Morgunblaðið - 25.06.2013, Qupperneq 26

26 MINNINGAR
MORGUNBLAÐIÐ ÞRIÐJUDAGUR 25. JÚNÍ 2013
Með eftirfarandi
orðum viljum við í Hljómkórnum
kveðja félaga okkar og vin, Eið
Ágúst Gunnarsson óperusöngv-
ara. Eiður var valmenni í víðasta
skilningi. Hann var glæsilegur á
velli, einstakt prúðmenni, fágaður
í framkomu, bjartur yfirlitum og
með djúpblá augu sem bjuggu yfir
mikilli mildi. Eiður hafði leiftrandi
kímnigáfu en umfram allt var
hann traustur maður. Hann var
vel menntaður söngvari og tónlist-
armaður, nam fyrst hér heima hjá
Þorsteini Hannessyni og síðar hjá
Sigurði Demetz áður en hann hélt
utan til frekara náms og starfa í
erlendum óperuhúsum þar sem
hann starfaði í áratugi. Eiður
hafði einstaka bassarödd sem var
karlmannleg og hlý og hljómurinn
var einstaklega þéttur og fallegur.
Hann var sérlega vel gefinn sem
skilaði sér í söng hans og túlkun.
Að syngja með Eiði var einstakt.
Þétt bassarödd hans var þannig
að hún hjúpaði hljóm kórsins sem
við sungum saman í, Hljómkórn-
um, en slíkt er ekki á færi nema
afburðasöngvara.
Fyrir tveimur árum héldu nem-
endur Eiðs tónleika honum til
heiðurs. Það var sérlega ánægju-
legt að fara á þá. Nemendurnir
sýndu á þennan fallega hátt
hversu mikils þeir mátu Eið sem
kennara og manneskju. Skemmst
er frá því að segja að söngvararnir
báru kennara sínum fagurt vitni
og skipa sumir þeirra sér í
fremstu röð íslenskra söngvara.
Eiði var fjölmargt gott gefið.
Hann var afreksmaður í frjálsum
íþróttum þar sem kastgreinarnar
voru hans aðalgreinar. Þá var
hann góður skákmaður og töldu
elo-stigin, að því er við best vitum,
vel yfir 2.000 stig. Eiður var mjög
hagmæltur og gaf hann út ljóða-
bók sem innihélt kveðskap um
margt í hinu daglega lífi og þar
endurspeglaðist húmorinn hans,
sem gat oft verið beittur. Síðustu
árin stundaði Eiður golfíþróttina
ásamt Lucindu, eiginkonu sinni, af
mikilli ástríðu.
Að leiðarlokum viljum við
þakka Eiði fyrir allan samsönginn
í gegnum árin sem urðu mörg og
farsæl. Hann var fagmaður fram í
fingurgóma og var skarð hans
vandfyllt þegar hann hætti að
syngja sökum veikinda. Eiður
sýndi mikið æðruleysi í veikindum
sínum og tók þeim af karl-
mennsku. Hann kvartaði aldrei.
Allan þennan tíma sýndi Lucinda
eiginmanni sínum ást og um-
hyggju sem aldrei gleymist. Hún
hefur misst mikið sem og Grímur
og allir þeir sem Eið þekktu.
Blessuð sé minning Eiðs Ágústs
Gunnarssonar, hann var val-
menni.
Fyrir hönd Hljómkórsins,
Jóhanna og Ragnheiður
Linnet.
Eiður Ágúst
Gunnarsson
✝ Eiður ÁgústGunnarsson
var fæddur 22.
febrúar 1936. Hann
lést 15. júní 2013 á
Landspítalanum í
Fossvogi.
Útför Eiðs
Ágústs fór fram frá
Fossvogskirkju 24.
júní 2013.
Eiður Ágúst
Gunnarsson bassa-
söngvari var lista-
maður af Guðs náð,
kennari par excel-
lence, duflaði við
skáldagyðjuna ævi-
langt, var slyngur
fyrstaborðs-maður í
skák á árum áður og
landsliðsmaður eldri
kylfinga í golfi, í
blóma lífs. Þar að
auki var hann góður, vandaður
maður, heill í öllu sem hann gerði.
