Morgunblaðið - Sunnudagur - 08.07.2018, Blaðsíða 4

4 MORGUNBLAÐIÐ SUNNUDAGUR 8.7. 2018
Förum í bíltúr og finnum golfvöll!
Helgi Þorvaldsson starfaði íáratugi í knattspyrnuhreyf-ingunni, einkum fyrir Þrótt
í Reykjavík, en sat að auki árum
saman í stjórn knattspyrnu-
sambandsins. Hann gaf sér þess
vegna ekki tíma til að stunda golf-
íþróttina en hófst handa við það um
fimmtugt. Fékk þá golfsett í afmæl-
isgjöf, fór rólega af stað og segist
ekki spila mjög oft en hefur þó náð að
leika á hverjum einasta golfvelli
landsins.
„Ég eignaðist fyrsta golfsettið
haustið 1996, á afmæli í október svo
ég spilaði ekkert það ár og man satt
að segja ekki hvort ég spilaði eitt-
hvað árið eftir,“ segir Helgi við
Sunnudagsblað Morgunblaðsins.
Að því kom svo að hann fór með
kylfurnar út á völl. „Ég var orðinn
það aumur í öxlum og hnjám þegar
ég byrjaði í golfinu að ég vissi að ég
gæti aldrei lækkað forgjöfina mjög
mikið, þannig að ég setti mér annað
markmið; að safna völlum. Við hjónin
höfum alltaf ferðast mikið um landið
þannig að þetta hentaði vel.“
Þegar Helgi leggur saman kemur í
ljós að hann hefur spilað á 72 völlum.
Sumir eru ekki í notkun lengur og
hann telur ekki með par 3-velli, t.d.
Ljúfling Golfklúbbsins Odds í Garða-
bæ, þar sem hann byrjar alltaf á vor-
in, eða Setbergsvöll í Hafnarfirði,
þar sem golfferillinn hófst.
Læt golfið ekki heltaka mig
Helgi starfaði lengi sem lagermaður
hjá Icelandair í Keflavík og segir að
vegna axlarmeiðsla hafi hann átt erf-
itt með að „vinna upp fyrir sig“. Ég
var í erfiðleikum síðustu árin í
vinnunni með að setja hluti upp í efri
hillur, jafnvel bara létta hluti, vegna
þess að ég reif sin í öxlinni. Búið er
að gera tvisvar eða þrisvar við hægri
öxlina og ekki hægt að gera meira.
Svo er búið að skipta um lið í báðum
hnjám,“ segir Helgi. „Ég á ekki í
neinum vandræðum með að vinna
niður fyrir mig, en meiðslin verða
líka til þess að ég get ekki slegið
mjög langt í golfinu, lengst um það
bil 120 metra, en ég slæ nokkuð beint
og gengur vel að halda mér á braut.“
Helgi tekur sem dæmi að vegna
þess hve slæmur hann er í öxlunum
geti hann ekki hengt út þvott en eigi
hins vegar auðvelt með að spila golf
og keilu.
Síðan Helgi hóf að spila golf hefur
nokkrum völlum verið lokað og hann
sér eftir sumum, til dæmis vellinum í
Hvammsvík í Hvalfirði sem hentaði
honum vel.
Helgi segir golfið strax hafa heill-
að en ástæða þess hve seint hann
byrjaði var hve mikill tími fór í vinnu
í knattspyrnuhreyfingunni. „Ég gaf
mér því ekki tíma í golfið og hef
reyndar passað að láta það ekki hel-
taka mig; læt það til dæmis vera að
spila ef það er rigningardrulla. En
útiveran er meiriháttar og gott að
ganga; ég er hrifinn af níu holu völl-
um, það hentar ágætlega að ganga
þá en þegar ég spila 18 holu völl þarf
ég yfirleitt bíl.“
Hann lokaði „golfhringnum“ um
síðustu helgi sem fyrr segir.
„Ég taldi mig vera búinn að ná
markmiðinu í fyrra eftir að ég spilaði
gamla völlinn á Siglufirði, niðri við
fótboltavöllinn, en notaði svo tæki-
færið þegar ég var á fjölskyldumóti
fyrir norðan um síðustu helgi að spila
nýja völlinn, sem er við leiðina upp í
Siglufjarðarskarð, og varð mjög hrif-
inn. Það er rosalega fallegur völlur
og skemmtilegt að spila hann.“
Í bíltúr – austur í Vík!
