Lögmannablaðið - 01.03.2008, Side 27

LÖGMANNABLAÐIÐ – 4 / 2007 > 27
Heimasíða LMFÍ
Árið 2007 heimsóttu mánaðarlega að jafnaði 18.000
manns heimasíðu LMFÍ en frá því árið 2005 hefur umferð
um heimasíðuna rúmlega tvöfaldast. Ástæður þessa eru
eflaust þær að mikil aukning hefur orðið á notkun
internetsins og fleiri nýta sér leitarvélar til að afla
upplýsinga. Í þessari framþróun hefur LÖGMANNA­
LISTINN á heimasíðu LMFÍ sannað gildi sitt og
auðveldað mörgum leit að lögmanni. Sömuleiðis hafa
margir lögmenn gert gangskör í því að opna heimasíðu
sem er síðan tengd við upplýsingar á heimasíðu LMFÍ.
Íslendingaslóðir í Kanada
Hafin er skipulagning á námsferð LMFÍ en að þessu
sinni hafa Íslendingaslóðir í Kanada orðið fyrir valinu.
Ferðin verður auglýst nánar síðar en reikna má með ca.
fimm dögum í ferðina um og eftir miðjan október.
Námskeið vorannar
Ellefu námskeið hafa verið auglýst á vorönn og þar af
hafa þrjú þegar verið haldin. Námskeið í flöggun og
yfirtökuskyldu og nýjum lögum um fyrningu kröfu­
réttinda gengu afar vel en eitt námskeið þurfti að fella
niður vegna þátttökuleysis. Það var námskeið í síma­ og
tölvusvörun sem ætlað var fyrir starfsfólk lögmanns stofa.
Önnur námskeið eru: Íslenskir lánasamningar, Gerð og
framkvæmd lögfræðilegra áreiðanleikakannana,
Varnarþingsreglur Lúganósamningsins, Viðurkenning
og fullnusta erlendra dóma, Skiptir máli að lögmenn
veiti afbragðsþjónustu? Samningatækni – vísindin og
listin að eiga árangursríkar samningarviðræður, Gerð
kaupmála og erfðaskráa og Nauðungarsala og aðfarar­
gerðir.
Andlitslyfting bókasafns
Bókasafnið hefur fengið andlitslyftingu svo um munar í
vetur. Búið er að stækka rýmið, setja upp kaffiaðstöðu,
snyrtingu og fleira. Þráðlaust net er einnig á bókasafninu
og komin frábær aðstaða til fræðistarfa.
Eyjafjallajökull – tilraun tvö
Félagsdeild hefur auglýst ferð upp á Eyjafjallajökul
laugardaginn 24. maí. Ætlunin var að ganga á jökulinn á
síðasta ári en vegna veðurs varð að aflýsa þeirri ferð. Nú
vonumst við eftir blíðu og útsýni yfir landið og miðin.
Íslenskir fjallaleiðsögumenn hafa tekið að sér að lóðsa
hópinn upp á jökulinn en um 20 manns hafa þegar skráð
sig í ferðina. Ef vel tekst til er draumurinn að stefna á
gönguferð á Grænlandi að ári.
Fréttir frá félagsdeild
Eyrún Ingadóttir