Þetta eru háværar fullyrðingar
um svo hógværan mann sem Eið-
ur Ágúst var. Hann hefði eflaust
litið við mér svona útundan sér,
eins og myndin af honum í Mbl
sýnir hann. Síðan hefði færst yfir
andlitið strákslegt glott, eins og
venjulega er hann lagði til atlögu
út af einhverju hugðarefni, sem
honum fannst þess virði að kýtast
á um, og beðið um rök fyrir þessu
oflofi á sig!
Allir hlutir eru afstæðir, sér-
staklega álit okkar á öðrum. Álitið
fer eftir viðmiðinu, því gildi eins
hlutar ákvarðast af öðrum sem
miðað er við. Viðmið mitt og okkar
hér við Söngskólann í Reykjavík,
virðist vera út frá sama hlut,
þannig að oflof er það ekki, heldur
ber okkur saman um það álit sem
við höfum á látnum félaga. Hann
var mikils metinn og er mærður
og syrgður af okkur öllum.
Tilvist Eiðs spannar næstum
mína, þó leiðir hafi ekki legið sam-
an fyrr en löngu seinna. Ég þekkti
til hans sem „söngvara í útlönd-
um“ löngu áður en ég kynntist
honum. Það er að segja sem
söngvara í útlöndum sem kom
heim á sumrin og söng dagskrár
inn í útvarpið, ásamt Ólafi Vigni.
Hjá Ríkisútvarpinu úir og grúir
af góðum upptökum frá þessum
tíma. Þar á meðal eru einstakar
upptökur, algjörir dýrgripir, af
ljóðaflokkunum „Svanasöngur“
(Schwanengesang) eftir Schubert
og „Ástum skáldsins“ (Dichter-
liebe) eftir Schumann, sungnum á
íslensku í þýð. Daníels Á. Daníels-
sonar.
Lífshlaup Eiðs var umfangs-
meira en sást í fljótu bragði. Hann
hóf söngnám sitt í Tónlistarskól-
anum í Reykjavík hjá Þorsteini
Hannessyni og síðan Sigurði De-
metz.
Árið 1966 fór hann til Kölnar í
Þýskalandi í frekara söngnám við
Konservatorium des Stadt Köln,
hjá Robert Blasins. Þá sótti hann
einnig kennslu til eins frægasta
söngvara allra tíma Helge Rosv-
ange í München. Í kjölfarið fékk
hann fastráðningar við óperurnar
í Düsseldorf og Linz en síðar við
óperuna í Aachen frá 1974 til 1987.
Á þessum árum kom hann oft
heim og söng með okkur í Þjóð-
leikhúsinu og Íslensku óperunni
hlutverk eins og Colline í Boheme,
Luther í Ævintýrum Hoffmanns,
Il Re í Aidu og bar ætíð með sér
áru hins fullkomna atvinnumanns
á sviði sem varð okkur, kollegum
hans í upphafi óperuævintýrisins,
ómetanlegur lærdómur.
Lánið knúði dyra hjá okkur í
Söngskólanum, því skömmu eftir
að þau hjónin Lucinda og Eiður
fluttu heim, hóf hann kennslu við
skólann og setti margan ungan
söngnemann í viðbragðsstöðu,
kenndi honum, miðlaði af reynslu
sinni og undirbjó til stærri hluta á
sviði sönglistar.
Við þökkum viðveru Eiðs og
söknum nú þegar samvista. Á
sama tíma ítrekum við skjól sem
við, samherjar og vinir Eiðs, vilj-
um vera Lucindu og Grími Inga,
og stendur endalaust.
Garðar Cortes, f.v. óperustjóri
Íslensku óperunnar, skóla-
stjóri Söngskólans í Reykjavík.
Kveðja frá Tónlistarskóla
Hafnarfjarðar
Er hnígur sól og kyrrist kvöld
og kveður góður dagur.
Þá taka værð og höfgi völd,
þá verður svefninn fagur.