„Þegar ég var langt kominn með að
ná öllum völlum landsins var ég
ákveðinn í að spila bara á þeim völl-
um sem ég átti eftir. Konan gerir oft
grín að því að við skulum fara í bíltúr
til þess að spila einhvers staðar golf;
einhvern tíma á sunnudegi stakk ég
til dæmis upp á því að við skyldum
fara í bíltúr, og enduðum austur í Vík
í Mýrdal! Ég var búinn að kíkja í
skrána og næsti völlur í þá átt var í
Vík …“
Eiginkona Helga er Aileen Þor-
valdsson, frá því mikla golflandi
Skotlandi. „Eini erlendi völlurinn
sem ég hef spilað er í Glasgow. Ég
hef ekki látið draga mig í golfferðir
til útlanda, vegna þess að ég er ekki
mikið fyrir hita. Við ferðumst hins
vegar mikið innanlands, gistum í
íbúðum verkalýðsfélaga og spilum
golf. Konan er komin með 33 golf-
velli, ég geri ekki ráð fyrir að ég nái
að spila alla velli landsins aftur, en
þótt ég fylgist reyndar vel með því
hvort einhvers staðar er opnaður nýr
golfvöllur er helsta verkefnið á næst-
unni að fjölga þeim völlum sem kon-
an spilar.“
Helgi segir marga íslensku golf-
vellina mjög skemmtilega, „en það er
svo skrýtið að þeir eftirminnilegustu
eru vellir þar sem ég hef varla komist
inn í skála eftir að hafa spilað, því
þeir voru svo erfiðir!“
Nefnir völlinn í Ásatúni við Flúðir,
sem hefur reyndar verið lokað. „Þar
voru svakalegar brekkur og í eina
skiptið sem ég náði að spila völlinn
var svo heitt og brekkan upp að skál-
anum erfið að fólk hélt ég væri að
deyja þegar ég kom þangað!“
Hann hreifst líka af nýja vellinum
á Siglufirði sem fyrr segir. „Hann er
ekki orðinn alveg nógu gróinn en
verður svakalega fallegur. Völlurinn
í Neskaupstað er sléttur og fínn og
hentar mér vel, eins og í Sandgerði.
Svo verð ég að nefna völlinn á Skaga-
strönd því umhirðan þar er stórkost-
leg; ekki síðri en á stóru völlunum
fyrir sunnan þar sem er fjöldi starfs-
manna og fullt af vélum. Völlurinn á
Skagaströnd er til mikillar fyrir-
myndar.“
Helgi Þorvaldsson á golfvelinum á Siglufirði þegar hann lokaði hringnum. „Það er rosalega fallegur völlur og skemmtilegt að spila hann,“ segir Helgi.
Ljósmynd/Ingvar Erlingsson
Helgi Þorvaldsson fékk golfsett í afmælisgjöf fimmtugur, fyrir rösklega tveimur áratugum. Vegna eymsla í hnjám og öxlum vissi
Helgi að hann gæti aldrei lækkað forgjöfina verulega og setti sér þess í stað það göfuga markmið að spila á öllum golfvöllum
landsins. Takmarkinu náði hann í fyrrahaust og aftur um síðustu helgi þegar hann lék á nýjum glæsilegum golfvelli Siglfirðinga.
Helgi Þorvaldsson eftir lokapúttið á síðustu flöt á Siglufirði um síðustu helgi.
Helgi og félagar hans í Þrótti
vinna nú að því að koma á fót
nýrri íþróttagrein hér á landi:
göngufótbolta.
„Þetta er þrælskemmtileg
íþrótt. Fyrsti leikurinn á Íslandi
fór fram í fyrra á fjölskyldumóti
á Húnavöllum, þar sem við af
suðvesturhorninu unnum Akur-
eyringa,“ segir hann. „Þetta
hentar fólki á öllum aldri, í þess-
um fyrsta leik var til dæmis
yngsti leikmaðurinn 10 ára
stelpa og sá elsti, Haukur bróð-
ir minn, 75 ára.“
Helgi segir sparkvelli KSÍ
henta mjög vel, í hverju liði geti
í raun verið eins margir og fólk
kýs, en mælt sé með fjórum til
átta. „Það má til dæmis ekki
fara inn í teig hjá mótherjanum
og ekki tækla. Þetta er ekki síst
hugsað fyrir eldra fólk og bækl-
aða en allir geta verið með.“
Helgi og félagar vilja
koma á göngufótbolta
’
Geri ekki ráð fyrir að ég nái að spila alla velli landsins aftur
en þótt ég fylgist reyndar vel með því hvort einhvers staðar er
opnaður nýr golfvöllur, er helsta verkefnið á næstunni að fjölga
þeim völlum sem konan spilar.
Helgi Þorvaldsson sem spilað hefur á öllum golfvöllum landsins.
INNLENT
SKAPTI HALLGRÍMSSON
skapti@mbl.is