Skólavarðan - 01.09.2012, Blaðsíða 17

17
Skólavarðan 1. tbl. 2012
þær. Á heimasíðu Hagaskóla má finna niðurstöður mælinga á stöðu
eineltis í skólanum. Þar kemur fram að mælingar hafa staðið yfir frá
árinu 2005 og sýna þær nokkra sveiflu í eineltismálum. Árin 2005-6
mælast hæst með 5.8% nemenda sem orðið hafa fyrir einelti 2-3svar
í mánuði eða oftar. Talan fyrir árið 2011 er 1,6% og hefur því orðið
mikil breyting til batnaðar og greinileg vitundarvakning sem sýnir
að vinna undanfarinna ára hefur skilað sér. Sesselja Ingibjörg leggur
áherslu á að ekki megi horfa fram hjá því að þrátt fyrir góðan árangur
mælist einelti. „Draumurinn er að útiloka einelti og það hefur sýnt
sig að það er hægt því að í ákveðnum hópum innan skólans árið 2011
mæltist ekkert einelti.“
Ábyrgð skólastjóra
Skólastjóri ber ábyrgð á skólastarfi. En ábyrgð er hægt að axla á ólíkan
hátt. „Ég hef kosið að gera það með samvinnu og með því að hafa
foreldrana með okkur. Eineltismál sem upp koma í skóla leysast oftast
ekki nema að foreldrar komi að því. Samvinna með hagsmuni barnanna
að leiðarljósi er það sem reynist best,“ segir hún. „Öllum börnum á að
líða vel í skóla og þar eiga þau að þroskast og dafna.“
„Ég geri ráð fyrir að í öllum skólum sé unnið gegn einelti þó með
mismunandi sniði sé og bera þessar áætlanir mismunandi heiti,“
bætir hún við. „Hjá okkur er það þannig að í skólabyrjun er hnykkt á
þessum málum með kennurum og starfsfólki og verkefnastjórar kynna
verkefnið sérstaklega fyrir nýjum starfsmönnum. Unnið er jafnt og þétt
að fræðslu starfsfólks meðal annars með reglulegum umræðufundum.
Í Olweusar áætluninni felst bæði forvarnarstarf og viðbragðsáætlun,“
útskýrir hún.
„Ábyrgð skólastjórans er líka að tvinna vinnu gegn einelti inn í
daglegt skólastarf. Það er gert í Hagaskóla með bekkjarfundum sem
umsjónarkennarar stýra. Á þeim er til að mynda rætt við börnin um
hvernig ákjósanlegur skólabragur eigi að vera og mikilvægi þess
að öllum líði vel. Það á að vera skemmtilegt í skólanum og lögð er
áhersla á mikilvægi þess að hver og einn geti verið eins og hann er.
Verkefnastjórar um eineltismál sjá um að aðstoða umsjónarkennara
með bekkjarfundina í upphafi skólaárs og eftir þörfum í framhaldinu,“
segir hún og bætir svo við: „Stjórnendateymi skólans hittist líka
vikulega og þá er farið yfir málefni skólans“.
Rík áhersla er lögð á eftirlitskerfið þegar unnið er samkvæmt
Olweusar áætluninni. Brýnt er fyrir kennurum og starfsfólki að hafa
augun opin. „Aðallega er fylgst með framkomu og hegðun. Alltaf
reynist best að taka á slíkum málum strax og leggjum við okkur
fram um að gera það samdægurs“ segir Ingibjörg. „Í stórum skóla
(440 nemendur) má búast við miklum fjölbreytileika og þar er pláss
fyrir ólíka einstaklinga. Ég vona að íslenskt samfélag sé að verða
umburðarlyndara og fólk taki meira tillit hvert til annars“ segir hún og
brosir.
Þegar Ingibjörg er spurð um skilaboð til skólastjóra svarar hún „Mín
nálgun er myndugleiki, ákveðinn rammi og jafnframt mikil hlýja. Í
mínum huga er það lykillinn að árangri. Ég hef brugðið á það ráð að
segja bara á einfaldan hátt að ég sem skólastjóri vilji ekki einelti og það
nær bara býsna langt“.
Ljósmynd: Tryggvi Már Gunnarsson
sKoÐun
Þegar Ingibjörg ávarpar
væntanlega 8. bekkjar
nemendur á vorin þá hikar
hún ekki við að segja að
hún sé afskiptasöm.