Litli Bergþór - 01.12.2015, Blaðsíða 20

20 Litli-Bergþór
Gerður Dýrfjörð:
Að skemmta sér, hitta aðra unglinga,
hlæja, vera í góðum hópi án þess að
hafa sérstaklega skilgreint markmið,
er mikilvægur hluti af lífinu. Við
höfum öll þörf fyrir að tilheyra
hópi og vera með jafningjum. Það
er sérlega mikilvægt að skapa
aðstöðu fyrir unglinga til að vera
saman í öruggu umhverfi og í
umsjá fullorðinna því rannsóknir
hafa nefnilega sýnt að þátttaka í
skipulögðu frístundastarfi sem er
í umsjón fagfólks, hefur mikið
forvarnargildi.
Hvað er að gerast
í félagsmiðstöðinni?
Sameiginleg félagsmiðstöð er rekin fyrir unglinga í
Bláskógabyggð og Grímsnes- og Grafningshreppi.
Þar er opið einu sinni í viku, ýmist á Borg,
Laugarvatni eða Reykholti, auk þess sem farið
er á sameiginlega viðburði SAMFÉS (Samtök
félagsmiðstöðva á Íslandi) og svo verða aðrir
unglingar í sveitum Suðurlands vonandi heimsóttir í
ár líkt og í fyrra.
Félagsmiðstöðvaráð var kosið á dögunum en
hlutverk fulltrúa þess er að virkja aðra unglinga til
að taka þátt í starfinu, að leita eftir hugmyndum
frá öðrum unglingum og að skipuleggja og halda
utan um viðburði í félagsmiðstöðinni í vetur.
Framboðsfundur var haldinn
á Laugarvatni á dögunum
og var tilefnið nýtt til
að leiðbeina um almenn
fundarsköp. Þeir unglingar
sem buðu sig fram stigu í
pontu og kynntu sig, var síðan
gengið til kosninga. Fulltrúar
í Félagsmiðstöðvaráði
eru Anthony Karl Flores,
Daníel Máni Óskarsson,
Glódís Pálmadóttir, Harpa
Rós Jónsdóttir, Samúel
Guðmundsson og Sigríður K.
Halldórsdóttir.
Hitað upp fyrir framboðsfund.
Skipaðir voru 2 fundastjórar og 2
ritarar fundarins.
Fundarmenn hlýða á kynningu félaga sinna.