Þannig skráir Eiður Ágúst í
gestabók 17. júní 1990, en ljóðið
má finna í fallegri ljóðabók sem
Eiður gaf út 2012 og heitir Í sól-
túni. Já, nú er sólin hnigin og góð-
ur dagur kvaddur og við tekur
svefninn fagri. Við lestur þessa
ljóðs leita á hugann margar minn-
ingar um góðan dreng.
Eiður Ágúst hóf störf við Tón-
listarskóla Hafnarfjarðar um 1988
þegar hann kom heim eftir nám og
störf í óperuhúsunum í Düssel-
dorf, Linz og síðan Aachen. Það
var mikill fengur fyrir skólann að
fá jafn vel menntaðan og reynslu-
ríkan söngvara, en umfram allt
frábæran kennara sem Eiður var.
Nemendur áttuðu sig fljótt að hér
var kominn kennari sem kunni til
verka, enda var hann fljótur að
staðsetja raddir og leiðbeina nem-
endum af mikilli nærfærni, um
leið og hann gerði til þeirra rétt-
látar kröfur.
Þó Eiður hafi við fyrstu kynni
virkað sem nokkuð alvörugefinn
maður var oft á kennarastofunni
stutt í hárbeitta og um leið góðlát-
lega kímni hjá honum sem kom af
þeim sökum oft skemmtilega á
óvart.
Starfsfólk Tónlistarskólans í
Hafnarfirði þakkar margar góðar
stundir með Eiði og sendir hlýjar
kveðjur til Lucindu og Gríms
Inga.
Gunnar Gunnarsson,
skólastjóri.
Við andlát okkar kæra vinar,
Eiðs Ágústs Gunnarssonar, horf-
um við til baka yfir fjörutíu ára
samleið og vináttu. Við vorum
ungir stúdentar og nýflutt til
Þýskalands þegar við kynntumst
þeim sæmdarhjónum Eiði og Luc-
indu sem þá bjuggu í Köln en
fluttu síðar til Aachen þar sem
segja má að við höfum bundist
fjölskylduböndum. Um nokkurn
tíma vorum við nánast einu Ís-
lendingarnir í þeirri fornfrægu
borg og það var nauðsynlegt að
hittast oft til að næra ættjarðar-
ástina og deila upplifunum. Eiður
söng við óperuhúsið í Aachen, en
við hin vorum við nám og störf í
háskólanum. Þegar heimsókn
kom frá Íslandi voru gestirnir
jafnan drifnir í kaffi og mat til
Eiðs og Lucindu og innvígðir í
þessa nýju fjölskyldu okkar.
Fastráðinn söngvari við óperu-
hús í Þýskalandi vinnur langan
vinnudag. Æfingar hvern virkan
dag og sýningar allt að fimm dög-
um í viku. Allar helgar. Aldrei frí-
dagur. Samt var eins og alltaf væri
frí og tími til að taka sér eitthvað
skemmtilegt fyrir hendur. Sam-
bandið og samheldnin rofnaði ekki
þótt við byggjum um tíma sitt í
hvoru landinu.
Eiður Ágúst var sérlega vand-
aður maður og elskulegur. Hann
var prúður og í raun hlédrægur,
en hafði ákveðnar skoðanir á
mönnum og málefnum og deildi
þeim óspart í þröngum hópi. Hann
kunni vel að gleðjast á góðri stund
og var rausnarlegur og örlátur
gestgjafi. Hann hafði gaman af að
yrkja og mætti jafnan í afmæli og
boð á stórhátíðum með tækifær-
isvísur eða heila ljóðabálka. En á
bak við þennan hógværa mann
leyndist mikill keppnismaður.
Hann var afburða skákmaður og
snjall bridgespilari. Á þeim vett-
vangi höfðum við ekkert í hann að
gera. En margur nætursvefn fór
fyrir lítið þegar við lögðumst í að
spila Scrabble á þýsku. Þá var
hart barist um stigin. Þegar hann
byrjaði að spila golf þá skaraði
hann líka fljótt fram úr á þeim
vettvangi.
