðskiptum.
Þetta kom meðal annars fram í
máli Helga Magnússonar, stjórn-
arformanns sjóðsins, á ársfundi
hans í fyrrakvöld. Máli sínu til
stuðnings vísaði hann í skýrslu
rannsóknarnefndar Alþingis þar
sem segir að flest bendi til þess
að íslenskir bankar hafi stund-
að markaðsmisnotkun í hluta-
bréfa- og gjaldeyrisviðskiptum,
sem leiddi meðal annars til þess
að krónan féll, en á því tapaði
lífeyrissjóðurinn gríðarlega.
Á árunum 2008 og 2009 þurfti
sjóðurinn að afskrifa um 50 millj-
arða króna og skerða lífeyrisrétt-
indi um tíu prósent. - gs
Lífeyrissjóður verslunarmanna:
Ætlar að sækja
bætur til banka
LÖGREGLUMÁL Tveir ósakhæfir
unglingspiltar úr grunnskólanum
á Ísafirði hafa viðurkennt að hafa
falsað fimm þúsund króna pen-
ingaseðil og notað hann í verslun
í bænum. Þeir viðurkenndu falsið
í yfirheyrslu að viðstöddum for-
eldrum sínum og barnaverndar-
yfirvöldum.
Önundur Jónsson, yfirlögreglu-
þjónn á Ísafirði, vill ekki veita
upplýsingar um það hvernig
piltarnir fóru að því að falsa
seðilinn. „Ef við förum að segja
hvernig þeir gerðu það þá fara
allir krakkar að fikta með þetta
því þetta er svo sáraeinfalt,“
segir hann. „En þetta leit nokkuð
vel út hjá þeim.“ - sh
Fölsunarmál á Ísafirði:
Unglingspiltar
fölsuðu seðilinn
GRUNDARTANGI Norðurál er stærsti
kaupandi orku frá HS orku.
FRÉTTABLAÐIÐ/GVA
ORKUSALA Orkuverð til Norðuráls
er fast í samningum og því hafa
hugmyndir um hærra orkuverð
ekki áhrif þar á. Þetta segir Ágúst
H. Hafberg, framkvæmdastjóri
viðskiptaþróunar fyrirtækisins.
Ross J. Beatty, forstjóri Magma
Energy, sagði, við tilkynningu
um kaup fyrirtækisins á hlut í HS
orku, að orkuverð til stóriðju væri
of lágt hér á landi. Norðurál er
stærsti kaupandi orku frá fyrir-
tækinu. Ágúst segir að samningar
um verð hafi verið gerðir til langs
tíma og verði ekki hækkaðir ein-
hliða. Það eigi einnig við um orku
til fyrirhugaðs álvers í Helguvík.
- kóp
Hugmyndir um hærra verð:
Verð til Norður-
áls umsamið
DETROIT, AP Hugsanlegt er að töku-
maður raunveruleikaþáttar um
glæpi hafi náð því á myndband
þegar sjö ára stúlka í Detroit í
Bandaríkjunum féll fyrir skoti úr
byssu lögreglumanns.
Myndskeiðið gæti varpað ljósi
á það hvort skotið hljóp óvart úr
byssunni eins og lögregla fullyrð-
ir, eða hvort lögregla sé að reyna
að hylma yfir manndráp eins og
lögmaður foreldra stúlkunnar
hefur haldið fram.
Þáttagerðarmennirnir fylgdu
lögregluteymi í húsleit til meints
morðingja og urðu þar vitni að
því þegar stúlkan, Aiyana Jones,
var skotin til bana. - sh
Náðist hugsanlega á mynd:
Lögregla skaut
sjö ára stúlku
DÓMSMÁL Sigurður Einarsson,
fyrrverandi stjórnarformaður
Kaupþings, hefur kært til Hæsta-
réttar alþjóðlegu handtökuskip-
unina sem sérstakur saksóknari
gaf út á hendur honum í síðustu
viku. Þetta staðfesti Gestur Jóns-
son, lögmaður Sigurðar, í samtali
við Fréttablaðið í gær.
Handtökuskipunin var gefin út
á grundvelli úrskurðar frá hér-
aðsdómi, og það er sá úrskurður
sem kærður er. Málsaðilar höfðu
frest til gærdagsins að skila til
Hæstaréttar gögnum vegna máls-
ins. Búast má við að Hæstiréttur
taki afstöðu til málsins í dag eða
á morgun.
Gestur segir að úrskurður hér-
aðsdóms hafi verið kveðinn upp
fyrir luktum dyrum og að hvorki
hann né Sigurður hafi vitað af
honum fyrr en tveimur dögum
eftir uppkvaðninguna.
Ólafur Þór Hauksson, sérstak-
ur saksóknari, hefur undanfarn-
ar tvær vikur reynt að fá Sigurð
Einarsson til Íslands í yfirheyrslu
án árangurs. Hann er grunaður
um lögbrot í störfum sínum fyrir
Kaupþing líkt og fleiri fyrrver-
andi stjórnendur bankans sem
setið hafa í gæsluvarðhaldi hér á
landi og sæta nú farbanni.
Lýst var eftir Sigurði á vef
alþjóðalögreglunnar Interpol í
síðustu viku en lögregluyfirvöld
í Bretlandi hafa ekki orðið við
beiðni um að handtaka hann og
framselja til Íslands. - sh
Hæstiréttur látinn ákveða hvort handtökuskipun á Sigurð Einarsson sé réttmæt:
Sigurður kærir handtökuskipunina
EFTIRLÝSTUR Sigurður er eftirlýstur
á vef Interpol. Við það vill hann ekki
sætta sig.
Hefur gosið í Eyjafjallajökli haft
einhver bein áhrif á þig?
JÁ 34,1%
NEI 65,9%
SPURNING DAGSINS Í DAG:
Kæmi til greina að þú hættir
við að ferðast um Suðurland í
sumar vegna eldgossins í Eyja-
fjallajökli?
Segðu skoðun þína á visir.is
KJÖRKASSINN