Morgunblaðið - 29.12.2009, Blaðsíða 2
KVENFÉLAGSKONUR um land allt
hafa ákveðið að prjóna húfur handa
öllum nýfæddum börnum á landinu
árið 2010. Er þetta gert til að minna
á að á næsta ári eru 80 ár liðin frá
því að kvenfélög landsins mynduðu
með sér Kvenfélagasamband Ís-
lands en forseti þess er Sigurlaug
Viborg.
„Konur í kvenfélögunum vilja
með þessu senda hlýja kveðju til
nýrra þjóðfélagsþegna og foreldra
þeirra,“ segir í fréttatilkynningu.
Áætlað er að um 5.000 börn muni
fæðast á árinu á Íslandi og fara fæð-
ingar fram á tíu stöðum á landinu; á
Akranesi, Ísafirði, Sauðárkróki, Ak-
ureyri, Neskaupstað, Höfn, Selfossi,
Vestmannaeyjum, Keflavík og
Reykjavík auk heimafæðinga.
Ullarfyrirtækið Ístex styrkir
verkefnið með útgáfu á prentuðum
kortum með heillaóskum til foreldr-
anna. Kortið fylgir hverri húfu og er
fært inn á það nafn konunnar sem
prjónaði húfuna og hvaða kvenfé-
lagi hún tilheyrir.
„Notað verður kambgarn í húf-
urnar sem einnig er kallað ullar-
band,“ segir Margrét Baldursdóttir,
gjaldkeri Kvenfélagasambandsins.
Hún er í nefndinni sem sér um verk-
efnið. „Um 4.000 konur eru í kven-
félögum landsins og við vonum að
sem flestar taki þátt í þessu en við
rennum auðvitað blint í sjóinn með
það. Og einhverjar prjóna kannski
yfir hundrað húfur, sumar eru best-
ar í að elda en aðrar að prjóna. Þetta
er samvinnuverkefni.“
Ljósmæður sem annast fæðingar
munu afhenda foreldrum húfurnar.
Verkefnið fer af stað á nýársdag og
sagði Margrét að þegar væri byrjað
að senda húfur á fæðingardeildir
víða um land. Einnig verður séð til
þess að börn sem fæðast heima verði
ekki útundan. Margir, sem ekki eru í
kvenfélögum, hafa sýnt áhuga á að
fá að prjóna húfur og fagna kven-
félagskonur því og hvetja viðkom-
andi til að hafa samband við kven-
félög á hverjum stað eða við
Kvenfélagasambandið. kjon@mbl.is
Húfur handa öllum
nýfæddum börnum 2010
Kvenfélagasambandið vill minna á 80 ára afmæli sitt
2 FréttirINNLENT
MORGUNBLAÐIÐ ÞRIÐJUDAGUR 29. DESEMBER 2009
©
IL
V
A
Ís
la
n
d
20
0
9
ILVA Korputorgi, Blikastaðavegi 2-8 112 Reykjavík
31. des. fimmtudagur 9-12 1. jan. föstudagur LOKAÐ
laugardagur 10-18 sunnudagur 12-18
einfaldlega betri kostur
Siena.
Kampavínsglas 180 ml
495,-/stk.
Gleðilegt
nýtt ár
Morgunblaðið Hádegismóum 2, 110 Reykjavík. Sími 5691100 Fréttir ritstjorn@mbl.is Fréttastjórar Sunna Ósk Logadóttir, sunna@mbl.is Sigtryggur Sigtryggsson, sisi@mbl.is Viðskipti vidsk@mbl.is
Ívar Páll Jónsson, fréttastjóri, ivarpall@mbl.is Menning menning@mbl.is Umræðan | Bréf til blaðsins Guðlaug Sigurðardóttir, ritstjórnarfulltrúi, gudlaug@mbl.is Minningar mbl.is/sendagrein, Arnór
Ragnarsson Íþróttir sport@mbl.is Sigurður Elvar Þórólfsson, seth@mbl.is Víðir Sigurðsson, vs@mbl.is mbl.is netfrett@mbl.is Guðmundur Sv. Hermannsson fréttastjóri gummi@mbl.is
Eftir Kristján Jónsson
kjon@mbl.is
LOKAUMRÆÐA um Icesave-
frumvarp ríkisstjórnarinnar hófst á
Alþingi í gær en samkomulag hefur
orðið um það að umræðunni ljúki með
atkvæðagreiðslu á morgun. Guð-
laugur Þór Þórðarson, þingmaður
Sjálfstæðisflokks, sagði í umræðun-
um að ráðherrar hefðu margsinnis
verið staðnir að ósannindum á árinu
þegar fjallað hefði verið um Icesave
og spurði hvers vegna menn ættu að
trúa þeim núna.
