Árbók VFÍ/TFÍ - 01.06.2009, Page 335
þ.e. vel heyrist í þeim sem talar allstaðar í salnum
án annarrar mögnunar. Þá eru stillingar sem henta
fyrir ritmatónlist og sem líkja eftir hljóðvist stórrar
kirkju. Hæsta stilling gefur möguleikann á því að
setja ómtímann í rúmlega 12 sekúndur sem er
ómögulegt til nokkurra hagnýtra nota en mjög
áhrifamikið engu að síður og gaman að heyra þar
sem ólíklegt er að fólk komist í tæri við slíkt annars
staðar.
Ómtíminn í salnum hefur verið mældur með og án
kerfisins og á mynd 4 má sjá niðurstöður þeirra
mælinga fyrir nokkrar forstillingar. Neðsta kúrfan
sýnir ómtímann í salnum án kerfisins og er hann
um 0,75 s hinar kúrfurnar sýna svo hvernig
ómtíminn breytist þegar skipt er milli forstillinga.
Af hverju hljómbótarkerfi? - Gæði og reynsla
Nú hefur nokkuð verið rætt um hvort sú upplifun sem kerfið gefur standist samanburð
við hefðbundna tónlistarsali, s.s. bestu óperuhallir o.þ.h. Að mörgu leyti er slík umræða
á villigötum. Kerfi sem þessi geta líkt eftir aðstæðum í stærri og sérhæfðari sölum og gera
það mjög vel. Þau munu samt líklega aldrei koma alveg í staðinn fyrir klassíska sinfóníu-
eða óperusali, svo dæmi séu tekin, en að sjálfsögðu er margt annað en bara hljóð sem
spilar inní. Það sem svona kerfi býður hinsvegar uppá, sem hefðbundnir salir gera ekki,
er aðallega tvennt. í fyrsta lagi er það sveigjanleiki. Frábært óperuhús verður aldrei góður
fyrirlestrarsalur en með hljómbótarkerfi má gera góðan fyrirlestrarsal að góðu óperuhúsi.
I öðru lagi er það möguleikinn á því að auka nýtni húsnæðis sem fyrir er. Salur af svipaðri
stærðargráðu og salurinn á Akranesi verður aldrei mjög hentugur fyrir t.d. óperur eða
sinfóníur án rafrænnar aðstoðar, til þess er rúmmal salarins einfaldlega of lítið.
Uppsetning slíks kerfis er þar að auki margfalt ódýrari en stórtækar byggingar-
framkvæmdir. Hljómbótarkerfi eru því kjörin lausn í mörgum tilvikum t.d. á höfuð-
borgarsvæðinu. Þetta á þó kannski sérstakíega við úti á landi, í minni sveitarfélögum þar
sem áhugi er fyrir því að halda hverskonar menningaruppákomur en húskostur hentar
ekki hverju sem er. Óraunhæft er að ætla að reist verði sérhæfð tónlistarhús um allt land
en auðveldlega mætti auka notagildi og bæta gæði sala sem fyrir eru án mikils tilkostn-
aðar með uppsetningu hljómbótarkerfis.
Salurinn á Akranesi var tekinn í notkun í október
2007 og er því komin á hann rúmlega tveggja ára
reynsla. Að sögn aðstandenda salarins er hljóm-
bótarkerfið mikið notað og er það ekki síst vegna
þess hve auðvelt það er í notkun. Þar hafa verið
haldnir tónleikar af ýmsu tagi, fyrirlestrar og kynn-
ingar, ráðstefnur, vídeósýningar o.fl., auk þeirra
nota sem Tónlistarskólinn á Akranesi hefur haft af
rýminu við kennslu og þess háttar. Notendur
salarins, atvinnumenn jafnt sem áhugamenn, hafa
almennt farið mjög lofsamlegum orðum um hann
og þá upplifun sem kerfið gefur. Þegar öllu er á
botninn hvolft er það að sjálfsögðu þetta sem
skiptir mestu máli.
Tækni-og vísindagreinar i 333