Litli Bergþór - 01.12.2015, Blaðsíða 35

Litli-Bergþór þakkar
stuðningsmönnum sínum og lesendum
öllum fyrir samfylgdina á liðnu ári og
óskar þeim gleðilegra jóla og farsældar
á komandi ári.
Litli-Bergþór 35
Það var magnað að taka þátt í því. Gamli biskupinn, sr. Sigurbjörn Einarsson, kom alltaf austur til að vera á
þessum kvöldvökum.
Ég minnist margra góðra leikara hér úr sveitinni, t.d. Sigga á Heiði, Halla í Einholti, Jónu á Lindabrekku og
Fríði í Laugagerði og fleiri. Og svo minnist ég sérstaklega hans Linda í Dalsmynni, við vorum góðir vinir.
Kynntumst fyrst í Lénharði fógeta og unnum seinna saman í sláturhúsinu. Sérstaklega er mér minnisstætt að á
einni æfingu var maður nokkur að lýsa öllum gjöfunum og bústofninum, sem einhver hafði fengið þegar hann
byrjaði að búa. Ég missti þá út úr mér að við Bragi hefðum nú ekki fengið svoleiðis gjafir! Þá stillti Lindi sér
upp fyrir framan mig, með annan fótinn svona út til hliðar eins og hann gerði oft, lagði hönd á öxl mér, horfði í
augun á mér og sagði:
„Fólki fannst ekki
taka því, það héldu
allir að þið mynduð
stoppa svo stutt“. Það
eru nú orðin 55 ár!
Ég tók þátt í fyrstu
listakosningunum
hér í Tungunum, ætli
það hafi ekki verið
1986, og lenti þá inn
í hreppsnefnd í fjögur
ár fyrir H-listann. Það
átti ekki við mig og
ég gaf ekki kost á mér
aftur.
Þegar ég lít yfir farinn veg þá höfum við átt góða ævi hér á Vatnsleysu, þó sorgin hafi knúið óvægilega dyra.
Maður jafnar sig sjálfsagt aldrei á þeirri lífsreynslu, en reynir að lifa með henni.
Okkur þykir öllum óskaplega vænt um jörðina okkar og ætlum að halda henni svona eins og hún er, og ég held
hún hafi aldrei verið fallegri en nú. Svo finnst mér alltaf punkturinn yfir i-ið hafa verið þegar við fengum mann
til að hlaða upp Skrögg, vörðuna sem stendur uppi á brúninni hér ofan við bæinn og vísaði mönnum áður á
þingstaðinn. Ég er ákaflega stolt af því. Ragnheiður og hennar fjölskylda eiga sumarbústað þar uppi, sem þau
kalla Skrögg og eru þar mikið.
Að lokum vil ég sérstaklega nefna sambýlið hér á Vatnsleysutorfunni allri, sem alltaf hefur verið einstakt og
aldrei borið skugga á, sama hver í hlut á. Ef á að nefna einhverja sérstaklega, þá hafa þau Sirrý og Gummi og
börnin þeirra í vesturbænum öll verið okkur einstaklega góð og okkur þykir ákaflega vænt um þau. Guðmundur
og Rúnar nytja hluta af túnunum okkar sem er góð ráðstöfun.
Það er orðið áliðið dags og kominn tími til að kveðja þau Braga og Höllu, með kæru þakklæti fyrir móttökurnar
og spjallið.
Inga Birna, Kristrún, Halla og Ragnheiður dást að brúðarkjól Höllu.