Morgunblaðið - Sunnudagur - 04.08.2019, Blaðsíða 13

Sigurður fékk nýlega inngöngu í Kon-
unglegu listaakademíuna í Haag í Hollandi,
en af rúmlega 600 manns sem sóttu um var
Sigurður einn þeirra 50 sem fengu skólavist.
„Þetta er ágætis viðurkenning á því sem
ég er að gera,“ segir Sigurður. „Þetta er
spennandi verkefni að takast á við, en fyrst
og fremst er þetta einstakt tækifæri, að
komast inn í svona skóla og fá að kynnast
skapandi og hæfileikaríku fólki og mynda
tengsl við það. Þetta verður kannski mín
brú yfir á meginlandið. Ég er mjög spenntur
að fá að móta mig og mínar hugmyndir í
skapandi umhverfi á næstu árum.“
Sigurður er ekki alls óvanur listnámi, en
þegar kom að því að velja menntaskóla
ákvað hann að hefja nám á listnámsbraut við
Fjölbrautaskólann í Breiðholti. „Það var eig-
inlega það eina sem kom til greina,“ segir
Sigurður. „Ég þurfti að segja skilið við vini
mína, sem fóru flestir í MR, og fór alla leið
upp í Breiðholt. Það var eflaust fyrsti vís-
irinn að því að sækja mér menntun í mynd-
list.“
Sjálfskipaður sendiherra
Sigurður segir list sína hingað til hafa ein-
kennst af tilraunamennsku. „Þá erum við að
tala um tilraunir með efni, stíl og viðfang,“
segir Sigurður. „Þetta eru oft pælingar um
samhengi í verkum mínum, ég hef skeytt
saman mönnum og hundum til að fá eitthvað
nýtt og í nýju seríunni má sjá konur Picass-
os mættar til Reykjavíkur í alveg nýju sam-
hengi,“ útskýrir hann. „Þetta eru oft miklar
tilraunir. En nú verða kaflaskil þegar ég fer
út í nám. Þá verður maður að vera opinn
fyrir öllu.“
Þrátt fyrir ungan aldur hefur Sigurði tek-
ist að hasla sér völl í myndlistarheiminum,
sýningar hans telja nú á þriðja tug og held-
ur hann sér alfarið uppi með listaverkasölu.
„Ég hef verið mjög heppinn að verkum
mínum hefur almennt verið tekið afskaplega
vel,“ segir Sigurður, en frá 2015 hefur hann
tekið reglulega á móti gestum í vinnurými
sínu sem ýmist vilja skoða listaverkasafn
hans eða kaupa af honum verk. „Það eru
ákveðin forréttindi að geta lifað á listinni og
það er alls ekki sjálfgefið að hafa tekjur af
þessu sem halda mér uppi.“
Árið 2016 stofnaði Sigurður Sævar fyrir-
tækið Listamaður ehf. sem heldur utan um
sölu á verkum hans.
„Ég er auðvitað ungur og ég hef ekki
neinn gallerista sem selur fyrir mig að ein-
hverju ráði þannig að ég þarf að reiða mig
mikið á sjálfan mig,“ segir Sigurður. Hann
nýtir sér samfélagsmiðla, sérstaklega Face-
book og Instagram, til að koma list sinni á
framfæri og til að bóka heimsóknir í vinnu-
rýmið.
Verk Sigurðar hafa fengið einkar góðan
hljómgrunn hjá ungu fólki, en Sigurður seg-
ir um þriðjung þeirra sem koma í heimsókn
og kaupa af honum verk fólk að kaupa sitt
fyrsta málverk.
„Ég er eiginlega orðinn sjálfskipaður
sendiherra sem kynnir myndlist á ólíkleg-
ustu stöðum,“ segir Sigurður. „Mér þykir
mjög skemmtilegt að opna augu ungs fólks
fyrir myndlist, hvort sem það er hér í vinnu-
rýminu, í heita pottinum í Vesturbæjarlaug
eða á skemmtistöðum Reykjavíkur um helg-
ar,“ segir hann og hlær.
Komið að kaflaskilum
„Ég held að viðtökurnar frá öðrum í brans-
anum, hvort sem það eru galleristar eða aðr-
ir myndlistarmenn, hafi verið ljómandi fínar.
