Litli Bergþór - 01.12.2015, Blaðsíða 34

34 Litli-Bergþór
Hann Þorsteinn litli var tveggja ára þegar við Bragi fórum með þeim Kristrúnu og Bjössa til Nýja Sjálands
í 6 vikna ferðalag árið 2004 til að heimsækja fósturforeldra Bjössa, sem búa skammt frá Auckland á norður
eyjunni. Bjössi hafði verið skiptinemi þar. Þetta var ógleymanleg ferð, hjónin fóru með okkur í húsbíl í eina
viku um alla suður eyjuna, og við ferðuðumst líka með þeim um norður eyjuna. Þau vildu allt fyrir okkur gera.
Þetta var ómetanlegur tími sem við áttum saman þar og dýrmætar minningar.
L-B: Þú tókst mikinn þátt í félagsmálum sveitarinnar.
Halla: Jú, ég var bara ný komin, þegar Ágústa kallaði á mig, hún var að fara á Kvenfélagsfund á Brautarhóli
og sagði mér að koma með. Á fundinum var ég svo lesin upp sem nýr félagi, - ég var aldrei spurð! - En
Kvenfélagið var góður vettvangur til að kynnast konunum í sveitinni. Það var geysileg vinna í kringum
byggingu Aratungu, mikið um fundakaffi og veitingar. Leikritið bjargaði mér svo alveg annan veturinn. Við
settum upp Lénharð fógeta undir leikstjórn Eyvindar Erlendssonar og það voru stífar æfingar sem byrjuðu ekki
fyrr en eftir mjaltir. En Ágústa og Þorsteinn höfðu skilning á því að þetta var mér mikils virði. Ég hafði alltaf
verið með í leikritum fyrir sunnan og langaði í leiklistarskólann, en þorði ekki. En þetta var ósköp gaman og
gaman að kynnast fólkinu. Rafmagnið var þá komið í Reykholt, en þegar við Bragi komum heim af æfingum
kveiktum við á olíulampanum.
Ég var með í mörgum uppfærslum eftir þetta og oft gaman. Var um tíma í leiknefnd með Sveini Sæland og þá
settum við upp tvö metnaðarfull leikrit, „Gísl“ og síðan „Íslandsklukkuna“, sem Sunna Borg leikstýrði. Það var
síðasta leikritið sem ég lék í, ætli það hafi ekki verið 1976. Sú uppfærsla tókst mjög vel.
Sr. Guðmundur var um tíma með kvöldvökur í Skálholtskirkju, þar sem við lásum upp úr ýmsum verkum.
Eftirminnilegast er þegar við leiklásum bút úr Skálholti eftir Guðmund Kamban, þar sem ég leiklas Ragnheiði.
Fjölskyldumynd tekin í 50 ára brúðkaupsafmæli þeirra Höllu og Braga árið 2009. Efri röð: Sigurður, Inga Birna, Bragi Steinn, Eymundur, Ragnheiður,
Björn, Kristrún og Katrín. Sitjandi: Bragi og Halla og fyrir framan þau Þorsteinn og Halla. Á málverkinu fyrir aftan t.h. má sjá Þorstein heitinn
Bragason.