Bændablaðið - 05.09.2013, Side 16

16 Bændablaðið | Fimmtudagur 5. september 2013
Hlaupin eru lífsstíll
– bóndasonur úr Bitru lengir lífið með langhlaupum og sigrum
„Heima í Gröf var oft talað um þá
sem voru léttir á fæti og þrekmiklir.
Þeir voru hetjur og nutu mikillar
virðingar í umræðunni við
eldhúsborðið. Held þó að hlaup
sem íþrótt hafi ekki verið mikið til
umræðu,“ segir Stefán Gíslason,
umhverfisstjórnunarfræðingur
og stofnandi og eigandi UMÍS ehf.
Environice með meiru.
Stefán segist hafa fengið
hlaupaáhugann fyrst og fremst frá
föður sínum, Gísla Gíslasyni bónda
í Gröf.
„Pabbi ólst upp áður en byrjað
var að keppa í hlaupum að ein-
hverju ráði, en sem krakki heyrði
ég margar sögur af óvenjulegri
getu hans á þessu sviði, bæði úr
smalamennskum og af ótrúlegum
ferðum hans þegar hann vann hvað
mest við smíðar og fór á tveimur
jafnfljótum á milli héraða með tól
og tæki á bakinu. Hann hljóp líka
meira og minna við fót þegar hann
var að fara á milli staða og mér
fannst hann rosalega fljótur! Ég
held að ég hafi verið tólf ára þegar
ég náði því fyrst að hlaupa hraðar
en pabbi einhvern spotta. Þá var
hann rúmlega sextugur. Einhvern
tímann í seinni tíð heyrði ég það
haft eftir pabba að það væri enginn
vandi að hlaupa uppi rollur. Þær
gæfust yfirleitt upp eftir einn eða
tvo tíma. Eitthvað fannst mönnum
fjarstæðukennt að hlaupa svo lengi
samfellt en fyrir pabba var þetta
bara hið sjálfsagðasta mál.
Nákvæmni og mishæðótt braut
Bræðurnir Stefán og Rögnvaldur,
nú bóndi í Gröf, fóru ungir að halda
sín eigin „frjálsíþróttamót“ heima.
„Til að byrja með var aðallega
keppt í langstökki og þrístökki. Við
útbjuggum stökkgryfjur og sóttum
sand í þær á dráttarvélinni, enda
var Valdi orðinn flinkur vélamaður
á þessum tíma. Svo útbjuggum við
sérstaka mælistiku og mældum út
mismunandi vegalengdir á vegunum
gegnum túnin heima. Þá var hægt að
fara að keppa í hlaupum. Reyndar
minnir mig að ég hafi verið orðinn
fjórtán ára þegar hlaupakeppnir
voru farnar að tíðkast að ráði hjá
okkur bræðrunum. Þá fékk ég líka
úr með sekúnduvísi í fermingar-
gjöf, sem gerði það mögulegt að
taka tímann. Maður lagði bara af
stað á heilu mínútunni og gat þá gert
þetta nokkurn veginn með einnar
sekúndu nákvæmni. Vorið 1972
þegar ég var 15 ára var ég farinn
að hlaupa 800 m á um það bil 2:40
mín. 800 metra brautin var svolítið
mishæðótt, en hún lá eftir veginum
frá Grafargilinu út að Folaldslaut,
nákvæmlega útmæld með mælistiku
okkar bræðranna.
Í tvídbuxum á hlaupabrautinni
Stefán taldi sig vel undirbúinn eftir
æfingarnar heima og mætti á sitt
fyrsta héraðsmót þetta sumar 1972
og sigraði örugglega í 800 metra
hlaupi á grasvellinum við Sævang.
„Ég var íklæddur hlírabol sem
mér hafði áskotnast á Reykjaskóla
veturinn áður og tweedbuxum sem
mamma hefur sjálfsagt verið nýbúin
að kaupa á mig sem sparibuxur.
Skótauinu er ég búinn að gleyma, en
ég hafði ekki heyrt um ASICS þegar
þetta var og gaddaskór komu ekki
við sögu fyrr en ári síðar. Hins vegar
átti ég örugglega ágæta strigaskó,
því að svoleiðis skóbúnaður var
ómissandi í sveitinni þegar unnið
var í þurrheyi í góðu veðri eða
hlaupið sér til skemmtunar.“
Stefán hóf nám í Mennta-
skólanum við Hamrahlíð haustið
1973 og byrjaði þá að æfa frjálsar
íþróttir með ÍR.
„Ég entist að vísu ekki lengi í því
og var aldrei meira en efnilegur. En
hlaupin voru komin til að vera. Ég
hef hlaupið eitthvað af og til síðan
og aldrei misst heilt ár úr. Sumarið
1985 fór ég í mitt fyrsta almennings-
hlaup og síðan hefur þeim fjölgað
smátt og smátt og vegalengdirnar
aukist.“
/AG
Smaladagur í Gröf. Myndin er tekin í síðasta skipti sem Gísli Gíslason, faðir Stefáns, tók þátt í smalamennsku, en
Mynd / Hallgrímur Gíslason.
Mynd / Arnheiður Guðlaugsdóttir
Hönnunarsamkeppni til heiðurs
íslensku sauðkindinni
Verkefnastjórn söfnunarinnar
„Gengið til fjár“ efnir nú til
hönnunar samkeppni í samvinnu
við Ístex og Landssamtök sauðfjár-
bænda um gerð peysu úr íslenskri
ull þar sem þema samkeppninnar
er óblíð veðrátta.
Þann 10. september 2012
skall á aftakaveður á Norður- og
Norðausturlandi með skelfilegum
afleiðingum fyrir bændur og búfénað
á svæðinu. Talið er að um tíu þúsund
fjár hafi orðið úti.
Eftir veðuráhlaupið sannaðist þó
hið fornkveðna hversu íslenska ullin
er einstök; hlý og einangrandi, því
langt fram á haust fannst sauðfé á
lífi sem grafist hafði í fönn.
Í kjölfar óveðursins hrintu
Landssamtök sauðfjárbænda af
stað söfnunarátaki „Gengið til fjár“
vegna þess tjóns sem sauðfjárbændur
á Norðurlandi urðu fyrir í óveðrinu.
Fljótlega komu upp þær hugmyndir
að efna til ritgerðasamkeppni um
vitsmuni íslensku forystukindarinnar
og hönnunarsamkeppni um peysu úr
íslensku ullinni.
Hönnun peysunnar skal
endurspegla þema samkeppninnar
um óblíða veðráttu og skilyrði er
sett að að peysan sé úr íslenskri ull,
sama hvort notað er band eða lopi,
sauðalitir eða aðrir litir.