Guðlaugur Þór minnti á að Friðrik
Már Baldursson hagfræðingur hefði
skilað áliti þar sem fram kæmi að
hugsanlega nægði gjaldeyrisforðinn
til að standa undir greiðslubyrði rík-
isins 2011 og 2012. En ef ekki, þá
væru „líkur á greiðslufalli“ ríkis,
sveitarfélaga og opinberra fyrir-
tækja.
Í áliti minnihluta viðskiptanefndar
(Eyglóar Harðardóttur og Margrétar
Tryggvadóttur) er fjallað um óvissu
um greiðslugetu ríkisins árin 2009-
2024 en áætlað sé að heildarend-
urgreiðslur vegna eldri lána og vaxta-
greiðslna nemi um 756 milljörðum
króna árin 2011-2015 miðað við nú-
verandi gengi. „Þessi upphæð er
hærri en allt það fjármagn sem Al-
þjóðagjaldeyrissjóðurinn og önnur
lönd hafa lofað að lána Íslandi sem
hluta af efnahagsáætlun sjóðsins og
ætlað er að styrkja varagjaldeyr-
isforðann,“ segir í álitinu.
Árni Páll Árnason félagsmálaráð-
herra sagði í umræðunum að danska
fjármálaráðuneytið hefði sent fjár-
málanefnd danska þingsins bréf 23.
nóvember þar sem fram kæmi að lán-
veiting Norðurlandanna til Íslands
væri háð því að Íslendingar gengju
frá samningum um Icesave.
Engin frekari fyrirgreiðsla
„Sú lánafyrirgreiðsla sem við höf-
um þegar fengið er fengin í trausti
þess að frá samningum um Icesave
verði gengið og ef þeir samningar
verða felldir nú er lánafyrirgreiðsla
okkar, þegar veitt, öll í uppnámi, við
allar Norðurlandaþjóðirnar og Al-
þjóðagjaldeyrissjóðinn og frekari
lánafyrirgreiðsla er ekki í boði,“ sagði
Árni Páll. Fulltrúi Hreyfingarinnar í
fjárlaganefnd sagðist ekki geta mælt
með því að Alþingi samþykkti nýja
útgáfu af ríkisábyrgð vegna Icesave.
Þingmenn Sjálfstæðisflokks vilja
að frumvarpinu verði vísað frá en
framsóknarmenn að því verði vísað til
ríkisstjórnarinnar. „Þetta eru stór-
hættulegir gjörningar sem alls ekki
má samþykkja. Á fyrri öldum stóðu
Íslendingar saman gegn ofríki er-
lendra þjóða. Því er vart hægt að trúa
að nú ætli ráðamenn þjóðarinnar að
leggjast flatir fyrir slíku valdi,“ segir
m.a. í áliti sjálfstæðismanna í fjár-
laganefnd. Er lagt til að formenn
allra flokka reyni að taka upp við-
ræður við Breta og Hollendinga í úr-
slitatilraun til að verja hagsmuni
þjóðarinnar.
Há greiðslubyrði
Ríkið borgar alls 756 milljarða vegna eldri lána og vaxta 2011-
2015 sem er meira fé en öll lánin frá öðrum ríkjum og AGS
LIÐIN eru 15 ár síðan þingfundir voru haldnir síðast milli jóla og nýárs.
Talsverður hiti var um það leyti í pólitíkinni, Jóhanna Sigurðardóttir var
nýgengin úr ríkisstjórn Sjálfstæðisflokksins og Alþýðuflokksins og svo fór
að fjárlög voru afgreidd á löngum næturfundi aðfaranótt 22. desember.
Stjórnarandstaðan gerði tilraun til að reyna þolrifin í mönnum með mál-
þófi, eins og heimildarmaður blaðsins orðaði það. Eftir var að afgreiða lög
um tekjuskattsbreytingu og ráðstafanir í ríkisfjármálum og lánsfjárlög,
einnig var þráttað um landbúnaðinn og Heimsviðskiptastofnunina. En ekki
virðist hafa verið um að ræða einhver minnisstæð mál nema það hafi þá
verið lög um skipulag ferðamála og önnur um mat á sláturafurðum.