Allavega það sem ég hef tekið eftir,“ segir
Sigurður. „Auðvitað getur maður ekki verið
allra. Ég veit að það eru ekki allir hrifnir af
því sem ég er að gera og það er í góðu lagi.
Verst þykir mér kannski að fólk í stöðum
þar sem það er kannski að kenna eða miðla
þekkingu á myndlist til ungs fólks skuli tala
með neikvæðum hætti um fólk eins og mig,
sem er ungur listamaður og kannski ákveðin
fyrirmynd fyrir annað skapandi fólk sem vill
koma sér á framfæri. Það þykir mér miður,
en maður verður að lifa með því.“
Sigurður segir sinn persónulega stíl sem
listmálari hafa þroskast mikið. „Alveg frá
því ég var þrettán ára hefur mér alltaf fund-
ist nýjasta verkið vera fullkomið. Síðan líður
tíminn og hlutirnir breytast og þótt ég sé
rosalega sáttur við það sem ég er að gera
núna, þá á það líka eftir að breytast,“ segir
Sigurður. „Þegar maður er ungur listamað-
ur fylgja því stundum unglegar hugmyndir.
Það er sést kannski í sumum verkum mín-
um. En það sem ég er að fara að gera núna
er að þróa mig áfram sem listamaður og
þróa mínar hugmyndir. Þótt ég sé ekki allt-
af klyfjaður speki eða hugmyndum, þá er
komið að þeim kafla núna. Það er komið að
kaflaskilum.“
Breytir kassanum í hring
Í lok árs 2017 hélt Sigurður til Evrópu.
Hann hafði lítið yfirgefið Ísland síðan hann
hóf myndlistarferilinn í Kaupmannahöfn
tæpum áratug fyrr og útþráin dró hann til
Parísar. „Mér fannst ég þurfa að æfa mig að
fara til útlanda,“ segir Sigurður. „Ég vissi
að Erró hefði aðsetur í París, svo ég hugsaði
með mér að það væri gaman að heimsækja
hann. Það var í raun leynt markmið þess-
arar ferðar.“ Sigurður hafði þó enga hug-
mynd um hvar Erró væri niðurkominn eða
hvernig ætti að ná í hann. „Eftir krókaleið-
um náði ég að tala við fólk sem þekkti fólk
og að lokum tók hann á móti mér á vinnu-
stofu sinni og við áttum þar stórkostlega
stund,“ rifjar Sigurður upp.
„Þetta voru tvö rými, rosalega mikið af
pappír, tímaritum og blöðum á gólfinu og
grafíkmyndir og plaköt á veggjunum. Loft-
hæðin var fjórir eða fimm metrar þannig að
það var svolítið kalt. Við fengum okkur sæti
í miðju rýmisins og áttum ljúfa stund á með-
an hann var að klippa út. Þetta var dagur
sem ég mun aldrei gleyma.“
Síðasta haust hélt Sigurður til Lundúna-
borgar þar sem hann dvaldi í rúman mánuð.
„Ég var alltaf töluvert eftir á í ensku. Á
meðan jafnaldrar mínir voru umkringdir af-
þreyingarefni á ensku vildi ég bara skapa
listaverk svo það háði mér alla mína grunn-
skólagöngu. Ég hugsaði svo með mér síðasta
haust að fara bara til London og æfa mig í
enskunni. Svona mánaðarlangt enskunám-
skeið, segir Sigurður. „Enda hefur enskan
verið á stöðugri uppleið síðan,“ bætir hann
við.
Sigurður heldur til Hollands hinn 19.
ágúst til að hefja nám við Konunglegu lista-
akademíuna í Haag.
„Ég er að fara að læra myndlist í mjög
breiðum skilningi. Ég hef áhuga á að prufa
mig áfram í skúlptúr eða jafnvel innsetn-
ingum. Ég á nokkur slík verk en ég hef
aldrei sýnt þau,“ segir Sigurður. „Það sem
er gaman við að fara í svona nám er að ég
get prófað mig áfram. Ég þarf að fara út úr
kassanum og kannski breyta kassanum í
hring eða eitthvað. Þetta verður að minnsta
kosti myndlist; hvers eðlis sú myndlist verð-
ur á tíminn eftir að leiða í ljós.“
Morgunblaðið/RAX
Fyrsta og þriðja málvek Sigurðar eru til sýnis á vinnustofu hans.
4.8. 2019 MORGUNBLAÐIÐ SUNNUDAGUR 13