En líf Eiðs Ágústs var fyrst og
fremst söngurinn og hann var
sannarlega fagmaður á sínu sviði.
Söngur í óperuhúsum, á tónleik-
um og við jarðarfarir. Og síðan
kennslan sem hann stundaði alla
tíð eftir að hann flutti heim og
lengi eftir að heilsan fór að bila.
Við erum heppin að eiga mjög
góðar upptökur þar sem hann
syngur ýmsar perlur söngbók-
menntanna, bæði það sem komið
hefur út á plötum og geisladisk-
um, en eins í safni á upptökum hjá
Ríkisútvarpinu. Við ferðalok
þökkum við vináttu og gleðistund-
ir og sendum Lucindu og Grími
Inga innilegar samúðarkveðjur.
Sigrún Valbergsdóttir og
Gísli Már Gíslason.
Með þessum orðum kveð ég og
fjölskylda mín góðan vin, Eið
Ágúst Gunnarsson. Eiði var margt
til lista lagt og var fjölhæfur mað-
ur. Hann var þjóðkunnur söngvari
og farsæll tónlistarkennari, en lít-
illátur og hæglátur maður sem
hafði þægilega nærveru, fjarska
rólegur, lét ekki fara mikið fyrir
sér. Eiður spilaði bridds og tefldi
skák, keppti í báðum greinum.
Einnig hafði hann mikla ánægju af
golfi. Margs er að minnast, þegar
þau Lucinda komu í heimsóknir til
okkar í Ameríku eða við til þeirra í
Þýskalandi. Stundum settist Eiður
við flygilinn og söng yndislega. Það
var nú gaman. Ég sá Eið síðast í
fyrrasumar og þá las hann upp úr
ljóðum sínum og var það yndisleg
kvöldstund.
Ég flyt kveðjur frá vinum
þeirra hjóna í Ameríku, Láru,
Önnu, Olav, Rangí og Leif.
Lucindu okkar og Grími Inga
sendum við innilegar samúðar-
kveðjur. Blessuð sé minning Eiðs
Ágústs Gunnarssonar.
Svava R. Eatough og fjöl-
skylda, Boca Raton, Florida.
Það settist í besta sófann minn
sólarljósið, þegar ég kom inn
það situr þar. Kyssir svo mína kinn
kveður, og sest upp á himininn.
Þar situr það, brosir svo blítt við öllum
börnum og dýrum, konum og körlum.
Ljúfa sólarljós.
(Eiður Ágúst Gunnarsson.)
Ég hef alltaf haldið sérstaklega
upp á þetta ljóð sem Eiður færði
okkur á einni af okkar góðu sam-
verustundum fyrir nokkrum árum.
Við hjónin vorum svo lánsöm að
kynnast þeim Lucindu og Eiði fyr-
ir nærri 20 árum þegar þau fóru að
stunda golfíþróttina af miklum
áhuga og dugnaði. Höfum við átt
margar ánægjustundir með þeim
víða, bæði innanlands og utan.
Það er ekki sjálfgefið að eignast
góða vini á efri árum, en svo sann-
anlega eignuðumst við slíka vin-
áttu hjá þeim hjónum sem hefur
verið okkur mikils virði. Þeirra
vinátta náði ekki bara til okkar
hjónanna heldur nutu börn okkar
og barnabörn elsku þeirra og um-
hyggju og hafa þau alltaf fylgst vel
með þeim.
Þeir félagarnir, Eiður og Birg-
ir, áttu sama afmælisdag og var
Eiður ári yngri. Þeir studdu hvor
annan í veikindabaráttunni sem
þeir háðu báðir, en tæp tvö ár eru
síðan Birgir lést. Vonandi eru þeir
komnir á góðan golfvöll og ganga
þar um, lausir við að þurfa að nota
golfbílana sína.
Við fjölskyldan kveðjum þenn-
an trausta og góða mann og þökk-
um fyrir alla vináttu og um-
hyggjusemi sem hann sýndi okkur
á sinn ljúfa hátt.
Elsku Lucinda og Grímur,
megi allar góðu minningarnar um-
vefja ykkur og styrkja.