Vegleg verðlaun í boði
Fyrstu verðlaun eru 100 þús. kr.,
flugmiði fyrir tvo með Flugfélagi
Íslands sem gildir á áfangastaði
félagsins innanlands og gisting og
kvöldverður á Icelandair hóteli.
Önnur verðlaun eru 70 þús. kr og
værðarvoð frá Ístex.
Þriðju verðlaun eru 30 þús. kr og
værðarvoð frá Ístex.

Í dómnefnd sitja:
Gísli Einarsson, ritstjóri Landans,
Hulda Hákonardóttir, Markaðs-
og kynningarstjóri Ístex og
Jóhanna E. Pálmadóttir, bóndi og
framkvæmdastjóri Textílseturs
Íslands.

Peysunum skal skilað til Ístex,
Völuteigi 6, 270 Mosfellsbæ, fyrir 1.
október 2013 merktum með dulnefni
en nafn, heimilisfang og símanúmer
látið fylgja með í lokuðu umslagi
merktu dulnefninu. Peysunum
verður skilað að lokinni keppni.
Verðlaunaafhending verður fyrsta
vetrardag, laugardaginn 26. október
2013. Til stendur að efna til sýningar
á öllum peysum sem sendar verða í
keppnina.
Markmiðið með þessari sam-
keppni er að heiðra íslensku sauð-
kindina og íslenska prjónahefð og
stuðla að listiðnaði og hönnun.
Uppskeruhátíð á Flúðum 7. september:
Uppsveitahringurinn hlaupinn
og hjólaður í annað sinn
Uppskeruhátíð á Flúðum og
nágrenni er orðin árviss viðburður
og verður að þessu sinni haldin
laugardaginn 7. september. Sama
dag er íþróttaviðburðurinn
„Uppsveitahringurinn“
haldinn í annað sinn þar
sem hlaupið og hjólað
verður um uppsveitir
Árnessýslu.
Vegalengdirnar eru 10
km hlaup, 46 km hjólreiðar
og 10 km hjólreiðar, sem eru
ný grein í Uppsveitahringnum í ár,
skráning á www.hlaup.is. Nánar um
dagskrá uppskeruhátíðar á www.
sveitir.is og Facebook. Lagt verður af
stað frá Flúðum og hjólað í gegnum
Skeiða- og Gnúpverjahrepp, þaðan
yfir í Bláskógabyggð, í gegnum
Laugarás og Reykholt, yfir brúna
við Bræðratungu og inn á Flúðir
í Hrunamannahreppi þar sem
endamarkið verður staðsett.
Hrunamannahreppur
er mikil matarkista og á
þessum degi kynna heima-
menn og selja alls kyns
framleiðslu og afurðir úr
heimabyggð. Víða eru opin
hús, margt að skoða og handverks-
fólk og listamenn sýna verk og selja.
Þakkargjörðarmessa er fastur liður í
dagskránni enda mikilvægt að þakka
fyrir það sem við erum svo heppin
að fá að njóta. /MHH
KAUPI BER
Íslensk hollusta ehf
islenskhollusta@islenskhollusta.is
Sími 864-4755