Skólavarðan - 01.06.2008, Blaðsíða 26

26
KENNARAR
Body percussion námskeið
28. -29. maí 2008
SKÓLAVARÐAN 4.TBL. 8. ÁRG. 2008
Forseti Íslands hr. Ólafur Ragnar Grímsson afhenti Íslensku mennta-
verðlaunin nýverið. Verðlaunin hlutu í flokki skóla Hvolsskóli á
Hvolsvelli, í flokki kennara Arnheiður Borg, í flokki ungra kennara
Halldór B. Ívarsson og í flokki námsefnishöfunda Pétur Hafþór
Jónsson. Þau Arnheiður og Pétur eru höfundar námsefnis sem hér
er sagt frá, nánar verður fjallað um hina verðlaunahafana síðar í
Skólavörðunni.
Arnheiður Borg kom við í KÍ um daginn og bræddi okkur með heillandi
brosi. Hún gerði sér ferð í Kennarahúsið til að gefa okkur fyrsta
kverið í flokki léttlesinna lífsleiknibóka sem hún er að endurútgefa
um þessar mundir og við komumst á snoðir um. Nokkrum dögum
síðar gerði hún sér svo lítið fyrir og hreppti menntaverðlaunin!
Bækurnar sem Arnheiður er að endurútgefa fjalla um mannleg
samskipti og gefa tilefni til umræðna um marga góða hluti, svo
sem mikilvægi þess að vera jákvæður og tillitssamur. Fyrsta bókin
heitir Rut fer í nýjan skóla. Sjá nánar á heimasíðu Arnheiðar home.
gardabaer.is/arnheidur
Í umsögn dómnefndar Íslensku menntaverðlaunanna segir meðal
annars um Arnheiði:
„Smitandi áhugi hennar á hverju því verki sem hún tekur að sér
hrífur með sér nemendur og samstarfsfólk, skilar árangri sem oftar
en ekki fer langt fram úr væntingum. Arnheiður leggur áherslu á að
kennarinn hafi hlutverk sem bæði fræðari og uppalandi: að búa börn
undir lífið, kenna þeim heilbrigð samskipti og fræða þau um muninn
á réttu og röngu; styrkja þannig sjálfsmynd þeirra og félagsþroska.
Hún var brautryðjandi í lífsleiknikennslu og samdi með öðrum
kennurum námsefni sem nefndist Átak að bættum samskiptum löngu
áður en lífsleikni var skilgreind sem sérstök námsgrein. Síðar
samdi hún og gaf út bækur þar sem lífsleikni og lífsgildi eru sett
fram í búningi ævintýra og sagna. Sem sérkennari hefur Arnheiður
lagt sig sérstaklega eftir lestrarkennslu og samið kennsluforrit fyrir
byrjendur í lestri sem sameinar kennslu í lestri og tölvunotkun.
Einnig hefur hún samið léttlestrarefni, vinnubækur og verkefni
til að efla mál- og hljóðvitund. Arnheiður er eldhugi í kennslu og
jákvæðu og uppbyggjandi skólastarfi. Hún lætur engar nýjungar
fram hjá sér fara. Þegar hún finnur ekki efni sem henni líkar skapar
hún það sjálf og fær samstarfsmenn sína í lið með sér.
Pétur Hafþór Jónsson er í sérstöku uppáhaldi hjá blaðamanni enda
kennir hann yngsta afkvæminu og því gefast mörg tækifæri til að
upplifa hversu frábær kennari hann er. Í frétt á vef menntasviðs
Reykjavíkurborgar segist Pétur þakklátur fyrir verðlaunin og afar
stoltur af nemendum sínum sem tróðu upp á verðlaunahátíðinni.
“Það er alltaf gaman að vinna með hæfileikaríkum krökkum og
þeir virka sem vítamínsprauta á mig alla daga. Það námsefni sem
ég hef samið hef ég prufukennt jafnóðum á krökkunum og fengið
staðfestingu á að það kemur að góðu gagni. Næsta skref er að
miðla þeirri þekkingu til annarra kennara.”
Í umsögn dómnefndar Íslensku menntaverðlaunanna segir meðal
annars um Pétur og námsgögnin hans: „Pétur Hafþór Jónsson
hefur áratuga reynslu af útgáfu á kennsluefni í tónmennt fyrir
grunnskóla: kennslubókum, kennsluleiðbeiningum, vinnubókum
og hlustunarefni. Hann brautskráðist frá Tónlistarskólanum
í Reykjavík sem tónmenntakennari árið 1977 og lauk prófi í
tónvísindum frá háskólanum í Álaborg árið 1996. Pétur Hafþór
hefur verið kennari í Austurbæjarskóla frá 1976, að undanskildum
þeim þremur árum sem hann var við framhaldsnám í Álaborg.
Hann hefur á starfsferli sínum byggt upp og stjórnað kór skólans
sem víða hefur komið fram ... Bók hans Hljóðspor ... er að mati
dómnefndar framsækið og nýstárlegt námsefni. Í námsefninu er
gerð grein fyrir þróun dægurtónlistar á 20. öld og tengslum hennar
við tónlistarmenningu ungs fólks. Þetta er gert á afar aðgengilegan
hátt með lýsingum og tónlistardæmum af ýmsu tagi. Dregin
er upp mynd af því hve sterkt afl tónlist er í uppeldi barna og
unglinga og áhrifamikið til sköpunar og samkenndar í samfélagi
nútímans ... Áhersla er lögð á að í tónmennt geti nemendur sett
sig í spor annarra, skilið og deilt hugmyndum, tilfinningum og
reynslu með öðrum ... Námsefnið er vandað að allri gerð. Ásamt
markvissri fræðslu um tónmenntir getur það stuðlað að aukinni
samkennd meðal barna og unglinga í íslensku samfélagi sem
verður fjölmenningarlegra með ári hverju. Undirrituð hefur flett
Hljóðsporum á bókasafninu og getur tekið undir með dómnenfd
að þetta námsefni er meiriháttar. Námsgagnastofnun gefur út, sjá
nánar á nams.is
keg
Arnheiður og Pétur Hafþór eru í hópi handhafa Íslensku menntaverðlaunanna
Arnheiður Borg
Pétur Hafþór Jónsson