Inga, Magnús, Sólveig,
Laufey og fjölskyldur.
Önnumst alla þætti útfararinnar
ÚTFARARSTOFA
KIRKJUGARÐANNA
Vesturhlíð 2 • Fossvogi • Sími 551 1266 • www.utfor.is
Þegar andlát ber að höndum
REYNSLA • UMHYGGJA • TRAUST
✝
Elskulegur eiginmaður minn, faðir okkar,
sonur, bróðir, tengdasonur og mágur,
ÓLAFUR E. RAFNSSON
lögmaður,
forseti ÍSÍ og forseti FIBA Europe,
Miðvangi 5,
Hafnarfirði,
varð bráðkvaddur í Sviss miðvikudaginn 19. júní.
Útför fer fram fimmtudaginn 4. júlí kl. 15.00 í Hallgrímskirkju.
Gerður Guðjónsdóttir,
Auður Íris, Sigurður Eðvarð og Sigrún Björg Ólafsbörn,
Rannveig E. Þóroddsdóttir, Rafn E. Sigurðsson,
Sigþór R. Rafnsson,
Elísabet Rafnsdóttir,
Auður Jörundsdóttir,
Sigurður Guðjónsson, Guðríður Guðfinnsdóttir,
Þjóðbjörg Guðjónsdóttir,
Ágústa Guðjónsdóttir, Gert Fisker Tomczyk.
✝
Elsku eiginmaður minn, faðir okkar,
tengdafaðir og afi,
BJARNI HJARTARSON,
lést að heimili sínu föstudaginn 14. júní.
Útförin hefur farið fram í kyrrþey að ósk hins
látna.
Anna Flosadóttir,
Flosi Bjarnason, Jody Linn Malanchuk,
Ólöf Halla Bjarnadóttir, Paulo Jorge Da Cruz Gramata,
Hjörtur Bjarnason,
Ævar Bjarnason, Amelia Rees,
Anna María, Bjarni, Elisabeth, Andrea, Davíð,
Adam og Alexander.
✝
Elskuleg móðir mín, tengdamóðir, amma og
langamma,
ÞÓRA STEINGRÍMSDÓTTIR,
Þangbakka 10,
lést laugardaginn 15. júní á Hrafnistu í
Reykjavík.
Jarðarförin fer fram í Breiðholtskirkju fimmtu-
daginn 27. júní kl. 15.00.
Ívar Þór Þórisson, Helga Björnsdóttir,
Þóra Ívarsdóttir, Ragnar Jóhann Holgeirsson,
Björn Gauti Ívarsson,
Ívar Máni Ragnarsson.
✝
Ástkær eiginkona mín, móðir, tengdamóðir
og amma,
RÓSAMUNDA BREIÐFJÖRÐ
GUNNARSDÓTTIR TAYLOR,
Herriman,
Utah,
lést fimmtudaginn 20. júní í Utah í Bandaríkjunum.
Útför hennar fer fram þriðjudaginn 25. júní í Utah.
Robert Lee Taylor,
Robert Lee Taylor jr, Sande Taylor,
Joshua Lee,
Cameron Ryan,
Kylie Ann,
Raef Michael.
✝
Innilegar þakkir til allra þeirra sem sýndu
okkur samúð og hlýhug við andlát og útför
elskulegs föður, bróður, mágs og frænda,
SKÚLA SKÚLASONAR
verkfræðings.
Sérstakar þakkir til þeirra sem önnuðust hann
af hlýhug og alúð á hjúkrunarheimilinu Eir,
deild 2. hæð norður.
Kristinn Pétur Skúlason,
Jón Gunnar Skúlason, Hildigunnur Ólafsdóttir,
Baldur Skúlason, Kristín Jónasdóttir,
Anna Skúladóttir, Brynjólfur Á. Mogensen,
Sigurgísli Skúlason, Kristín R. Úlfljótsdóttir,
Guðrún Skúladóttir, Magnús Eggertsson,
Arna Skúladóttir,
Hrefna M. Skúladóttir, Erik Fjelsted,
K. Freyja Skúladóttir
og frændsystkini.