Faxi - 01.01.1983, Page 22

MINNING
Skúli Helgi Skúlason
byggingameistari, Keflavík
Hinn 11. desember sl. var
kvaddur hinstu kveðju í Kefla-
víkurkirkju einn af þekktustu
borgurum Keflavíkur, Skúli
Helgi Skúlason byggingarmeist-
ari. Hann lést í Sjúkrahúsinu í
Keflavík 3. des. sl. eftir erfiða
sjúkdómslegu.
Skúli Helgi var fæddur 5.
febrúar 1913 í Miðdal í Laugar-
dal, Arnessýslu, en fluttist árs-
gamall með foreldrum sínum til
Keflavíkur, þar sem hann átti
heima síðan.
Foreldrar Skúla Helga voru
hjónin Skúli Skúlason smiður og
kona hans Guðrún Guðmunds-
dóttir. Þau bjuggu fyrstu árin í
húsinu við Kirkjuveginn, sem nú
er nr. 29. Þar átti Skúli heima
fyrstu árin í Keflavík. En fjög-
urra ára gamall fór hann í fóstur
til föðursystur sinnar, Önnu
Skúladóttur, og manns hennar,
Högna Ketilssonar, sem bjuggu í
Koti, en það er nú húsið nr. 4A
við Hafnargötu.
Þá voru öll hús hér með sér-
stöku heiti og þá oft kennd við
íbúana. En þegar Högni fluttist
hingað, var þama lítill torfbær,
sem hann keypti og reif og
byggði þama lítið og snoturt hús,
sem hann lét halda gamla nafn-
inu, þótt því hefði sómt veglegri
nafngift.
Þau hjónin Anna og Högni
vom annáluð fyrir snyrti-
mennsku, enda bám húsakynni
þeirra þess vitni.
Þama ólst Skúli Helgi upp og
átti þar heimili þar til hann
kvæntist og stofnaði sitt eigið
heimili að Heiðarvegi 16 í Kefla-
vík. En það hús teiknaði hann og
byggði og þar átti hann heima
þar til hann flutti í hús sitt, sem
hann einnig teiknaði og byggði,
að Tjarnargötu 30.
Snemma kom það í ljós, að
Skúli var góðum gáfum gæddur.
Sérstaklega lá stærðfræðin vel
fyrir honum. Faðir hans var hag-
leikssmiður og hafði Skúli Helgi
fengið þann eiginleika í vöggu-
gjöf, og hóf hann fljótt eftir
fermingu störf að húsasmíði með
föður sínum, og hjá honum lærði
hann allt hið verklega við þá iðn-
grein. Þegar Skúli Helgi hafði
lokið námi við Flensborgarskól-
ann í Hafnarfirði hóf hann nám
við Iðnskólann í Reykjavík og
lauk þaðan sveinsprófi á einum
vetri, 1930-31. Meistaraprófi
lauk hann vorið eftir, 1932.
Námsferill Skúla Helga ber
órækt vitni um dugnað hans og
hæfileika.
Þar sem aldursmunur okkar
Skúla Helga var nokkur, eða nær
9 ár, var eðlilegt að kynni okkar á
þessu tímabili væm lítil. En þeg-
ar ég hóf nám í Kennaraskólan-
um haustið 1930 og hafði fengið
húsnæði í Reykjavík, í herbergi í
suðurenda loftsins í húsinu við
Sóleyjargötu nr. 9, þá kemur í
ljós, að þar eru til húsa tveir
Keflvíkingar, á norðurloftinu.
Þessir Keflvíkingar voru Geir
Jónsson, nú stórkaupmaður í
Reykjavík, sem var að hefja nám
við Verslunarskóla íslands, og
Skúii Helgi Skúlason, sem hafði
þá innritast í Iðnskólann í
Reykjavík. Þeir bjuggu saman á
norðurloftinu hjá Helga Her-
manni Eiríkssyni skólastjóra, en
ég leigði suðurloftið ásamt
Gunnari Ólafssyni, sem þá var
við nám í Kennaraskólanum, og
var húsráðandi okkar Sigfús
Johnsen hæstaréttarritari. í
þessu húsi höfðum við Skúli
fæði, hvor hjá sínum húsráð-
anda. Mig minnir að fæðið hafi
kostað 25 krónur á mánuði og
húsnæði 50 kr. fyrir hvom á mán-
uði.
Þennan vetur kynntumst við
Skúli vel og hélst sá kunnings-
skapur alla tíð síðan, eftir því
sem aðstæður leyfðu.
Skúli Helgi var byggingafull-
trúi í Keflavík á ámnum 1945-
1958. Á þessu tímabili áttum við
mikið og gott samstarf að skipu-
lagsmálum Keflavíkur. Á þess-
um ámm var unnið að skipulagi
Keflavíkur, einkum á svæðinu
frá Vesturgötu að Faxabraut og
frá Hafnargötu til heiðar. Þá var
valið svæðið fyrir Bamaskólann
við Sólvallagötu, Skrúðgarðs-
svæðið afmarkað, garðland
Verkalýðsfélagsins tekið undir
byggingar, og Vatnsnesvegur
lagður frá Suðurgötu að Hring-
braut, sem þá var nýlega lögð.
