Litli Bergþór - 01.12.1994, Blaðsíða 3

Ritstjómargrein
Nú eru liðin nokkur ár síðan tæknibyltingin hélt innreið sína í Litla-Bergþór. Keypt var tölva og
umbrotsforrit til að vinna blaðið. Ritnefndarmenn voru að vonum hikandi við að taka svo stórt
skref í vinnslu við blaðið og raddir heyrðust, sem töldu tæknina geta verið blaðinu fjötur um fót.
Reynslan hefur orðið sú að tæknin hefur hjálpað ritnefndarmönnum mjög og eflt áhuga okkar á að
gera Litla-Bergþór að metnaðarfullu ungmennafélagsblaði. í sumar tók ritnefndin ákvörðun um að
efla enn við tæknihlið blaðaútgáfunnar og var keypt ný tölva af Macintosh gerð tegund LC 475. Og
fyrir þá sem eru forvitnir um vinnslugetu vélarinnar er hægt að geta þess að innra minni tölvunnar
er 8 MB og diskarýmilöO K. Jafnframt var keypt uppfærsla á umbrotsforriti blaðsins Page Maker 5
en það forrit er mjög stórt og þarfnast stórrar tölvu.
Kaupendur blaðsins urðu þess áreiðanlega varir að á s.l. ári þurfti ritnefndin að hækka verulega
áskriftagjöld á blaðinu. En það var ekki vegna þeirra tækniframfara sem Litli-Bergþór fór í heldur
vegna ákvörðunar ríkisstjórnarinnar um að leggja virðisaukaskatt á alla blaðaútgáfu. Þetta þýðir að
ríkið vill fá tekjur af því að Ungmennafélag Biskupstungna stendur að blaðaútgáfu eins og hér er
gert. Eins og þetta snýr að okkur í ritnefndinni, þá skýtur það mjög skökku við að ríkisvaldið skuli
heimta tekjur af vinnu er unnin er algerlega í sjálfboðavinnu.
Félagasamtök eins og Ungmennafélög eiga ekki að þurfa að þola það að vera sett undir sama hatt
og almennur atvinnurekstur þótt þau gefi út blað. Það á ekki að letja félagastarf með skattheimtu.
Skattheimtan krefst þess til dæmis að farið sé 6 sinnum á ári yfir fjárhag Litla-Bergþórs bara til þess
að finna út hve mikið ríkisvaldið á að fá vegna þeirrar vinnu sem lögð hefur verið fram af
áhugamennskunni.
Ritnefndin hefur oft velt því fyrir sér hve mikil vinna það er að gefa út hvert eintak af Litla-
Bergþóri en ennþá hefur hún ekki gert tæmandi úttekt á þeirri vinnu. En hún er mikil. Haldnir eru
a.m.k. 5-6 vinnufundir vegna hvers blaðs. Hver fundur stendur í u.þ.b. 3 tíma. Á hvern fund mæta
allir ritnefndarfulltrúar alls 5 manns. Þetta þýðir um 75-90 vinnustundir á blað. Auk þess þarf að
setja upp blaðið og tekur það a.m.k. 40 vinnustundir. Síðan þarf að koma blaðinu í prentun og svo
þarf að pakka því og senda til áskrifenda. Safna þarf styrktarlínum og prófarkalestur er mjög
veigamikill þáttur. Þetta tekur allt talsverðan tíma og umstang. Ritnefndarfulltrúar og aðrir taka
myndir á eigin kostnað. Ekki stundar Litli-Bergþór mikla blaðamennsku þannig að flest efni er
samið og sent af þeim sem vilja koma einhverju á framfæri í blaðinu.
En hvernig sem þetta allt snýr þá fær skattheimtan talsvert í sinn vasa, þótt heildarveltan á árinu sé
undir hálfri milljón króna.
Ljóst er að tæknibyltingin hefur ekki gert vinnuna við Litla Bergþór minni en áður var, en hún
hefur gert blaðið virðulegra og ánægjan við að vinna það helst. Ef til vill sést það best á því hve
þaulsetnir sumir ritnefndarmenn Litla-Bergþórs hafa verið undanfarin ár.
En það er erfitt að láta sér lynda að sú vinna sem unnin er af einlægum hug til handa félagastarfi
eins og Ungmennafélaginu sé gert að fjáröflunartæki fyrir ríkiskassann. Það er óþolandi að ekki sé
hægt að gefa sína vinnu til félagsstarfs án þess að ríkisvaldið búi til lög svo það geti hagnast á því
og fái skatttekjur af og geri um leið enn meiri kröfur um vinnuframlag með allskonar lagagreinum
og ákvörðunum um virðisaukaskattaálögur á félagastarfsemi sem þessa.
D.K.
Litli - Bergþór 3