Skólavarðan - 01.01.2003, Blaðsíða 26

Kjaramál , frétt
28
Aðilar kjarasamninga ríkisins hafa ákveðið að efna til
sameiginlegrar fræðslu fyrir trúnaðarmenn, sam-
starfsnefndir og forstöðumenn í framhaldsskólum til
þess að efla samstarf starfsmanna og stjórnenda og
stuðla að faglegri gerð og virkri framkvæmd stofn-
anasamninga. Þetta er gert í samræmi við bókanir
með síðustu kjarasamningum.
Vinnuhópur er skipaður fulltrúum BHM, BSRB, Félags for-
stöðumanna í ríkisstofnunum og fjármálaráðuneytisins, og fyrir
hönd KÍ þeim Elnu Katrínu Jónsdóttur formanni Félags fram-
haldsskólakennara og varaformanni KÍ og Ingibjörgu Guð-
mundsdóttur skólameistara. Hópurinn hefur skipulagt námskeið
í fjórum hálfsdags lotum sem saman mynda eina heild. Boðið
verður upp á fyrri tvær loturnar frá febrúar til október 2003.
Seinni tvær verða í boði frá september 2003 til maí 2004. Fyrsta
lotan hefst 11. febrúar nk. Hvert námskeið verður haldið sjö
sinnum, fimm sinnum í Reykjavík og einu sinni á Akureyri og á
Egilsstöðum. Gert er ráð fyrir að sömu einstaklingar sæki allar
fjórar loturnar, en námsvísir og tímasetningar auk annarra upp-
lýsingar hafa verið sendar út til þeirra er málið varðar.
Í fyrstu lotunni verður fjallað um stjórnun starfsmannamála.
Í annarri lotunni er umfjöllunarefnið launastjórnun, samstarfs-
nefndir og stjórnun breytinga. Yfirskrift þriðju lotunnar er sam-
starf og samvinna og í síðustu lotunni verður athyglinni beint
að matskerfum og hvatningu.
Öll námskeiðin í Reykjavík verða haldin á Grand Hóteli. Á Eg-
ilsstöðum verða námskeiðin haldin á Fosshóteli Valaskjálf en
ekki hefur endanlega verið ákveðið hvar kennslan fer fram á
Akureyri.
Leiðbeinendur eru Gylfi Dalmann Aðalsteinsson, lektor á
sviði stjórnunar við Viðskipta- og hagfræðideild H.Í., Svali H.
Björgvinsson, forstöðumaður starfsþróunarsviðs IBM Business
Consulting Services, Kristín Jónsdóttir, forstöðumaður Endur-
menntunar Háskóla Íslands og Rannveig Einarsdóttir, deildar-
stjóri MFA, fræðsludeildar ASÍ.
Þeir sem enn hafa ekki skráð sig geta haft samband við End-
urmenntun Háskóla Íslands í síma 525-4444 eða með tölvu-
pósti á endurmenntun@hi.is
Framhaldsskóli
Samstarf og samningar
Ráðstefna - sýning - verð laun
Skóli á nýrri öld
Markmið ráðstefnununnar er að vekja athygli á því sem vel er gert á
sviði nýbreytni í skólastarfi, miðla upplýsingum til skóla og vera skólum
hvatning til dáða. Efni hennar er í stuttu máli kennsluhættir á 21. öld, ein-
staklingsmiðað nám og samvinna nemenda þar sem beitt er fjölþrepa
kennsluskipulagi. Fjallað verður um þessi viðfangsefni bæði frá sjónarhóli
fræðanna og framkvæmdar í skólunum.
Fyrirlesarar koma frá grunnskólum, háskólasamfélaginu og kanadískur
sérfræðingur í kennsluráðgjöf, Maxine Giberson, fjallar um einstaklings-
miðað nám og fjölþrepa kennslu. Aðgangur að ráðstefnunni er ókeypis, en
hún stendur yfir frá kl. 14:00 til 17:30. Ráðstefnustjóri er Ólafur H. Jó-
hannsson lektor í stjórnsýslufræði við Kennaraháskóla Íslands.
Hvatningarverðlaunin verða veitt sex grunnskólum í Reykjavík fyrir
framúrskarandi nýbreytni- og þróunarverkefni.
Á heimasíðu Fræðslumiðstöðvar Reykjavíkur, www.grunnskolar.is, eru
upplýsingar um ráðstefnuna, sýninguna og verðlaunin. Þar er einnig að
finna skráningareyðublöð.
Fimmtudaginn 13. febrúar verður haldin ráðstefna um ný-
breytni í kennsluháttum grunnskóla á Grand hótel í Reykjavík
undir yfirskriftinni Skóli á nýrri öld. Ráðstefnan er samstarfs-
verkefni Fræðslumiðstöðvar Reykjavíkur, Kennarafélags
Reykjavíkur og Skólastjórafélags Reykjavíkur og er ætluð
kennurum, stjórnendum og starfsmönnum skóla. Jafnframt
verður efnt til sýningar um nýbreytni í skólastarfi í Tjarnarsal
Ráðhúss Reykjavíkur dagana 15. og 16. febrúar og hvatningar-
verðlaun verða veitt í Ráðhúsinu sunnudaginn 16. febrúar kl.
15:00.