Einnig var þá Tjamargata lögð
upp til heiðar. Fáa dreymdi þá að
heiðin ofan Nónvörðu yrði nokk-
urn tíma byggð.
Starf byggingafulltrúa var þá
mikið á þessum tíma, sem að
sjálfsögðu er ávallt í vaxandi
byggð, og til viðbótar því var
starf þetta unnið að mestu utan
venjulegs vinnutíma og fyrir lága
þóknun.
Eftir að Skúli Helgi hætti störf-
um byggingafulltrúa var hann í
skipulagsnefnd á árunum 1968 til
1978.
Ekki hef ég tölu á þeim fjöld
húsa, sem Skúli byggði hér í
Keflavík á starfsferli sínum, en
þau eru mörg, og á þann hátt
hefur hann einnig átt þátt í að
móta svip byggðar í Keflavík á
þessum árum.
Hann teiknaði að sjálfsögðu
og byggði hús sitt við Tjarnar-
götu 30, sem er stílhreint og fer
vel við gróskuríkan gróður, sem
þau hjónin hafa ræktað á liðnum
árum og segir sá gróður aðdáun-
arverða sögu af áhuga þeirra
hjónanna, smekkvísi þeirra og
dugnaði til þess að rækta og fegra
umhverfið til yndis og ánægju
allra, sem geta notið fagurs um-
hverfis.
Auk þeirra starfa Skúla, sem
nú hafa verið greind, rak hann í
mörg ár, ásamt bróður sínum,
Guðmundi, trésmíðaverkstæðið
Reyni í Keflavík í húsi sem þeir
bræður byggðu og er það hús nú
aðsetur Tónlistarskóla Keflavík-
ur.
Árin 1936 og 1937 hafði Iðnað-
armannafélag Keflavíkur skóla í
Keflavík til undirbúnings náms í
iðnskóla. Skóli þessi var til húsa í
skólastofum Félagshúss. Kennsl-
una önnuðumst við Skúli Helgi,
bæði árin. Var þetta vísir að Iðn-
skóla Suðurnesja, sem stofnaður
var 1943.
Skúli var einn af stofnendum
Byggingaverktaka Keflavíkur hf.
1957 og var stjórnarformaður
þeirra um árabil, og á sama tíma
ráðgefandi þar í sínu fagi. Eftir
að hann hætti formennsku, hélt
hann störfum áfram í sínu fagi,
svo lengi, sem kraftar leyfðu,
enda kunnu starfsfélagar hans
vel að meta forystuhæfileika
hans á frumbýlisárum fyrirtækis-
ins.
Skúli var um skeið í stjórn Iðn-
aðarmannafélags Keflavíkur og
ritari þess á árunum 1934-38.
Hann var heiðursfélagi þess.
Á annasömum æviferli Skúla
hafa tómstundir hans verð fáar,
til að sinna tómstundagamni eða
íþróttum. Þó vissi ég til, að hann
hafði áhuga á tafli og iðkaði hann
það nokkuð á skólaárum sínum.
Enda var það íþrótt við hans
hæfi.
Systkini Skúla voru þessi:
Guðmundur, trésmíðameistari í
Keflavík, Elín, ekkja Vilhelms
Ellefsen, og Sigríður, ekkja Hall-
dórs Fjalldals, báðar búsettar í
Keflavík, og Sigrún, sem býr í
Reykjavík.
Hinn 25. nóvember árið 1939
gekk Skúli Helgi að eiga eftirlif-
andi konu sína, Ragnheiði Guð-
mundu Sigurgísladóttur, sem
ættuð er frá Akranesi. Hafa þau
búið í Keflavík alla sína búskap-
artíð, og hafa þau átt miklu
barnaláni að fagna. Börn þeirra
eru þessi: Jón Gunnar, verkfræð-
ingur, kvæntur Hildigunni Ólafs-
dóttur, afbrotafræðingi; Skúli,
verkfræðingur, ókvæntur; Bald-
ur, kennari, kvæntur Kristínu
Jónasdóttur, kennara; Anna,
meinatæknir, gifti Brynjólfi
Mogensen, lækni; Sigurgísli, sál-
fræðingur, kvæntur Kristínu Ulf-
ljótsdóttur, hjúkrunarfræðingi;
Guðrún, gift Magnúsi Eggerts-
syni, starfsmanni við Álverið í
Straumsvík; Arna, hjúkrunar-
fræðingur, gift Júlíusi Einars-
syni, pípulagningameistara;
Hrefna Margrét, læknanemi, og
Katrín Freyja, menntaskóla-
nemi. Barnabörnin eru nú 12.
Um leið og ég þakka góðum
dreng ánægjuleg kynni og sam-
starf á löngu liðnum árum, fær-
um við hjónin konu hans og
börnum, svo og öðrum aðstand-
endum, hjartanlegar samúðar-
kveðjur.
Ragnar Guðleifsson
22 - FAXI