Málþófi beitt í árslok 1994
Morgunblaðið/Kristinn
Gaman og alvara Össur Skarphéðinsson utanríkisráðherra var kampakátur á Alþingi í gær þótt hart væri tekist á
um Icesave í þriðju og síðustu umræðu sem hófst í gær. Gert er ráð fyrir að frumvarpið verði afgreitt á morgun.
FRÉTTASKÝRING
Eftir Andra Karl
andri@mbl.is
HÆSTIRÉTTUR staðfesti á Þor-
láksmessu að maðurinn, sem er þrí-
tugur, skyldi afplána 225 daga eftir-
stöðvar fangelsisrefsingar en hann
var dæmdur í fimmtán mánaða fang-
elsi 20. mars sl. Honum var veitt
reynslulausn 16. september og nán-
ast samstundis hóf hann að stunda af-
brot. Meðal annars viðurkenndi hann
hjá lögreglu að hafa stolið þremur
bílum og brotist inn í einn. Þrátt fyrir
það var honum ávallt sleppt.
Maðurinn á að baki nokkurn saka-
feril og var í október 2007 dæmdur í
þriggja mánaða fangelsi. Tveimur
mánuðum síðar var hann dæmdur í
átta mánaða fangelsi. Hann rauf skil-
orðið með brotum sínum. Hinn 9. maí
2008 var hann dæmdur í tveggja
mánaða fangelsi en um hegningar-
auka var að ræða. Degi síðar var hon-
um veitt reynslulausn í eitt ár. Þá átti
hann eftir að afplána 137 daga.
Eðlilegt að veita reynslulausn
Í febrúar sl. var maðurinn hneppt-
ur í gæsluvarðhald eftir sjö mánaða
samfellda brotahrinu. Á þeim tíma
tók hann átta bíla ófrjálsri hendi.
Meðal annars einn á aðfangadag á
síðasta ári. Hann ók um á bílnum þar
til lögregla stöðvaði hann 19. janúar.
Þann sama dag stal hann öðrum bíl.
Maðurinn var eins og áður segir
dæmdur í fimmtán mánaða fangelsi
20. mars sl. en veitt reynslulausn 16.
september.
Í lögum um fullnustu refsinga eru
ákvæði um reynslulausn. Þar segir
m.a.: „Fanga, sem telst vera síbrota-
maður eða sem ítrekað hefur verið
veitt lausn til reynslu og rofið skilyrði
hennar, skal ekki veitt reynslulausn á
ný nema sérstakar ástæður mæli
með.“
Páll Winkel fangelsismálastjóri
segir eðlilegar ástæður liggja að baki
því að viðkomandi einstaklingur hafi
fengið reynslulausn þrátt fyrir að
rjúfa skilorð áður. Hann hafi aðeins
setið inni í tvö skipti og geti því ekki
talist síbrotamaður samkvæmt skiln-
ingi laganna. Hann segir skilgrein-
inguna ekki endilega þá sömu og hjá
dómstólum, auk þess sem meta þurfi
aðra þætti, s.s. hegðun í afplánun,
aldur viðkomandi o.s.frv.
Stofnaði vegfarendum í hættu
Frá þeim tíma sem manninum var
veitt reynslulausn hefur hann komið
við sögu í sjö sakamálum, sem vitað
er um. Ekkert benti til þess að hann
léti af afbrotum og lauk hrinu hans
þetta skiptið með handtöku eftir
háskalega eftirför lögreglu.
Maðurinn ók á móti umferð á mik-
illi ferð og raskaði þannig umferðar-
öryggi á alfaraleið og stofnaði á ófyr-
irleitinn hátt lífi og heilsu vegfarenda
á akstursleiðinni í augljósan háska,
líkt og segir í greinargerð lögreglu-
stjóra. Hann var undir áhrifum vímu-
efna.
Rauf ítrekað
skilorð en var
alltaf sleppt
Óslitin brotahrina, en ekki síbrotamaður
Morgunblaðið/RAX
Yfirbugaður Maðurinn velti bílnum
í Kópavogi eftir eftirför lögreglu.
Ökuníðingi sem olli mikilli al-
mannahættu með aksturslagi
sínu 20. desember sl. var veitt
reynslulausn 16. september. Frá
þeim tíma hafði hann tekið sex
bifreiðar ófrjálsri hendi.